Romans 5:1-21

¹Ingodenanemi Iesu Keriso tumonda etero unemi etiri ingodena God ga da umo jigari ewamei edo era. Edo ingode bega da atima era Iesu Keriso da buro awasedo.

²Edo Iesu Keriso mi ingodenaso tumonda awasedo ingodena giti jigido God da kondade ari awa bari emboro da mambusira. Edo ingodena kando awa budo boroko ingodena goroba de dederera. Edo ingodena boroko simba ise iaviri era ainda be awa ingodena gosera amboda awa God mi ingodenaso yei uso usasa awa itadira.

³Edo ge nei sadena ingodenaso yei memesi puradira awa ingodena iaviri adera ainda be awa memesi mi ari ingodena goroba ise atadera.

⁴Edo God umo ingodena memesi da joda goroba de ise atima era awa gido umo gosira ingodena ewamei adi dipapa era awa gosira. Gido umo iaviri ira. Edo ingodena God ingodenaso yei iaviri ira awa gosise ingodena God umo ro adi adi sari sisira awa simba adera.

⁵Edo ingodena awodo simba adera awa ingodena jaro de adi aera ainda be awa Asisi Kotopu God mi ingodenaso yei ititisira amimi ingodenaso jo awa God da dubo bari mi sirisira. Awasedo ingodena mana mana mana adera te gosera God umo ro adi sari sisira awa adira.

⁶Edo ingodena ewamei ari awa goroba ae etero ainde Iesu Keriso ingodena wasiri bebegae embobo awa embo bebetisira. Edo God iji ewamei bugiri Iesu Keriso betarase itiri bugusira.

⁷Edo ingo ro kotevi? Edo embo mi embo ewamei awa embo betae etita? Awasi embo roinge mi awodo awa aderita rora.

⁸Awarate God mi ingodenaso yei umo be ingodena dubo budo ira awa isaga isira. Edo ingodena wasiri bebegae ise atero Keriso ingodena embo bebetisira.

⁹Edo Iesu Keriso awa uso ororo wosetiri bebetisira awasedo God mi etiri ingodena God ga da umo jigari ewamei edo era. Edo da awa aera te amboda God mi busu berari da embo berari awa kasadira. Edo God tini gambari adira iji ainde ingode gosera Keriso mi ingodena soregadira.

¹⁰Edo ingodena matu awa God da gitopo ra ingodenaso wasiri bebegae awasedo awarate uso mei bebetisira awasedo God mi etiri boroko ingodena God da otatao etera. Edo da awa aera te Iesu Keriso ingodenaso joda atise ari ingodena soregadira.

¹¹Edo da awa aera te ingodenaso Bada Iesu Keriso etiri ingodena awa uso otatao etera awasedo ingodena iaviri era.

¹²Embo da Adam mi God beuso etiri edo wasiri biae busu berari da embo da yei bugusira. Tuturo etero betari daedo embo berari da yei bugusira. Edo embo berari wasiri bebegae isera awasedo betari busu berari da embo berari da yei bugusira.

¹³Edo Moses da agodari ge awa bugae atiri embomei wasiri bebegae edo isera awarate agodari ge awa bugae atisira awasedo embo mi wasiri biae ro isera awa sari sago aera.

¹⁴Awarate Adam da iji da tuturo edo mambudo Moses da iji de awa embo berari betari awa oju edo era. Edo embo wasiri biae God da agodari tuturo awa beuso teta Adam mi isira awodo aera te emboro nei wasiri bebegae etero betari awa ungoda yei bugusira. Edo Adam awa kiambu teta Iesu Keriso amboda bugadira awa inge ra.

¹⁵Awarate ungo etoto awa da awa aera ainda be awa God da soregari kando awa Adam da betari kando awodo aera. Edo God sisira embo berari awa betadera ainda be awa Adam da wasiri biae awasedo. Edo embo jiwae be bebetisera embo da Adam da wasiri biae amimi awa gebe ra awarate God da kando amimi Adam da God kera ae ari wasiri awa nembodiba be derigurira awasedo God Iesu Keriso itiri edo soregari kando awa embo jiwae be da yei ititisira.

¹⁶Edo God embo da yei uso kando itido ira ainda emboro de Adam da wasiri biae da emboro de awa ewoga ewoga ra. Edo Adam da wasiri biae awa God da kasari da susu ra awarate God embo berari da wasiri biae gido ungo umo jigari ewamei orase dipapa edo Iesu Keriso kando itiri bugusira.

¹⁷Edo embo berari betadera ainda be awa Adam mi wasiri biae isira awasedo awa gebe awarate ro Iesu Keriso da betari mi etiri isira amimi ro Adam da uso wasiri biae mi etiri isira awa be derigedo gogo isira. Edo embo ave God mi ari ungae da umo jigari ewamei adira edo God da soregari da kando awa badira embo awa Iesu Keriso ga gitijigadira.

¹⁸Awasedo ingodena berari awa riroga da emboro da mambutera ainda be awa embo da Adam da wasiri biae mi awarate boroko Iesu Keriso da uso ari ewamei mi wujegetiri edo demonda atari de edo wasiri de awa embo berari da yei bugusira.

¹⁹Edo embo jiwae be wasiri bebegae edo era ainda be awa embo da Adam mi God kera ae isira awasedo awarate God mi etiri embo jiwae be awa God ga da umo jigari ewamei adera ainda be awa embo da Iesu Keriso mi God kera isira awasedo.

²⁰Edo embo mi wasiri biae mo rori awa gorase sedo God uso agodari Moses da yei itiri gaisira. Edo God uso agodari itiri embo agodari ainda tini gambari isera. Etero ungoda wasiri bebegae awa babojisira. Edo embo da wasiri bebegae iji berari bajido isira awodo awarate God da dubo bari da kando mi wasiri biae awa derigedo nembodiba etira.

²¹Edo embo berari wasiri biae edo era awasedo betari awa iji berari embo berari da yei bugudo ira awarate God mi dubo bari mi gitijijigurise ari ingodena awa ungae da umo jigari ewamei adera. Edo ingodena God ga da umo jigari ewamei iriroro uso dubo bari mi ingodena awa gitijigido budo wasiri mata awa atari da mambadira ainda be awa ro ingodenaso Bada Iesu Keriso mi isira awasedo.