Romanos 5:3-12

³Askatari Jesúsnoax omiskõi nõko shinã mẽra nõ inimakõitiro. Askax nõ a keskara nõ itiro. Omiskõifiaito Jesús ãfe shinãmã nõko shinã mẽra noko mitsisfamaxotiro nõ tenenõ.

⁴Akka Jesúsnoax omiskõikĩ nõ tenei nõ yora finakõia ipainãkafatiro anã chaka shinãyamaxiki. Nãskakẽ Nios nokoki inimai. Nokoki inimaino nõ tãpia nõ afe ĩpaxanõ.

⁵Nõ askara shinãi nõ rãfitiroma Niospamãi a yoia keskara noko axõaino. Akka noko Niospa noikõikĩ ãfe Yõshi Shara nõko shinã mẽra noko nanexotiro.

⁶Akka nõa nõko chaka nõ soametiroma. Nãskakẽ Niospa ãfe Fake nĩchipaiyaitĩa nai mẽraxõ nãmã nĩchini yora chakafoõnoax naaxinõ.

⁷Tsõakai yora fetsa nãxopaitiroma sharafiano. Ẽtsa, itiro rakikĩa yora nai yora sharafoõnoax.

⁸Akka nõ chakafokẽ Niospa ãfe Fake nĩchini noko nãxonõ. Nãskakẽ nõ tãpitiro Niospa noko noikõiai.

⁹Askax nõõnoax naano ãfe imi foni. Nõ chanĩmara fakẽ afaa chakafamisma keskara noko õi noko chaka soaxõ. Akka nõ chakakẽ Jesús nõõnoax nani. Nãskakẽ iskaratĩa mã nõ chanĩmara fakĩ finakõia. Anã nokoki Nios õitifishkikĩ noko omiskõimaxima.

¹⁰Askata nõ Nios noikaspaino ãfe Fãke noko nãxoni Nios fe nõ rafenõ. Nãskax nõ iskaratĩa Jesús afe yorafo nõ afe rafekõia. Askaxõ noko sharafakĩ finakõi. Jesús nakẽ Niospa anã otofani, nõri afe nipaxanõ.

¹¹Akka nõ Nios noikaspayoni. Iskaratĩa mã nõko Ifo Jesucristoõxõ noko raefaa nõ afe isharakõia. Nãskakẽ Jesús Nioski noko inimamasharakõia.

¹²Niospa nã feronãfake Adán taefakĩ onifani. Nã Adán taefakĩ afara chakafani. Nãskakẽ aõxõ afara chakafapafo. Nã Adán afara chakafaniõnoax keyokõi nõ natiro nõmãi keyokõichi afara chakafaax.