ROMANOS 12:2-8

²Ndlyazen ne'tolode tyoo lezo' gu' no gab gu' loo lezo' gu' li gu' cón che'n co' nac xab izlyo'. Ndxe'leque', fse' gu' xtùuz gu' par que tee ban gu' tedib mod co' nac co' neete lezo' Diox. Tataa mod ta' gu' cuent cón nac co' nee lezo' Diox li gu', co' nee di's, nac con' ndac, no con' co' ndxòo lezo' Diox, no con' co' nac con' nalì no con' nambìi loo Diox.

³Por cón che'n zin' co' nac thìb con' ndac co' mxo'f zin' Diox loon, ngue niin loo ryete gu': Indlyasten le' nec thìb gu' li masre' xtùuz cón che'n gu' leque co' ndxàal li gu' xtùuz cón che'n gu' par ne'tye'ste gu'. Ndxe'leque', bli thìb thìb gu' xtùuz cón che'n leque gu' no cón che'n hues xtàa gu' par ñèe gu' ñeene' ¿ché' nac gu' mèn roo mèn xèn loo Diox o ché' nac gu' mèn be'the loo Diox? xal nac mod co' ndxàp gu' no co' ndxela's gu' loo Diox xalte nac mod co' mblyath no Diox gu' par ndxàp gu' yalxla's loo Diox.

⁴Gu' naneeque' no nonque' gu' xal nac lad chol na'. Xà' nac ya' na'. Xà' nac nii na'. No xà' nac taamas con'. Nii na' no ya' na' no taamas con' indlide sirv loo na' par lii thìb loote con'.

⁵Tataaque' nac na', ne, na' co' ndxela's loo Crist. Mastale' huax mèn nac na', nac na' xal thidte lad Crist. Tataaque' mod nac ryete na', na' co' thidte ngòc loo Crist, thidte nac thìb na' no tedib na' loo cón che'n Crist xal nac ladpe' mèn.

⁶Diox ndli loo na' co' ndxela's loo Diox por cón che'n Crist xà' xà' nac co' ndxác na' li na' loo cón che'n Diox xal ndlya's Diox li thìb thìb na'. Ndxàal xo'f zin' na' zin' co' ndlu' Diox loo thìb thìb na' xal ndlya's Diox li thìb thìb na' zin'. Chele' Diox mbli ndxác ndxep na' co na' yalbàn cón che'n Diox, ndxàal co na' yalbàn cón che'n Diox xalque' nac mod co' ndxàp na' yalxla's loo Diox.

⁷Lomisque', ngue niin loo gu', ne: Chele' Diox mbli nac na' mèn co' xo'f zin' ndac thìb zin' co' nac par lyath no na' xtàa na', ndxàal lyath no ndac na' xtàa na'. Lomisque' ne, chele' Diox mblec ndxep na' par lu' na' loo hues xtàa na', ndxàal lu' ndac na' loo hues xtàa na' cón che'n Tad Diox.

⁸Lomisque', ngue niin loo gu', ne: Na' co' mblec Diox no mbli Diox par ndxác na' li na' par ye'th lezo' mèn, no tegán na' lezo' mèn loo cón che'n Diox, ndxàal li na'i xal ndxàala. Le' mèn co' ndryo' lezo' angta' mèn con' co' ndryo' lezo' mèn ta' mèn càa mèn co' nde che con' loo, ta' mèna con gust no con dib nzo yéc mèn no con dib nzo lezo' mèn. Ne'cuez nguixte mèn cón che'na yiloa. Le' mèn co' ndyoo ner no co' ndyoo naa loo xtàa na, leque mèna hui' loo mèn xá mod ndyoo ner mèn no xá mod ndyoo naa mèn loo xtàa mèn par ryo' loo con' ndac cón che'n Diox por con' ndli mèna. Le' mèn co' ndryo' lezo' lyath no mèn co' naquin con' no mèn co' ndyac yaltìi, lyath no mèn mèna con gust no con guyith guxìis.