Rome 6

1

2

3

4

5

6

7

8

9

10

11

12

13

14

15

16

¹Ikikava, aviyavisina taberai? Mikeda berabero tabera kirakiiyei da God ina agabiibai tirakati, bo?

²Kegha taweyana. Berabero ina rewapana ke kovokovoghina da ini badeta, iyamna maranai vitumaghana tavi karei na tuna nakanani ma berabero yawasina tarabobokuyowei.

³Koakovi bo kegha da tababataito na Yesu Keriso yavata tavi sagota, ma bade tuna yavata tarabobo.

⁴Tababataito na nakanani ma Keriso yavata tarabobo patapata ma tuna yavata idogota. Ma ina Mamai ina rewapana ere kadakadarina iberai da Natuna rabobowai ivomiiri da yawasa vuna ivi karei. Ma tota yavata tavomiiri da yawasa vuna tamakiiyei.

⁵Keriso irabobo na yavata tarabobo patapata, ma bade ikikava rabobowai ivomiiri na nakanani tavomiiri.

⁶Bade takovi da rorova na ita yawasa wadubona kamonai na berabero irakata. Ma nani yawasina na Keriso yavata korosiyai ituparatui da berabero ina rewapana ivovinubai da ita yawasa ke ini badei,

⁷iyamna maranai Keriso yavata tarabobo na berabero ina rewapana takutawei.

⁸Keriso yavata tarabobo kubiine, nuwanuwata kudubinai titumaghana da ita yawasa kamonai na Keriso yavata tinuwasago.

⁹Takovi da Keriso irabobo ma bade ivomiiri da ke meyani ina rabobome. Rabobo ina rewapana ivi kovi tuwanonowi.

¹⁰Mara sago kava irabobo ma ina rabobo kamonai berabero ina rewapana ivi kovi tuwanonowi. Ma ina yawasa kamonai aviyavisina kudubina eberaberai na God yavata inuwasago.

¹¹Karako tanotai da berabero ina rewapana kegha da ita yawasa iti badei. Tuna kubiine na ita yawasa kamonai na God kana kadara kubiine Yesu Keriso tepanai tamakai.

¹²Ke taberai da berabero ita yawasa ini badei. Ke tivaghinei da tupuwita ina kayowana bero kirakiisi ina kirorowana kirakiiyei da nake ini wagiyana.

¹³Ke koni vaghinei da berabero tupuwimi ini badei da bera beroberosi ina beraberai. Ma ami yawasa kudubina God koverei, iyamna tuna iberimi da rabobowai kovomiiri ma yawasa vuna iveremi. Tupuwimi kudubinai bera maninisi kava kona beraberai ami yawasa kamonai.

¹⁴Berabero ke ini bademi, iyamna tami na ke vonaviyoyovana gaburinai kota makamakai. Tami na God ina agabiibai gaburinai komakamakai.

¹⁵Takovi da tota ke vonaviyoyovana ina rewapana gaburinai kata makamakai. Tuna kubiine na ikikava tamakai? God ina agabiibai kubiine berabero patana da taberai bo? Ke nakanani taberai.

¹⁶Iyi kona vinei da ami bada na tuna kava kona votekatekei. Mikeda berabero kona vinei da ini bademi na ami damona na rabobo. Ma God kona vinei da ini bademi ma kona votekatekei na ina terevimaninimi ma yavata koni nuwasago.

¹⁷Rorova na ami bada na berabero kovovotekatekei. Ma karako na God tikiikiiwei da ina vibeyebeyena vaghata kovi yanei na nuwanuwami kudubinai kovovotekatekei.

¹⁸Ma tami na berabero kamonai God itinakiibuwemi da karako na yawasa maninina ibademi.

¹⁹Taku weni nakanani aisisiya kurimi, iyamna tami mani ami rewapanai na ke kovokovoghina da yawasa maninina konakova kamowi. Rorova kovere meyemi da berabero ivivi bademi da bera dowadowasi kovovotupei. Ma karako na kovere meyemi da yawasa maninina ibademi da tami wawaya vovokaravimi.

²⁰Rorova na berabero ivivi bademi da yawasa maninina ina vibadana kobarei.

²¹Nani berasi beroberosi koberaberai na avi biibiina kopanapanani? Ke sago tovona. Ma karako nani berasi koinimayei. Ma koakovi da berasi i damona na rabobo.

²²Ma karako na berabero ke ita vivibademi, iyamna God namada itinakiibuwemi. Ma wekarakava na God ina vivibademi da biibiina kona panani. Ini nowemi da yawasa vovokaravina kava kona makiiyei da yawasa makamakii nonowina kona viiya.

²³Berabero kana miiya na rabobo. Ma ita Bada Yesu Keriso tepanai na God nevana kava ipuyota, tuna puyona na yawasa makamakii nonowina.