Romans 16:3-13

³Nint waaꞌān ngayang pam wanch il-ilantan ngay kaangk paththam wun-wunang thanta, puth in-inman ngay ngaantam-ngeey-ngeeyang thananga: — Priscilla aꞌ putha Aquila, pul karpan work iiy-iiypul ngatharangana, ngana wik Jesus.antaman waaꞌ-waaꞌan.

⁴Pulana minam piꞌ-piꞌpul ngayangana, pam wayanang al-alantamana. Nungkway than keꞌ mulathiythan pulangan thamp-a, an kana, pul ngayangiyweya minam piꞌ-piꞌpula. Yaa, an ngayiy putha thankyou thawang pulanta, puth ngayam thonakam yaꞌa, puth wiy anangan thamp, pam wanch Christiansa, Jews yaꞌ anangana, than yotaman thamp thankyou thaw-thawantan pulantana.

⁵Nint ngayangan waaꞌāna pam wanch wiy al-alantan thampa: — than pam wanch Christians anangana aawuch pulantamangana yal-yalmathwuntan God.antan meeꞌan-wuth-wuthanamantana, — puth ngurp min ngatharam Epaenetus.ana, nil pam inmana pam Christian kaꞌatham iiy-iiya aak anganiy Asia.angana,

⁶— putha, Mary.anweya, work piꞌanan iiy-iiy keꞌ-ngoongkamana niiyantana,

⁷— putha Andronicus-a, aꞌ putha Janias, puliya Jewsa keꞌ ngay inmana, pul aak jailangan wun-wunpul ngatharang angmana. Pam wanch wiy Christians al-alangana wik min anman waaꞌ-waaꞌantan pulantamaniya. Pulaniya, ngangk kaꞌathangaman theeꞌpul God.antana, ngay keꞌaman yippak ngangk ngatharaman theeꞌang God.antana,

⁸— putha, Ampliatus.ana, ngurp min ngatharam thampa nilan ngangkangan piꞌ-piꞌan nunang Jesus Christ.ana keꞌ ngay anmana,

⁹— putha Urbanus.ana, nilana work anman iiy-iiy ngamparangana nungant Jesus Christ.antan aꞌ putha ngurp ngatharaman Stachys.ana,

¹⁰— putha Apellesa, wiyiy aak way kuyam wamp nunganta, puth nilana Jesus.an ngangk thayanam ngul monkan-wak-wakan nunang, — putha, than pam wanch anangan aawuch Aristobulus.antangan wun-wuntana,

¹¹— putha Herodian.ana, pam ngan aak-kunchana, — putha than Christians anangan aawuch Narcissus.antangan wun-wuntan thampa,

¹²— putha Tryphaena aꞌ Tryphosa, pulana work iiy-iiyanpul thamp Lord Jesus.antana, — putha ngurp ngatharam Persis.ana, nil thampana work piꞌanan iiy-iiy nungant Lord.antana,

¹³— aꞌ puth Rufus.ana, nilana min-minam monkan-wak-wakan nunang Christ.ana, putha, kaath nungantaman thampa. Nilan ngayang minam piꞌ-piꞌa ngay keꞌ puk nungantam yimanangana,