Romanos 16:9-20

⁹Ti⁴ti²ˀntao³ je² Urbano xi³ ña³tjen⁴ si¹xa¹cao⁴-na¹ tˀa³-tsˀe⁴ Cristo Jesús, cao⁴ Estaquis, xi³ tsjoa³que⁴ an³.

¹⁰Ti⁴ti²ˀntao³ je² Apeles, xi³ nta³ ji³tjo³ tˀa³tsˀe⁴ Cristo. Ti⁴ti²ˀntao³ je² xi¹ncjin¹ Aristóbulo.

¹¹Ti⁴ti²ˀntao³ je² Herodión, xi³ xi²nquia⁴. Ti⁴ti²ˀntao³ je² xi¹ncjin¹ Narciso, xi³ tjio¹cao⁴ Nai³-na¹.

¹²Ti⁴ti²ˀntao³ je² Trifena, cao⁴ je² Trifosa, jña³-le⁴ xi³ nˀion¹ si¹xa¹ tˀa³tsˀe⁴ Nai³-na¹. Ti⁴ti²ˀntao³ je² Pérsida xi³ tsjoa³que⁴, je² xi³ cjai¹nca³ nˀion¹ qui³si³xa¹ tˀa³tsˀe⁴ Nai³-na¹.

¹³Ti⁴ti²ˀntao³ Rufo, xi³ Nai³-na¹ tsa³cja³ˀa¹jin³, cˀoa⁴ cao⁴ na⁴-le⁴ xi³ cˀoa⁴-ti⁴ na⁴-na⁴.

¹⁴Ti⁴ti²ˀntao³ je² Asíncrito, cao⁴ Flegonte, cao⁴ Hermas, cao⁴ Patrobas, cao⁴ Hermes, cˀoa⁴ cao⁴ je² ntsˀe³² xi³ tjio¹cao⁴ nca³ je².

¹⁵Ti⁴ti²ˀntao³ je² Filólogo, cao⁴ Julia, cao⁴ Nereo, cao⁴ nti³chja³, cao⁴ Olimpas, cao⁴ nca³tsˀi³ cho⁴ta⁴-le⁴ Cristo xi³ tjio¹cao⁴ nca³ je².

¹⁶Ti⁴ti²ˀntao³ xi²nquio⁴³ nca³ tsje³ tˀe²tˀa³tsˀoa³-lao⁴³ xi²-nquio⁴³. Nca³tsˀi³ cho⁴ta⁴-le⁴ Cristo si¹ti²ˀnta³-no³.

¹⁷Cˀoa⁴ vˀe³tsˀoa²³-no³ ntsˀe³, nca³ cho¹son²-ni³lao⁴³ je² xi³ si¹jao²ya³ xi¹ncjin¹, xi³ si¹ca³jnqui³ je¹ xi¹ncjin¹, co²ntran⁴-le⁴ je² cjoa⁴fa³ˀai³tsjen³ xi³ qui³cho²tˀa³yao³ nca³ jon². Chja⁴ˀa²xin²-lao⁴³ yao³-no³ nca³ je².

¹⁸Je² cho⁴ta⁴ xi³ cˀoa⁴cjoan³ a³li²coi³ Nai³-na¹ Jesucristo si¹xa¹tˀa³-le⁴ jo³-ni³ cho⁴ˀnta³, to⁴nca³ to⁴yao³-le⁴ si¹xa¹ntjai². Cjai¹ ntsjen¹ en¹ xi³ nchja⁴, cˀoa⁴ cjai¹nca³ ma³-le⁴ nchja⁴. Cˀoa⁴-sˀin² vˀa³na⁴cha⁴-le⁴ ni⁴ma⁴-le⁴ xi³ tsi²coi³ ve³.

¹⁹Nca⁴ jo³-sˀin² nca³ ni²tjo³son²³ jon²-vi⁴, cjai¹nca³ nˀion¹ nta³ ˀya³-le⁴ nca³tsˀi³. Coi³ nca³ cˀoa⁴²-sˀin² ma³, tsjoa³-na³ xi³ tˀa³tsaon⁴³, to⁴nca³ me³-na³ nca³ chji⁴ne⁴ coaon⁴³ tˀa³tsˀe⁴ xi³ nta³ tjin¹, to⁴nca³ nca³ ña³qui³ tsje³ coaon⁴³ tˀa³tsˀe⁴ xi³ chˀao³ tjin¹.

²⁰Cˀoa⁴ je² Ni³na¹ xi³ si¹qui³njen³nchˀan¹jin³-na¹ si⁴²xcoa⁴nti⁴ton⁴ Satanás ya⁴ nqui³ntso⁴co⁴ nca³ jon²-vi⁴. Je² cjoa⁴nta³-le⁴ Nai³-na¹ Jesucristo ca²ta³sˀe³-no³.