Romanos 16:7-23

⁷Andróniconba, Juníaswanba, nai misaameran ‘ka amøñigueh’ tan chirrunrrigay, kailan pønsraig yau merrarrawa keeriilø naba lincha pønrrabelø købelan. Truiløbe Cristo nøashib karua øriilø nømune tabelø mumera kui asiilø, katø nømbe Criston naguen køremøwatø, nømmerrig kørewa pønrrabelø, treelø køn.

⁸Señorweimburab nai undaaraig Ampliaswan ‘ka uñgu’ tan chirrunrrigay.

⁹Katø Cristoi maramigu namun lincha marøb megabig Urbanonba, katø nai undaaraig Estaquiswanba ‘ka amøñigueh’ tan chirrunrrigay.

¹⁰Apeles, Cristoimburabigu chine nebuinab puraya møwanba, katø Aristóbuloi yauelanba ‘ka amøñigueh’ tan chirrunrrigay.

¹¹Nai misag Herodiónwanba, Narcisoi yauelø Señorwan kørewa pønrrabelanba ‘ka amøñigueh’ tan chirrunrrigay.

¹²Señorwei maramigu truba marøb melabelø Trifenanba, Trifosanba ‘ka amøñigueh’ tan chirrunrrigay, katø Pérsida, truba undaaraig, tru Señorwei maramigu truba truba marøb megabigwanba.

¹³Señorweinug purø tabig kui asig Rufonba, nui usranba ‘ka amøñigueh’ tan chirrunrrigay, pøs truibe nai usri lataig kuig køn.

¹⁴Asíncriton køben, Flegonten køben, Hermeswan køben, Patrobaswan køben, Hermaswan køben, katø nunelø nømba warabelan køben ‘ka amøñigueh’ tan chirrunrrigay.

¹⁵Katø ‘ka amøñigueh’ tan chirrunrrigay Filólogon køben, Julian køben, Nereowan køben, katø nui nuchawan køben, Olimpaswan køben, katø tru nømba warabelø mayeelø Tiuswei misaameran købengue.

¹⁶Kangurrin kangurri ‘ka amøñigueh’ chib tabig wamab Tiuswei undag købiitøga tasig traniyay. Cristoi iglesiamerabe mayamba ñimun ‘ka amøñigueh’ cha øran.

¹⁷Pøs nabe ñim, nai nunelan, ashiptø kønrrigay chinrrab inchar ñimun nøørøtø misrtrai indamba, Cristoi maywan søtøbønrramisramba inchibelan. Truiløbe tru ñimun kusrenanigwan ka peemaytø punrrai marøbelø køn. Ñimbe truilane tarømisray.

¹⁸Kaguende treeg misaamerabe namui Señor Cristoiwan marmeelø køn. Treeg kømøtø, ka nømuimburaptø tab kønrrai labelø kua, waminchibgucha purø tabzhig wamincha, mørøptø wamdiig tabzhig wamincha, chigucha trunun nebua ashmø misaazheelan kegørrøsrkøbelø køn.

¹⁹Pøs tru tabig srø wam maig taigwan ñim møra marøbelø kuigwane mayeeløba nebua asha køn. Treekkurri nane ñimuimburab truba kasrag køtan. Inchendø ñimbe chigøben tabigwane purø nu kusrebelø, kaigwane kan isubguen isumeelø kuimbe køtan.

²⁰Inchen Tius tru chi isumgaig tab købiibe kan maya yanayutø Satanáswane nøbe tambalørtrun ñim itøbuna pønrrønrrai. Namui Señor Jesúswei ka yandø tab indiibe ñimba kønrrun.

²¹Timoteo, maramigu nan lincha marøb megabig, ñimune ‘ka amøñigueh’ cha øran, katø trugurri tru nammisaamera Lucio køben, Jasón køben, Sosípater køben, truiløgucha.

²²Na, Tercio, Pabloi kilga pørøbikkucha ‘ka amøñigueh’ cha ørar, Señorwei munchiyu.

²³Gayogucha ñimun ‘ka amøñigueh’ cha øran, tru nan truyu tsumig ya pebøb, katø iglesia mayeelanba pebøb inchibig. Inchen katø Erasto tru ciudayu an asamigwan nø ashibiiba, katø trugurri namui nuneg Cuartogucha ‘ka amøñigueh’ cha øran.