Rome 3:10-26

¹⁰Giruma katamana evonavoneta bo, “Ke sago iyai wawaya maninina, kegha taweyana.

¹¹Ke sago wawaya akakovina, Ke sago wawaya God itekwekwai.

¹²Wawaya kudubina God ibarei ma imiirikupukuputei. Ti na peyarisi God ku matana na kwebusi. Ke sago iyai bera maninina ita beraberai, kegha taweyana.

¹³Kawasiyai sisiya dowadowasi ekiikiibau nakanani ma karawaga kamonai dogo ita arai da bowana ita kiikiibau. Pepasi ikuvirevirei da sisiya vibero eberaberai. I sisiya beroberosi na nakanani ma mota berona kawagegurina ita kiikiibau.

¹⁴Mara nonowa kawasiyai sisiya dowadowasi eberaberai na damina ibero kirakai.

¹⁵Ma iyaghiyaghina kirakai da wawaya ini gubagi bo ini raboboi.

¹⁶Mike enenae na wawaya ekiikiiviberosi ma nuwapoya evereveresi.

¹⁷Nuwanuba gwabisiyai kegha.

¹⁸Ma God ke ita yabuyabumanei.”

¹⁹Takovi da vonaviyoyovana na Jiu damsi kubiisi ma tuna kamonai kii sisiya eberaberai da ti na berabero wawayisi. Ma bade God vonaviyoyovana ivokiibuwei na dam kudubina kawasi kiipotana kubiine da ke ini tupariyei, iyamna peyarisi na God ini tupaviresi.

²⁰Wawaya ke kovokovoghina da vonaviyoyovana ina nunura bubuni da God ku matana ti na wawaya maninisi. Vonaviyoyovana emakamakai na idebeta da tota na berabero wawayita.

²¹Ma karako na God keta vuna ivi debei da ikikava ina vonakiiyaragha da tota wawaya maninita ku matana. Nani ketana na ke vonaviyoyovana tepanai ma kegha da vonaviyoyovana ma peroperoveta ivi mamatarei da mara sago ina nekiibau.

²²Namanaki tam Jiu bo kupuna wawayim, kudubita ita keta sago kava da yawasa maninina tapanani. Iyavo kava Yesu ini tumaghanei na God ku matana ti na ina wawaya maninisi.

²³God na wawaya maninina ma kana kadara irakata kirakai da tota ke kovokovoghina da ita yawasa kati maninini da tuna nakanani, iyamna kudubita na berabero wawayita.

²⁴Ma God ina agabiibai irakata kirakai da nevana kava ipuyota, yawasa ivereta ma ivonakiiyaragha da tota wawaya maninita. Peyarita ita berabero kamonai ma Yesu Keriso ivotaweta da yawasa tapanani.

²⁵God Natuna ivonatawei isuwara da ita berabero vitana ikavari. Wawaya Yesu ini tumaghanei na i berabero kudubina taranai ina kowatawei da God ina nuwapughu ina vovinubai. Weni berana iberai da iti beyeta da tuna wawaya maninina. Namadani kava wawaya i berabero kudubina ikitakitatawei, ivivi koyakoyagha

²⁶da karako weni maranai ivi debei da vonavaghata tepanai wawaya i berabero ini tupavirei, ke ina kitatawei. Ma iyavo kava Yesu itumaghanei na God ina vonakiiyaragha da ti na ina wawaya maninisi.