ROMANOS 3:4-18

⁴¡Dsón'₂ bá₄ tsá₃ le₂jaun₂! Juɨ₁le₂lei₅₄ bá₄ jniog₄, Diú₄ në́₃ jmo₃ bá₄ ca₂le₃jë́₃ lia'₂ con'₂ lë́₅ jág₁ tí₅ quió'₅, juɨ₁'e₂ guë́₃ ca₂le₃jɨ́n₃ dsa₂ tsá₃ tí₅ jág₁ quió'₅; ia₁ ne₄ Si₂ juá'₂: ia₁jaun₂ le₃lí'₄ dsa₂ a₂lɨ́ng'₅ i₂dsen₃ juɨ₁lia'₂ jë₁dsia'₂ jág₁, ia₁jaun₂ bá₄ léng'₂ jë₁ma₂të́₂ rë₁con₂ dsa₂ 'í₁ ja₁cong'₂.

⁵La₁ në₁jua'₂ tí₅ ta₁ dsáu₁ jniog₄ a₂rë₂jniá₂ Diú₄ a₂lɨ́in₅ i₂dsen₃, ¿'e₂ le₃jua'₅₄ jniog₄ në́₃? ¿'An₁ tsá₃ rë₂ qui₃dsɨ₅ Diú₄ 'éi'₃ në₁jua'₂ ca₂rë₃'néi₃ 'ë́₂ uɨg₅ ja₁con₂ jniog₄? (A₂lë₁juá'₅ jniá₂ lia'₂ jë₁juá'₂ dsa₂ mɨ₂güɨ́g₃ bá₄.)

⁶¡Dsón'₂ bá₄ on₃jua'₅₄ le₂në₅! Ia₁ jua'₅₄ mei'₂ guë́₃ tsá₃ rë₂ qui₂dsɨ₅ Diú₄ 'éi'₃, ¿'a₂ bá₄ lia'₂ le₃con₂ 'í₁ ja₁con₂ dsa₂ mɨ₂güɨ́g₃?

⁷La₁ në₁jua'₂ jág₁ të₂jág₁ quió₃ tí₅ ta₁ ia₁jaun₂ lë́₅ a₂rë₂jniá₂ guë́₄ jág₁ dsau₅ quió'₅ Diú₄ ia₁jaun₂ të₂le₃ dse₃ guë́₄ chéin'₅, ¿'e₂ lë₃ qui₂dsɨ₅ Diú₄ 'éi'₃ a₂rɨn₂ jniá₂ dso₄?

⁸¿Ja₁lɨn₃ guë́₄ dse₃ jua'₅₄ caun₂ a₂jmo₅₄ a₂'lɨg'₅₄, ia₁jaun₂ jiá₃ a₂dse₃? A₂le₂në₅ bá₄ chi₂'ag₅ i₂lɨn₅₄ 'ag₂₃ jnia'₅₄ a₂jme₂tɨ́n₂ jnia'₅₄ dsa₂. La₁ gue₃ bá₄ uɨg₅ dsa₂ i₂dsɨ₂jiog₅ dsɨ́₅ le₂në₅ 'a₂ con'₂ ca₂tɨ́in₂.

⁹¿'E₂ jaun₂ në₃? ¿A₂dse₃ guë́₄ tióng₂ jnia'₅₄ dsa₂ judíos? ¡Dsau₅ bá₄ on₃jua'₅₄ le₂jaun₂! Ia₁ ma₂të₂tsɨ'₅₄ jág₁, co₂jaun₂ bá₄ dsa₂ judíos con'₂ dsɨ₂nau₂, caun₂ bá₄ juɨ₅ tioin'₅₄ 'uɨg₅₄ dsáu₁.

¹⁰Lë́₅ juɨ₁lia'₂ juá'₂ ne₄ Si₂: Ca₂lia'₂ 'i₁jan₂ dsa₂ tsá₃ chan₂ i₂jme₂ti₃ 'Éi'₃ quió'₅ Diú₄, ca₂lia'₂ 'i₁jan₂ tsá₃ chan₂;

¹¹tsá₃ i₂chan₂ jua'₅₄ i₂ŋɨ́'₂ dsɨ́₅, 'i₁jan₂ tsá₃ chan₂ jua'₅₄ i₂'nio₃ 'na'₂ Diú₄.

¹²Ca₂le₃jɨ́n₃ bá₄ ma₂i₂nio₄ cau₅ juɨ₅ ma₂i₂cóin'₅, co₂dsia₅ bá₄ ma₂i₃léin₂ juɨ₅ ja₁tsá₃ ta₁ tí₄. Tsá₃ 'ein₂ chan₂ ca₂lia'₂ 'i₁jan₂ jua'₅₄ i₂qui₂jmo₅ a₂dse₃, ca₂lia'₂ 'i₁jan₂ tsá₃ chan₂.

¹³'Uë́'₅ jág₁ 'lɨg'₅₄ le₂'o₅₄ juɨ₁lia'₂ ja₂ dsí₂ 'lɨg'₅₄ a₂'uë́'₅ tau₂ 'ŋio₅ a₂rë₂na₄; quian'₅₄ le₁tsɨ'₂ jmo₂₃ a₂juɨ₁gain₂. Në₂jag₄ bá₄ náu₁ dsɨ₂mɨ'₂ 'a₄ mɨ₂'o₅₄;

¹⁴Jmá'₃ caun₂ a₂jaun₂ bá₄ juá'₂ dsa₂, a₂uɨg₅ dsɨ́₅, a₂jme₃dsi'₃ ja₁con₂ rɨin'₅₄;

¹⁵Ma₂në₃ bá₄ i₂ŋɨi₂₃ cán₂ tag₅₄ a₂dsɨ₃jme₁dsiain₂₃ rɨin'₅₄.

¹⁶Léi₄ jë₁ca₂ŋɨi₅ ca₂quiog₂ caun₂ juɨ₅ a₂o₂i₁ dsɨ₅, ja₁i₃'én₂ 'a₂ lia'₂ chan₂ dsa₂;

¹⁷ia₁ tsá₃ cuɨ́'₅ dsa₂ 'éi₂ juɨ₅ 'ei₅ tei₄;

¹⁸Tsá₃ a₂jaun₂ dsɨ₂jiog₅ dsɨ́₅ jua'₅₄ a₂gain₃ Diú₄.