Romanos 7:10-19

¹⁰E chinuwach riꞌin, ri taqanik re ri Tzij Pixabꞌ e kayaꞌw kꞌaslemal; noꞌj ri xuya chwe riꞌin, e ri kamik.

¹¹Ma ri mak e xuchapabꞌej ri taqanik y rukꞌ kꞌu waꞌ, xinusoko y jelaꞌ xukꞌam lo ri kamik panuwiꞌ.

¹²Kaqꞌalajin kꞌu riꞌ ri Tzij Pixabꞌ re ri Dios lik santo yey taq ri taqanik re ri Tzij Pixabꞌ lik santo, lik jusukꞌ y lik utz.

¹³Pero ¿e nawi keꞌeloq e ri utz xukꞌam lo kamik panuwiꞌ? ¡Na e ta riꞌ! Ma ri mak e xuchapabꞌej ri utz y rukꞌ waꞌ xukꞌam lo kamik panuwiꞌ. Ruma kꞌu riꞌ ri taqanik re ri Tzij Pixabꞌ, xa jumul kaqꞌalajinik lik itzel uwach ri mak.

¹⁴Qetaꞌam chi kꞌut, ri Tzij Pixabꞌ petinaq rukꞌ ri Dios. Noꞌj riꞌin xa weqam wulewal nupoqlajil, yey in yaꞌtal kꞌu puqꞌabꞌ ri mak.

¹⁵Na kanꞌan ta kꞌu riꞌ ri kuaj riꞌin kanꞌano; ma e ri tzel kanwilo, e kanꞌan riꞌ. Lik na kanmaj ta kꞌu usukꞌ suꞌbꞌe kanꞌan waꞌ.

¹⁶Yey echiriꞌ e kanꞌan ri na kuaj taj, kannaꞌ kꞌu riꞌ chinukꞌuꞌx na utz ta ri kintajin che uꞌanik. Rukꞌ kꞌu riꞌ waꞌ kanjikibꞌaꞌ uwach lik utz ri taqanik re ri Tzij Pixabꞌ.

¹⁷Jelaꞌ kꞌu riꞌ e pachaꞌ na in ta ri kinꞌanaw re ri na utz taj, ma e kataqan ri mak pa wanimaꞌ.

¹⁸Riꞌin lik wetaꞌam, wa in tikawex na jinta kꞌana utz chwe we na jinta ri Dios wukꞌ. Ma tobꞌ kuaj kanꞌan ri utz, pero nutukel na kanriq ta uꞌanik waꞌ.

¹⁹Ma na kanꞌan ta ri utz, ri lik kuaj kanꞌano; e lik kanꞌan ri na utz taj, ri na kuaj taj kanꞌano.