Romanos 16:5-22

⁵Yaꞌa alaq rutzil kiwach konoje ri hermanos ri kakimol kibꞌ pa kocho ri Aquila y ri Priscila. Yaꞌa alaq rutzil uwach ri Epeneto, ri lik kꞌax kannaꞌo, ma e rire ri nabꞌe xukoj rubꞌiꞌ ri Cristo wara Acaya.

⁶Yaꞌa alaq rutzil uwach ri María, ri lik chakuninaq chixoꞌlibꞌal alaq.

⁷Yaꞌa alaq rutzil kiwach ri Andrónico y ri Junias; ri e watz-nuchaqꞌ yey xekꞌojiꞌ junam wukꞌ pa cárcel. Rike lik kaloqꞌox kiqꞌij chiqaxoꞌl ri oj utaqoꞌn ri Jesús, yey rike xkikoj rubꞌiꞌ ri Cristo nabꞌe chinuwach riꞌin.

⁸Yaꞌa alaq rutzil uwach ri Amplias, jun hermano lik kꞌax kannaꞌ chupa rubꞌiꞌ ri Qanimajawal.

⁹Yaꞌa alaq rutzil uwach ri Urbano; rire e jun qachbꞌiꞌil pa ruchak ri Cristo. Yaꞌa alaq rutzil uwach ri Estaquis, jun hermano lik kꞌax kannaꞌ riꞌin.

¹⁰Yaꞌa alaq rutzil uwach ri Apeles, ri lik ukꞌutum ri kubꞌulibꞌal ukꞌuꞌx rukꞌ ri Cristo. Yaꞌa alaq rutzil kiwach konoje ri e kꞌo pa rocho ri Aristóbulo.

¹¹Yaꞌa alaq rutzil uwach ri watz-nuchaqꞌ Herodión. Yaꞌa alaq rutzil kiwach konoje ri e kꞌo pa rocho ri Narciso, ri kikojom rubꞌiꞌ ri Qanimajawal.

¹²Yaꞌa alaq rutzil uwach ri Trifena y ri Trifosa; rike lik kiyaꞌom kibꞌ pa ruchak ri Qanimajawal. Yaꞌa alaq rutzil uwach ri Pérsida, ri lik kꞌax kanaꞌik yey lik chakuninaq pa ruchak ri Qanimajawal.

¹³Yaꞌa alaq rutzil uwach ri Rufo; waꞌ e jun hermano lik chom rubꞌinik usilabꞌik chwach ri Qanimajawal. Yey yaꞌa alaq rutzil uwach ruchu, ma rire uꞌanom pachaꞌ nuchu riꞌin.

¹⁴Yaꞌa alaq rutzil kiwach ri Asíncrito, ri Flegonte, ri Hermas, ri Patrobas, ri Hermes y ri jujun chik hermanos e kꞌo kukꞌ rike.

¹⁵Yaꞌa alaq rutzil kiwach ri Filólogo y ri Julia, ri Nereo rukꞌ ri ranabꞌ yey ri Olimpas kukꞌ konoje rutinamit ri Dios e kꞌo kukꞌ rike.

¹⁶Yaꞌa rutzil wach alaq chiwach alaq rukꞌ jun saqil tzꞌubꞌuj chiꞌaj chwach ri Dios. Konoje ri hermanos wara re pa taq riglesias re ri Cristo kakiya pan rutzil wach alaq.

¹⁷Lik kꞌu kantzꞌonoj che alaq hermanos, e lik kachajij ibꞌ alaq chikiwach ri kakijach upa riglesia y kakikoj tzaqibꞌal chirij ri saqil kꞌutunik chaꞌ e kꞌo jujun chik na kakikoj ta ri kꞌulum chi ralaq. Chikij kꞌu waꞌ, chesaj ibꞌ alaq;

¹⁸ma na e ta kitaqem ri Cristo, e lik kitaqem ri kirayibꞌal rike. Ri kichꞌaꞌtem lik chakojoꞌ y lik chom katatajik, pero rukꞌ waꞌ kekisok ri tikawex na jinta ko kinaꞌoj.

¹⁹Lik kꞌut etaꞌmatal chi kuma konoje e lik taqem alaq ri saqil kꞌutunik, y lik kinkiꞌkot che alaq ruma waꞌ. Yey ri kuaj che alaq e lik kꞌola naꞌoj alaq che uꞌanik ri utz, na che ta uꞌanik ri na utz taj.

²⁰Ekꞌu ri Dios, ri aj yaꞌl utzil chomal, na kamayin ta che kuyiqꞌilibꞌej uwiꞌ ri Satanás chuxeꞌ ri aqan alaq; ma e kuya che alaq ri kachꞌij alaq uchuqꞌabꞌ ri Satanás. Kꞌulu kꞌu alaq ri unimal rutzil ukꞌuꞌx ri Qanimajawal Jesucristo.

²¹Kuya pan rutzil wach alaq ri Timoteo, ri wachbꞌiꞌil pa ruchak ri Cristo. Jenelaꞌ kakiya pan rutzil wach alaq ri e watz-nuchaqꞌ Lucio, ri Jasón y ri Sosípater.

²²Yey riꞌin in Tercio, ri kintajin che utzꞌibꞌaxik waꞌ wa carta e chirij ri kubꞌiꞌij ri Pablo che alaq, kanya pan rutzil wach alaq pa rubꞌiꞌ ri Qanimajawal.