Romanos 6:4-15

⁴Ruma kꞌu ri bautismo xqakꞌulu, e pachaꞌ junam rukꞌ ri Cristo xojkamik y xojmuqik, chaꞌ jelaꞌ kojkꞌastaj lo che jun kꞌakꞌ qabꞌinik jelaꞌ pachaꞌ ri Cristo xkꞌastaj lo chikixoꞌl ri ekaminaq ruma runimal uchuqꞌabꞌ ri Qaqaw Dios.

⁵Ma we xꞌan xa jun chiqe rukꞌ ri Cristo chupa rukamik, jekꞌulaꞌ riꞌ xa jun qaꞌanom rukꞌ chupa rukꞌastajibꞌal.

⁶Lik kꞌut qetaꞌam e ri ojer qabꞌinik qasilabꞌik xkam rukꞌ ri Cristo chwa ri cruz chaꞌ jelaꞌ kasach uwach ruchuqꞌabꞌ ri mak paqawiꞌ y jekꞌulaꞌ ri mak na kataqan ta chi paqawiꞌ riꞌoj.

⁷Ma e junoq kaminaq chi che ri mak, riꞌ na jinta chi uchuqꞌabꞌ ri mak puwiꞌ.

⁸Ma we xojkam junam rukꞌ ri Cristo, jekꞌulaꞌ riꞌ lik kaqakojo kꞌo qakꞌaslem rukꞌ Rire woꞌora y chiqawach apanoq.

⁹Lik qetaꞌam kꞌut, ri Cristo ruma xkꞌastaj lo chikixoꞌl ri ekaminaq, na kakam ta chik, ma ri kamik na jinta chi uchuqꞌabꞌ puwi Rire.

¹⁰Ma rukꞌ rukamik xa jumul xusachisaj uwach ruchuqꞌabꞌ ri mak; yey ruma kꞌu xkꞌastajik, e kuloqꞌnimaj ri Dios rukꞌ rukꞌaslemal.

¹¹Jekꞌuriꞌlaꞌ kꞌola chikꞌuꞌx ralaq e pachaꞌ alaq kaminaq chi chwach ri mak yey alaq kꞌaslik re kaloqꞌnimaj alaq ri Dios, ma alaq re ri Cristo Jesús, ri Qanimajawal.

¹²E uwariꞌche lik maya alaq luwar kataqan ri mak puwi ri cuerpo alaq, ma waꞌ xa ikꞌowel. Maya ne ibꞌ alaq chupa taq ri rayibꞌal na utz ta uwach.

¹³Maya ne ri cuerpo alaq puqꞌabꞌ ri mak che uꞌanik ri na jusukꞌ taj. E yaꞌa ibꞌ alaq puqꞌabꞌ ri Dios, ma alaq kaminaq chi chwa ri mak y alaq kꞌas che jun kꞌakꞌ bꞌinik silabꞌik. Yaꞌa kꞌu alaq riꞌ ri cuerpo alaq puqꞌabꞌ ri Dios chaꞌ rukꞌ waꞌ kaꞌan alaq ri lik jusukꞌ chwach.

¹⁴Ma ri mak na jinta chi uchuqꞌabꞌ re kataqan pawiꞌ alaq y na jinta chi ne alaq chuxeꞌ ri qꞌatbꞌal tzij re rutaqanik ri Dios tzꞌibꞌital kan ruma ri Moisés, ma woꞌora kꞌo alaq puqꞌabꞌ ri Dios ruma ri unimal rutzil ukꞌuꞌx Rire.

¹⁵¿Saꞌ kꞌu riꞌ ri kaqaꞌano? ¿Kojmakun kami riꞌ ma ri qꞌatbꞌal tzij re rutaqanik ri Dios na jinta chi paqawiꞌ yey e oj kꞌo puqꞌabꞌ ri Dios ruma ri unimal rutzil ukꞌuꞌx Rire? ¡Na e ta kꞌana riꞌ!