Rome vene 3:7-18

⁷Idu nai ofa ago dudu, Sei di ago rama bi ini vabara moi ogau iniye rigo vonisi, na bi beika resi vegu no redo amiye kana nifafana redo?

⁸Bedakai nifafana resi nidedi uni ago bi, “Ye vegu no renadi kumo buni baku regifa.” Ye Sei di kota rena bi rama.

⁹Ye makai una Jew vene bi buni iniye ba? Ide iniye iniye! Adina senagi nioteimarafa, Jew vene ma tutubena idana vene, ina vene tau vakoi bi vegu no di vava gabireri amededi.

¹⁰Bura reyo kana: “Amiye yokoi mokena rorobo nufa de, yokoi de iniye iniye;

¹¹yokoi de yaku vegu buni diba nido, ma yokoi de Sei maina redo.

¹²Ina tau vanu gedu maradi; tau vakoi rei tavoi reyadi; yokoi maka yaku buni de redo, yokoi de iniye iniye.

¹³Ago ninari ini vena sau bi amiye guri ruba fafa rina de kana; ini afiye dudu eru rededi, gadeva aruma di gemiso no bi ini venari.

¹⁴Kiraini ma ago ru yaku ini vena vata baeyadi.

¹⁵Ini yuka dudu bi evade raga resi dava rausi regika;

¹⁶moi kekevata una ma moi no rena bi ini dina idari amededi.

¹⁷Ma uka amuta di ida bi diba de niyadi.

¹⁸Ini nemokori ka bi Sei ori de rededi.”