Romanos 1:10-22

¹⁰Chṉaba' lao Diosen' goṉe' latje yedeṉa'a le'e še ca' chnalaže' gona', ḻe ba chac sša zelaža' yida'.

¹¹Chaclaža' yedeṉa'a le'e na' gwzejni'ichda' le'e cont soac̱hac̱hle šejnilaže'le Diosen'.

¹²Na' le'e len neda' soacho gonc̱hac̱hlaže' ḻježcho dan' chejnilaže'cho Jesucriston'.

¹³Beṉe' migw, che'nda' ṉezele zan ṉi'a ba goclaža' yida' yedeṉa'a le'e, perw biṉa' gac yedeṉa'a le'e. Chaclaža' yida' gona' xšin Diosen' gan zoale cont šanḻe gwzenagle c̱he Jesucriston' ca ba goc yezica'chle yež ga ba gwya'a.

¹⁴Ṉezda' cheyaḻa' gua' diža' güen c̱he Jesucriston' len yogo'ḻoḻ beṉe', beṉe' že' ciudan', na' beṉe' že' yix̱e', na' beṉe' chesac letr na' beṉe' cbi chesac letr.

¹⁵Da'nan' che'nchgüeda' gua' xtižen' len le'e že'le Roman' can' ba bian' ga yoble.

¹⁶Bi cheto'eda' gua' diža' güen c̱he Jesucriston', ḻe xtižen' nsan' yeḻa' guac c̱he Diosen' cont beṉe' chesejḻe' c̱hen gata' yeḻa' mban c̱hegaque' toḻi tocaṉe. Nsan' yeḻa' guac len neto' beṉe' Israel, na' ḻecze len le'e bi nacle beṉe' Israel.

¹⁷Na' diža' güen c̱he Jesucriston' chzejni'in chio' še beṉe' yesejnilaže' Jesucriston', Diosen' gone' ḻegaque' beṉe' güen, na' bi de bichle da' gac goncho cont gaccho beṉe' güen len ḻe'. Can' nyoj Xtiža' Diosen' žan: “Diosen' že' beṉe' chejnilaže' ḻe' naque' beṉe' güen len ḻe' na' gata' yeḻa' mban c̱he' toḻi tocaṉe.”

¹⁸Diosen' zoe' yaban' na' ba blo'ede' beṉac̱hen' toḻi tocaṉe yesesaca'zi' yogo' beṉe' cbi chesejnilaže' ḻe' na' chesone' da' xiṉj. Na' da' chesone' da' xiṉjen' bi chesaclaže' yesombia' beṉe' yoble diža' ḻi c̱he Diosen'.

¹⁹Na' Diosen' gone' yesezaca'zi'e, ḻe ba zjaṉezde' zoe' da' ba blo'ede' ḻegaque' can' ba benen'.

²⁰Bi chle'echo can' nac Diosen', na' bi chle'echo can' zoe' chnabi'e, perw ṉezecho de yeḻa' guac c̱he' can' bene' bx̱ie' yežlion', na' yogo' beṉac̱h chesele'ede' da' ca' ba bene'. Da'nan' bibi de da' yosode'e beṉac̱hen' yesene' bi zjaṉezde' še zoe'.

²¹Ḻa'czḻa' zjaṉezde' zoa Diosen', bi chesonxene' ḻe', ṉeca cheso'e yeḻa' chox̱clen c̱he'. Xbab c̱hegaquen' bibi zacan' na' zjanc̱hoḻ yic̱hjlažda'ogüen' yeḻa' bi chejḻe' c̱hegaquen'.

²²Chesene' zjanaque' beṉe' sina' perw chesone' xbab da' bibi zaca'.