Romanos 2:8-16

⁸Noꞌj ri oyowal y ri qꞌatbꞌal tzij re ri Dios katzaq pakiwi ri keyaktaj chirij Rire, waꞌ e ri na kakaj ta kakikoj ri Qꞌijsaq re ri Dios, xew e kakiꞌan ri na jusukꞌ taj chwach ri Dios.

⁹Kape kꞌu kꞌaxkꞌobꞌik y bꞌis pakiwi konoje ri tikawex kakiꞌan ri na utz taj, tobꞌ e aj judiꞌabꞌ o na e ta aj judiꞌabꞌ.

¹⁰Noꞌj chike konoje ri kebꞌanaw re ri utz, ri Dios kuya kichomal, yakbꞌal kiqꞌij y utzil chomal, tobꞌ e aj judiꞌabꞌ o na e ta aj judiꞌabꞌ.

¹¹Ma chwach ri Dios konoje ri tikawex xaqi junam kiwach.

¹²Konoje kꞌu ri na jinta ketaꞌam puwi ri Tzij Pixabꞌ re ri Dios, na kaqꞌat ta tzij pakiwiꞌ e chirij ri kubꞌiꞌij wa Tzij Pixabꞌ. Na rukꞌ ta kꞌu riꞌ, we kemakunik, kasach na kꞌu kiwach. Noꞌj kꞌu ri ketaꞌam wa Tzij Pixabꞌ, we kemakunik, riꞌ kaqꞌat na tzij pakiwiꞌ e chirij ri kubꞌiꞌij wa Tzij Pixabꞌ.

¹³Ma ri e jusukꞌ chwach ri Dios na e ta ri xa e tanel re Rutzij Upixabꞌ; ma e ri e ꞌanal re, e waꞌ ri kaꞌan jusukꞌ chike.

¹⁴Noꞌj ri na e ta aj judiꞌabꞌ, tobꞌ na kitom ta ri Tzij Pixabꞌ re ri Dios, we kalax pa kanimaꞌ kakiꞌan ri kubꞌiꞌij wa Tzij Pixabꞌ, waꞌ e kꞌutubꞌal re kꞌo ketaꞌam puwi saꞌ ri chirajawaxik chike.

¹⁵Qꞌalaj kꞌu riꞌ kꞌo taqanik tzꞌibꞌital pa kanimaꞌ, ma kakinaꞌ chikikꞌuꞌx we utz o na utz ta ri kinaꞌoj.

¹⁶Kꞌo jun qꞌij echiriꞌ ri Dios kuya puqꞌabꞌ ri Qanimajawal Jesucristo kuqꞌat tzij pakiwi konoje; kꞌa ekꞌu riꞌ kaqꞌalajin na ronoje ri kꞌo pa kanimaꞌ ri tikawex, jelaꞌ pachaꞌ ri kubꞌiꞌij wa Utzilaj Tzij kantzijoj riꞌin.