Romanos 1:11-30

¹¹Rlagya̱ yap güi̱i̱ der par nu locyuuba̱ der nu de coz nu druu lo Espiriit Yon ni Ñgyoozh, gun orzeꞌ gyafert zir der nu nac de coz ni Crisht.

¹²Mod nu rne̱e̱ ii, nii nu locyuub na losaꞌn. Ya̱ locyuuba̱ de ru nu nac de coz nu ricy Crisht num ya̱, nunu de ru locyuub der ya̱ nu nac de coz nu ricy Crisht num de ru.

¹³Der bicy na, ya̱ rlagya̱ nu gad lagy der nu zañ tir bicy pe̱e̱ nu nyap güi̱i̱ der, tees mas gashtal dzi na wagad mod nu yapa̱. Rlagya̱ yapa̱, gun orzeꞌ zaꞌ lo̱ ñuu riiñ ni Crisht lat de ru, gal nu bicya̱ lat deꞌ zir de mbecy nu walab mbecy Israeel.

¹⁴Ya̱ yad ñi ne̱ nu shaala̱ riidz ni Crisht lo dela mbecy: mas lo de yu lily, nunu mas lo de mbecy riidz, mas lo de mbecy nu nap rad lagy, nunu mas gal lo de yu nu wagad lagy, tees yad ñi ne̱ nu shaala̱ riidz zeꞌ lo dey.

¹⁵Ndeꞌ nu ric la añ ne̱ nu shaala̱ de riidz nu sac ni Crisht lo de ru, mbecy nu yuꞌ Rom.

¹⁶Ya̱ wagat lo̱ nu nac de riidz nu sac ni Crisht, gun nu nac de riidz zeꞌ Ñgyoozh co mbañ mi de mbecy nu gyicy cup consuel lom. Nu loga la co mbañ mi de mbecy Israeel, tees niꞌ ziꞌl co mbañ mi de mbecy nu walab mbecy Israeel.

¹⁷Gun riidz zeꞌ ricy ñi nu gad lagy den lac mod ricy Ñgyoozh par nu gyanap den lom. Tub zi la nu nac nu gyicy cup den consuel lom, orzeꞌ gyanap den par lom. Gun lat de riidz ni de yu nu mnii por cuen nim rniiñ: “Yu nu gyanap par lo Ñgyoozh nu nac nu ricy cup yu consuel lom, orzeꞌ yu zeꞌ cui mbañ yu”, rniiñ.

¹⁸Rabee nu gal gyibaa gruu cashtig nu gzeed Ñgyoozh lat de mbecy nu ricy coz cyi, nunu lat de mbecy nu ricy coz a̱ꞌ nap nu losaꞌ, gun tonaꞌ la rzi lagy mi lo dey. De mbecy a̱ꞌ nap zeꞌ ricy dey nu wagac gad lagy de mbecy de coz rishli nim nu nac de coz a̱ꞌ nap nu ricy dey.

¹⁹Tees naal la rabee de coz nu gac gad lagy dey nim, gun laab mi pshaal mi ñii lo dey.

²⁰Gun de coz nim nu wac zac dey, gac gad lagy dey ñi nu nac nu rzac dey de coz nu psaꞌ lagy mi. Gaal zi nese nu bzub gyiꞌ gyishlombecy rad lagy dey nu mi zeꞌ nac mi Ñgyoozh, nunu rad lagy dey nu rila walazh fers nim. Rad lagy dey ndeꞌ nu nac de coz nu psaꞌ lagy mi. Ndeꞌ nu sac rishtoꞌ lo ni dey.

²¹Gun mas rguꞌ lo dey mi, tees waca lagy dey lom gal nu yad ñi nu gyicy dey lom, nunu ni wancuic dey gras nim. Lugaar nu gyicy dey ndeꞌ, ca nu guton too dey, nunu mnu shcab ni dey. Wangac nii too dey ca na coz nu nap.

²²Rnii dey nu nac yu mbecy nu yuꞌ lo, tees nac dey mbecy ton.

²³Pchaa dey gyel lily ni Ñgyoozh biñ nu rila wat. Orzeꞌ brugyiꞌ driib zily dey tub nab mbecy nu gat. Driib zily dey nab chigyiñ, driib zily dey nab bily, driib zily dey nab de bañcyug tap gyiꞌ. Dela ndeꞌ driib zily dey.

²⁴Nu nac de ndeꞌ, orzeꞌ bzaan Ñgyoozh nu ricy dey de lo la coz a̱ꞌ nap nu druu nañ lardooy. Bzaan mi nu ricy dey de lo la coz toꞌ lo nu losaꞌy.

²⁵Lugaar nu zuub gyidag dey de riidz rishli nim ca coz rguu rzuub gyidag dey. Driib zily dey de coz nu psaꞌ lagy mi, nunu rzu bich dey nu nac de coz zeꞌ. Ni ricy dey lugaar nu griib zily dey biñ nu psaꞌ lagy dela coz. Rlagy ñi gyabic den gyel mbecy nim par tub la. Laab ni gac ñii.

²⁶Par nu nac ndeꞌ, Ñgyoozh bzaan mi nu de coz toꞌ lo nu druu nañ lardoo dey chetib ic ñiy. Mas de biñ mñaa shiñ ricy dem. Lugaar nu dzeel mi yu gyeey mod nu rlagy ñi, ca nu losaꞌ mñaa dem ral mi.

²⁷Niꞌ ziꞌl de yu gyeey. Guca dey nu rdzeel dey biñ mñaa mod nu rlagy ñi. Ca nu ric la añ ni dey nu gal yu losaꞌ gyeey yu. Ricy dey coz toꞌ lo nu losaꞌ gyeey yu. Ub la dey rnuy cuerp ni ub yu nu nac de coz a̱ꞌ nap nu ricy yu. Ndeꞌ cashtig nu ricy cup dey.

²⁸Orzeꞌ Ñgyoozh bzaan mi nu byashiñ na shcab ni de mbecy, gun walagy dey caa ic yu de riidz rishli nim. Ndeꞌ nu ricy dey de coz nu a̱ꞌ yad ñi nu gyicy yu.

²⁹Dzi bded ruꞌ gaꞌ ricy dey de lo la coz a̱ꞌ nap. Shiñ ricy nu dey losaꞌy. Ye rzac dey lo coz ni losaꞌy. Rzat zi dey losaꞌy. Rasaap lagy dey nu nac losaꞌy. Rut dey losaꞌy. Deet rzuꞌ dey nu losaꞌy. Rguu dey losaꞌy. Ricy ras dey nuy losaꞌy. Ro dey rishcuen.

³⁰Rnii zi dey ni losaꞌy. Wayet lagy dey Ñgyoozh. Nac dey mbecy rnid ruꞌ. Nac dey mbecy leꞌ. Ricy zily dey ub yu. Rboo ic dey lac mod gyicy yu coz a̱ꞌ nap. Wacsuub gyidag dey ni de mbel niy.