Romanos 16:20-26

²⁰Ekꞌu ri Dios, ri aj yaꞌl utzil chomal, na kamayin ta che kuyiqꞌilibꞌej uwiꞌ ri Satanás chuxeꞌ ri aqan alaq; ma e kuya che alaq ri kachꞌij alaq uchuqꞌabꞌ ri Satanás. Kꞌulu kꞌu alaq ri unimal rutzil ukꞌuꞌx ri Qanimajawal Jesucristo.

²¹Kuya pan rutzil wach alaq ri Timoteo, ri wachbꞌiꞌil pa ruchak ri Cristo. Jenelaꞌ kakiya pan rutzil wach alaq ri e watz-nuchaqꞌ Lucio, ri Jasón y ri Sosípater.

²²Yey riꞌin in Tercio, ri kintajin che utzꞌibꞌaxik waꞌ wa carta e chirij ri kubꞌiꞌij ri Pablo che alaq, kanya pan rutzil wach alaq pa rubꞌiꞌ ri Qanimajawal.

²³Ri Gayo kuya pan rutzil wach alaq; rire inukꞌulum pa rocho y uyaꞌom chike konoje ri hermanos ri e aj wara kakimol kibꞌ pa rocho. Jenelaꞌ kuya pan rutzil wach alaq ri Erasto, ri aj kꞌolol puaq re wa tinamit; jenelaꞌ ri hermano Cuarto kuya pan rutzil wach alaq.

²⁴Ri unimal rutzil ukꞌuꞌx ri Qanimajawal Jesucristo kꞌola ukꞌ onoje alaq. Amén.

²⁵Qayaka kꞌu uqꞌij ri Dios, ri kꞌo puqꞌabꞌ kutikibꞌaꞌ alaq chi utz chupa ri Utzilaj Tzij re ri Qanimajawal Jesucristo, ri nutzijom loq. Waꞌ e puwi ri na uqꞌalajisam ta lo ri Dios ojertan,

²⁶yey ekꞌu woꞌora xqꞌalajisax chiqawach. Jekꞌulaꞌ kaqꞌalajin chi utz ri tzꞌibꞌital kan puwi ri Qꞌijsaq chupa Ruchꞌaꞌtem ri Dios kuma ri qꞌalajisanelabꞌ. Ri Dios, ri na jinta utaqexik rukꞌaslemal, e xtaqan che katzijox ri Qꞌijsaq puwi ri Cristo chike konoje rukꞌiyal kiwach taq ri tikawex e kꞌo che ruwachulew. Xuꞌan kꞌu waꞌ chaꞌ rike kaketaꞌmaj wa Qꞌijsaq, kakikoj utzij Rire y kakubꞌiꞌ kikꞌuꞌx rukꞌ.