ROMANOS 6:3-13

³¿Yabxeꞌ a choꞌóbtsik ke tam ti bachʼu na Kristo Jesús, in junwal jelti max u chemech junax kʼal Jajáꞌ tam tu pujan?

⁴Tam tu pujan, i junwal jelti max u chemech ani u jolyat junax kʼal na Kristo. Pos anchanꞌ xan ti na Kristo ejech ti ít abal kin xalkʼantsi tin labidh tʼokát an Tátaꞌláb, anchanꞌ weye wawáꞌ yejat ku xeꞌchinich lujat ani yabich ki tʼajál i walastaláb.

⁵Kom jelti max u chemech junax kʼal na Kristo, anchanꞌ jeye ti neꞌech ku ejech ti ít jelt xan ti Jajáꞌ ejech.

⁶I choꞌóbich ke an wejeꞌ chalab xi koꞌolwiꞌik, jelti max pajkʼiyat jeye junax kʼal na Kristo. Anchanꞌ ti támun abal ka wixkʼiyat an walastaláb, xi kʼwajat jelti max i ajátikláb. Anchanꞌ yabich yejat ki walaꞌ jelti max exom i tʼójontsal bél jechéꞌ an ajátikláb.

⁷Pos xi chemnekich, yabich neꞌech ka ejtowat ka kóꞌyat takʼnél kʼal an walastaláb.

⁸Kom jelti max u chemech junax kʼal na Kristo, i choꞌób jeye ke neꞌech ku kʼwajay ejat kʼal Jajáꞌ.

⁹I choꞌóbich ke tam ti na Kristo ejdhájich ti ít, yabich jaykʼi neꞌech ka chemech; an chemlá yabich in koꞌol i awiltaláb kʼal Jajáꞌ.

¹⁰Pos tam ti chemech na Kristo, chemech kʼal tin kwenta an walastaláb júnílkʼi abal echʼekʼijich; por tam ti ejdhá ti ít, ejdhá abal ka kʼwajay ejat abal a Dios.

¹¹Anchanꞌ teye tatáꞌtsik, ki kʼwajaytsik jelti max i chemnek abal an walastaláb, por i ejattsik abal na Dios kʼal tin kwentakʼi ni Ajátik Jesukristo.

¹²Jaxtám, yabich ka walkaꞌtsik kin kóꞌoy i awiltaláb an walastaláb ba na tʼuꞌúl xu chemel. Yabich ka tʼajál xowaꞌ in kulbetnál na tʼuꞌúl.

¹³Yab ka pidhnaꞌtsik tabáꞌ ki éynátsik kʼal an walastaláb abal ka tʼajaꞌtsik xowaꞌ yab alwaꞌ. Yab ka tʼajaꞌtsik anchanꞌ, ka pidhnaꞌtsik tabáꞌ ba na Dios, jelti jun xitaꞌ xi chemnekich ani ejdhatsich ti ít. Ka pidhnaꞌtsik tabáꞌ ba na Dios abal ki éynátsik ka tʼajaꞌ xowaꞌ lujat.