Romanos 2:12-20

¹²Konoje kꞌu ri na jinta ketaꞌam puwi ri Tzij Pixabꞌ re ri Dios, na kaqꞌat ta tzij pakiwiꞌ e chirij ri kubꞌiꞌij wa Tzij Pixabꞌ. Na rukꞌ ta kꞌu riꞌ, we kemakunik, kasach na kꞌu kiwach. Noꞌj kꞌu ri ketaꞌam wa Tzij Pixabꞌ, we kemakunik, riꞌ kaqꞌat na tzij pakiwiꞌ e chirij ri kubꞌiꞌij wa Tzij Pixabꞌ.

¹³Ma ri e jusukꞌ chwach ri Dios na e ta ri xa e tanel re Rutzij Upixabꞌ; ma e ri e ꞌanal re, e waꞌ ri kaꞌan jusukꞌ chike.

¹⁴Noꞌj ri na e ta aj judiꞌabꞌ, tobꞌ na kitom ta ri Tzij Pixabꞌ re ri Dios, we kalax pa kanimaꞌ kakiꞌan ri kubꞌiꞌij wa Tzij Pixabꞌ, waꞌ e kꞌutubꞌal re kꞌo ketaꞌam puwi saꞌ ri chirajawaxik chike.

¹⁵Qꞌalaj kꞌu riꞌ kꞌo taqanik tzꞌibꞌital pa kanimaꞌ, ma kakinaꞌ chikikꞌuꞌx we utz o na utz ta ri kinaꞌoj.

¹⁶Kꞌo jun qꞌij echiriꞌ ri Dios kuya puqꞌabꞌ ri Qanimajawal Jesucristo kuqꞌat tzij pakiwi konoje; kꞌa ekꞌu riꞌ kaqꞌalajin na ronoje ri kꞌo pa kanimaꞌ ri tikawex, jelaꞌ pachaꞌ ri kubꞌiꞌij wa Utzilaj Tzij kantzijoj riꞌin.

¹⁷Chatape kꞌu ri kabꞌiꞌx chawe ri at kukꞌil ri e aj judiꞌabꞌ, riꞌat kakubꞌaꞌ akꞌuꞌx rukꞌ ri Tzij Pixabꞌ re ri Dios yey katakꞌabꞌaꞌ aqꞌij ma ri Dios kꞌo awukꞌ.

¹⁸Awetaꞌam kꞌu riꞌ saꞌ ri karaj ri Dios y saꞌ ri lik utz chwach Rire, ma Rutzij Upixabꞌ kukꞌut chawe saꞌ ri chirajawaxik wi kaꞌano.

¹⁹E chawach riꞌat, at kꞌamal kiwach ri e potzꞌ y at qꞌijsaq chikiwach ri kebꞌin pa qꞌequꞌm.

²⁰E chawach riꞌat, at qꞌilonel ke ri na jinta kakiriqo y at kꞌutunel ke ri e chꞌutiꞌq. E kachꞌobꞌ riꞌat kꞌo ronoje yaꞌbꞌal naꞌoj y qꞌijsaq awukꞌ, ma yaꞌtal ri Tzij Pixabꞌ paqꞌabꞌ.