Romanos 12:7-17

⁷Na' še Diosen' ba none' c̱hecho gaclencho beṉe', cheyaḻa' gaclencho ḻegaque'. Na' še ba none' c̱hecho gwsed gwlo'echo beṉe', cheyaḻa' gwsed gwlo'echone'.

⁸Na' še Diosen' ba none' c̱hecho ṉeyoecho beṉe' cont yesone' da' güen, cheyaḻa' ṉeyoechone'. Na' še ba none' c̱hecho gwnežjwcho da' chyažje beṉe', cheyaḻa' gwnežjwchon do yic̱hj do laže'cho. Na' še ba none' c̱hecho gaccho beṉe' blao na' güia ṉa' ḻjež chio' chonxenchone', cheyaḻa' cue' yic̱hjcho güia ṉa'cho ḻegaque'. Na' še ba none' c̱hecho yeyaše'cho no beṉe' yaše', no beṉe' gole o no beṉe' güe', cheyaḻa' yebecho gaclenchone'.

⁹Cheyaḻa' gaque ḻjež beṉac̱hcho do yic̱hj do laže'cho, na' cheyaḻa' gue'echo da' malen' na' soaczcho goncho da' nac da' güen.

¹⁰Ca chaque biše' goljcho, ca'cze cheyaḻa' gaquecho note'teze beṉe' ḻježcho na' gonchone' beṉe' xench ca cuincho.

¹¹Bi gaccho beṉe' xagüed, san goncho da' non Diosen' chio' goncho do yic̱hj do laže'cho, ḻe chonxencho X̱ancho Jesucriston' len dan' chonchon'.

¹²Cheyaḻa' yebecho da' ṉezecho šjayzoacho len Diosen'. Cheyaḻa' gwyo gwc̱hejcho cate' chyi chzaca'cho. Na' ḻecz cheyaḻa' yoḻ güižcho Diosen' zan ṉi'a yogo' ža.

¹³Cheyaḻa' gaclencho beṉe' ḻježcho beṉe' chesejnilaže' Diosen' še bi da' cheseyažjde' na' gwlebchone' ližcho še zjanaque' beṉe' zito'.

¹⁴Cheyaḻa' ṉabcho lao Diosen' gac güen c̱he beṉe' chosoc̱hi chososaca' chio'. Ṉabcho gac da' güen c̱hegaque', gague da' mal.

¹⁵Cheyaḻa' yebecho txen len beṉe' chesyebe na' cuežcho txen len beṉe' chesebež.

¹⁶Yogo'cho cheyaḻa' goncho toze xbab. Bi cheyaḻa' ga'laže'cho, san yoḻ güižcho beṉe' yaše' beṉe' bibi chac na' bi gon cuincho beṉe' sina'.

¹⁷Še bi da' mal chone beṉe' chio', bi ṉacho ḻecze da' mal yebi'icho len ḻe'. Cheyaḻa' cue' yic̱hjcho goncho da' güen cont yesena beṉe' ḻe naczen güen dan' chonchon'.