Romu 15:7-23

⁷E'ina hu'negu, Kraisima tamagrima tamavre'neaza huta, tamafuheina zamavareho, ana hanageno Anumzamo'a ragi erigahie.

⁸Antahiho, Anumzamo'ma Israeli vahe'mokizmi nezmageho huvempa huzmante'nea kea eriama hanige'za kesazegu, Kraisia eri'za vahekna huno zamagritera e'ne.

⁹Ana hu'negu megi'a vahe'mo'za Anumzamo'ma asunkuma huzmante'nea zankura, ragi amigahaze huno avontafepi krentene, E'ina hu'negu nagra megi'a vahepina rankagi negamina, nagra zgamera hu'na kagi'a erisaga hugahue hu'ne. (Sam-Zga 18:49)

¹⁰Mago'ane amanage hu'ne, Megi'a vahe'mota, Agri vahe ene musenkase hiho hu'ne. (Diu-Kas 32:43)

¹¹Ete mago'ane amanage hune, Ramofona ragi amiho, maka megi'a vahe'mota, ana miko mopafi vahe'mota agi erisaga hiho hu'ne. (Sam-Zga 117:1)

¹²Ete mago'ane kasnampa ne'mo Aisaia anage hu'ne, Jesimpinti efore hanimo'a, Agra megi'a vahe'mokizmi kva mani'nenke'za, Agrite zmazama huzankura amuhara hugahaze hu'ne. (Ais 11:10)

¹³Fore'ma haniguma amuhama nehunazamofo Anumzamo, miko musezane rimpa fruzana tamentintifina antevi'netena, Ruotge Avamumofo hankavefi fore'ma hanigura amuhara hugahaze.

¹⁴Nafu nagnahete nagrani'a antahuana, tamagripina knare tamavutmavamo'ene mika'a antahizamo avite'nena, ozeri fatgo azeri fatgo hugahaze.

¹⁵Hianagi mago'a nanekegu avompima hankavetina kreraminoana, Anumzamo'ma asunku'ma hunante'neazanteti ete mago'ane huramagesama hanigu krerami'noe.

¹⁶Kraisi Jisasi eri'za erina megi'a vahetega prisi vahe' kna hu'na, Anumzamofo knare musenke huama nehue. Ana hanige'za megi'a vahe'mokizmia Ruotge Avamumo zmazeri ruotage hu'nige'za, Anumzamo muse huno eneria kre sramnagna hugahaze.

¹⁷E'ina hu'negu Anumzamofo eri'zama enerua zankura, Kraisi Jisasimpi knare hu'noe hu'na navufa rana hugahue.

¹⁸Mago'a zankura nagra navufga erisaga osugahuanki, Kraisi'ma nagripima erivgarenea eri'zamo higeno, megi'a vahe'mo'za amagera nentaze.

¹⁹Ruotge Avamumofo hankavefine, avame'zane, ruzahu ruzahu'za kaguvaza erifore hu'zamofo hanavere, Kraisi musenkea Jerusaleti huama hu'na Ilirikium kaziga (Masedonia-Italy) ome huvgare'noe.

²⁰Hianagi nagra, Kraisi agima nohaza vahepi knare musenke huama hu'na zmasamisuegu, tusi'za huno navenesiankina nagra rumo'za kinaza tratera nona nonkue.

²¹Hu'neanagi mono avontafepina amanage huno krentene: Agri agi agenkema ozmasminesaza vahe'mo'za negesnage'za, Agri agi agenkema ontahinamo'za antahi ama hugahaze hu'ne. (Ais 52:15)

²²Nagra nantuma antena eme tamagenaku'ma huana ama agafare ome'noe, na'ankure ama kumapina mono naneke huama nehune.

²³Hianagi nagra ama kaziga menina hago eri'zana eri vgare'noe, hagino rama'a kafufima emema tamagesue hu'na avegama ante'noa zamo'a tusi'za huno navesie.