Romu 11:7-12

⁷La sou nenge tavikala a loxovaa? Mii e ta Isilaeli xavixavineꞌi sou lexe inoꞌu ne, ane inoꞌu uasi, ia aneꞌi xulumuxaꞌa sevilesi e Lataua musosovosiꞌasi ne ane minoꞌu. Mo aneꞌi moseꞌi ne mitatusou taneꞌi mukalu ne.

⁸Aloxo vaikala vile mikaukavunu muai no nano no anu Lavuku Tavuna teinu noxou Lataua muvikala aloxo ꞌo, “Lataua muꞌoxoneꞌi mixolu loxo itema e muai muvaꞌamiminu. Mo muꞌoxonu ieꞌi seleveenu, la imalei la uasi xe muꞌoxonu sangaliꞌa mutomu, la ilomu la uasi, la muxolu aloxo ne muneꞌe muxali vaimomo ꞌo.”

⁹Mo Deviti kalumo muvikala no anu mii ne aloxo ꞌo. “Eni amasaxa lexe, no mine ipita no anu lavilelu vile toxoxaꞌa mo iꞌauꞌausou, la lavilelu ne uxali loxo mii sou uꞌoxonu masuaneꞌisi, mo uxali loxo uoi sou iꞌamo no anu, mo loxo lulu sou ipatolo no anu xe uxali loxo mii sou uꞌoxoneꞌi itulaki no anu, la ulosiꞌa tuꞌutuꞌumaxusi.

¹⁰Mo ieꞌi seleveenu la imalei la uasi, xe naꞌoxonu xineꞌi ukilikalu la ulanga uxoxolu utotomu aloxo ne.”

¹¹Ioxe, eni emasaxa lexe ataliꞌi la aloxo ꞌo, no mine ta Isilaeli milapau ne, la loxovaa aneꞌi imomomo sou itulu la uasi, mo isuꞌa avile io? Mii vile aloxo ne uasisi manina. Xo aneꞌi mixiunu tumaliꞌa noxou Lataua, la sou Anu mulivulixaꞌa aneꞌi ane ta Iutaia uasi la muꞌoxoneꞌi ta Isilaeli oponeꞌi masuaiꞌa xe miisu.

¹²No mine ta Isilaeli mixiunu tumaliꞌa noxou Lataua la Anu musuꞌulineꞌi ta mitema no xalee lialia mukalusi ꞌo laixe manina. Mo no mine ta Isilaeli imulinu Lataua uasi, la Anu muꞌoxo laixe manina noxiꞌa aneꞌi ane ta Iutaia uasi. Ia lexe ta Isilaeli ilivu uneꞌe noxou Lataua, la Anu usuꞌulineꞌi ta mitema latala ukalusi lailaixe manina.