Romanos 11:4-34

⁴Sa̱a̱ tꞌo̱ Tyꞌo̱o̱tsꞌom nnoom, tso: “Tiñencuꞌ cwimaꞌndiinaꞌ, ee mꞌaⁿ ntquieeꞌ meiⁿ nnꞌaⁿ na jnda̱ tjeiiꞌndyo̱ cwentaya na tyootaꞌ cantye jo nnom tyꞌo̱o̱ Baal.”

⁵Ndoꞌ majoꞌti jeꞌ, ncꞌe naya na matseixmaⁿ Tyꞌo̱o̱tsꞌom, maꞌndiinaꞌ cwii tmaaⁿꞌ chjoo na macwjiiꞌñê cwentaaⁿꞌaⁿ.

⁶Ndoꞌ xeⁿ cantyja ꞌnaaⁿꞌ naya na matseixmaⁿ Tyꞌo̱o̱tsꞌom, joꞌ na cwicaluiꞌnꞌmaaⁿndyena, quia joꞌ nchii cwiluii na ljoꞌ ncꞌe chiuu na cwilꞌa nquieena. Ee xeⁿ naljoꞌ, juu naya na matseixmaaⁿ na cweꞌ yu, tixocatseixmaⁿnaꞌ naya.

⁷Luaa waa ñꞌoomwaaꞌ. Majndyendyeti nnꞌaⁿ Israel tîcatoꞌñoomna naya na matseixmaⁿ Tyꞌo̱o̱tsꞌom na tyolꞌueena, macanda̱ ntꞌomndye joona na tjeiiꞌñe Tyꞌo̱o̱tsꞌom toꞌñoomna joꞌ. Sa̱a̱ ntꞌomndye joona sꞌaanaꞌ na quieꞌ nꞌomna.

⁸Tjaa chiuu xuiiꞌ chaꞌna matso Isaías: “Na Tyꞌo̱o̱tsꞌom tquiaaⁿ na tjoomna, sꞌaanaꞌ chaꞌna tsꞌaⁿ na ñeꞌcatsoo cha meiiⁿ na niom nꞌom nda̱a̱na sa̱a̱ titquioona, ndoꞌ meiiⁿ na niom luaꞌquina sa̱a̱ ticandyena ndoꞌ luaaꞌ cwitjoomna hasta xjeⁿ jeꞌcheⁿ.”

⁹Mati seineiⁿ David cantyja ꞌnaaⁿna, tsoom: Majoo nantquie na cwicwaꞌna catseicwaqueⁿnaꞌ teiⁿncoꞌ na nntseityuuꞌnaꞌ joona, ndoꞌ mañequio joonaꞌ cwiꞌtyꞌuiina cha na catioomndyena natia na cwilꞌana.

¹⁰Catsꞌaanaꞌ ñꞌeⁿndyena chaꞌcwijom nnꞌaⁿ na ꞌoowinchjaaⁿ na tileicantyꞌiaa. Catsꞌaanaꞌ na ñequiiꞌcheⁿ catseijomnaꞌ joona chaꞌcwijom tsꞌaⁿ na jaaꞌ xuuꞌ na jndaꞌjom ntyjo̱ wjaa.

¹¹Quia joꞌ ¿chiuu waa na calaꞌno̱o̱ⁿꞌa na luaaꞌ waa? ¿Aa ñeꞌcatsonaꞌ na ticjaañjoomꞌ lꞌa nnꞌaⁿ judíos, joꞌ cha wjaachuunaꞌ joona na nntsuundyena? Jeeⁿ nchii joꞌ. Ncꞌe na jlaꞌtjo̱o̱ndyena na tîcalaꞌyuꞌna ñꞌeⁿ Tyꞌo̱o̱tsꞌom, joꞌ chii tjuꞌnaaⁿñeyuunaꞌ na nluiꞌnꞌmaaⁿndye ntꞌomcheⁿ nnꞌaⁿ na tachii judíos. Tuii na luaaꞌ cha mati catseiqueeⁿnaꞌ nꞌomna na nlaꞌxmaⁿna chaꞌna nnꞌaⁿ na cwiluiindye cwentaaꞌ Tyꞌo̱o̱tsꞌom.

¹²Xeⁿ juu na jlaꞌtjo̱o̱ndye nnꞌaⁿ judíos mañequiaanaꞌ na nluiꞌnꞌmaaⁿndye nnꞌaⁿ tsjoomnancue ndoꞌ juu na ticjaacañjoomꞌ na lꞌana seijndaaꞌñenaꞌ na waa naya ꞌnaaⁿ nnꞌaⁿ na nchii tsjaaⁿ joona, quia joꞌ juu xjeⁿ na nncꞌooquieꞌnndaꞌna cantyja ꞌnaaⁿꞌ Tyꞌo̱o̱tsꞌom, cwanti tꞌmaⁿti naya nntseixmaⁿnaꞌ.

¹³Ncꞌe na matyꞌiom Tyꞌo̱o̱tsꞌom tsꞌiaaⁿ ja jo nda̱a̱ nnꞌaⁿ tsjaaⁿ na cwiluiindyoꞌ, macwjiiꞌa cwenta na jeeⁿ jnda tseixmaⁿ juunaꞌ.

¹⁴Queeⁿ tsꞌo̱o̱ⁿya na catsꞌaanaꞌ na ticjaaweeꞌ nꞌom nnꞌaⁿya na ñeꞌcwii tsjaaⁿ quio tuiindyo̱ na macanda̱ ꞌo cwicaluiꞌnꞌmaaⁿndyoꞌ ndoꞌ catseiqueeⁿnaꞌ nꞌomna na mati joona cwjiꞌnꞌmaaⁿñe Tyꞌo̱o̱tsꞌom.

¹⁵Ee xeⁿ cantyja ꞌnaaⁿꞌ na ꞌndiinaꞌ nnꞌaⁿ judíos, tjuꞌnaaⁿñenaꞌ na joo nnꞌaⁿ tsjoomnancue nljoyaandyena jo nnom Tyꞌo̱o̱tsꞌom, cꞌoomꞌ nꞌomꞌyoꞌ chiuu nntsꞌaanaꞌ quia na jnda̱ tjuꞌnaꞌ na cwiluiindyenndaꞌna cwentaaⁿꞌaⁿ. Na nluii na luaaꞌ, nntseijomnaꞌ cantyja ꞌnaaⁿna chaꞌcwijom tsꞌaⁿ na wandoꞌxco na jnda̱ tueꞌ.

¹⁶Ee xeⁿ juu tsqueeⁿtyooꞌ na cwineiiⁿjndyee cwiluiiñenaꞌ na ljuꞌnaꞌ, maꞌmo̱ⁿnaꞌ na mati chaꞌwaa tsqueeꞌñeeⁿ ljuꞌnaꞌ. Ndoꞌ mati nchꞌiooꞌ tsꞌoom, xeⁿ maqueⁿ ljuꞌnaꞌ joonaꞌ, mati chatso lꞌo̱ tsꞌoom jnda̱ tqueⁿljuꞌnaꞌ.

¹⁷Sa̱a̱ xeⁿ ntꞌom lꞌo̱ tsꞌoom olivo xiomꞌ, jnda̱ jndiiꞌnaꞌ ndoꞌ ꞌu jeꞌ na matseijomnaꞌ ꞌu chaꞌna tsꞌoom olivo jnda̱a̱, jnda̱ ñjoomꞌndyuꞌ quiiꞌntaaⁿ lꞌo̱ tsꞌoom olivo xiomꞌ, ndoꞌ na ljoꞌ macwjaaꞌñenaꞌ ꞌu cantyja ꞌnaaⁿꞌ nchꞌiooꞌ tsꞌoomꞌñeeⁿ ndoꞌ ndaaꞌ juunaꞌ mañequiaanaꞌ na wjaanajnduꞌ.

¹⁸Sa̱a̱ tincꞌoomꞌ tsꞌomꞌ na ꞌu cwiluiitꞌmaⁿndyuꞌtiꞌ nchiiti lꞌo̱ nquii tsꞌoom. Ee xeⁿ na nntsꞌaanaꞌ na ljoꞌ ntyjiꞌ, cjaañjoomꞌ tsꞌomꞌ na nchii ꞌu cwiluiindyuꞌ nchꞌiooꞌ tsꞌoom na mañequiaaꞌ na jnda̱ lꞌo̱naꞌ, nchꞌiooꞌnaꞌ cwiñequia na jnda̱ lꞌo̱naꞌ.

¹⁹Nntsꞌaacheⁿnaꞌ na nntsuꞌ: “Mayuuꞌ na ljoꞌ, sa̱a̱ ncꞌe na jndiiꞌ lꞌo̱ tsꞌoom olivoꞌñeeⁿ, joꞌ chii ñjoomꞌndyo̱ ja.”

²⁰Mayuuꞌ na ljoꞌ. Jndiiꞌñenaꞌ joona ncꞌe na ticalaꞌyuꞌya nꞌomna, ndoꞌ ꞌu tyeⁿ meiⁿntyjeꞌ na matseiyuꞌya tsꞌomꞌ. Joꞌ chii tintseisꞌandyuꞌ ndoꞌ tintseiscundyuꞌ, yati cꞌoomꞌ na nquiaꞌ.

²¹Ee xeⁿ tîcatseitꞌmaⁿ tsꞌom Tyꞌo̱o̱tsꞌom lꞌo̱ nquii tsꞌoomꞌñeeⁿ, majndeiiticheⁿ cweꞌ ꞌu.

²²Cantyꞌiaꞌ chiuu tꞌmaⁿ tsꞌom Tyꞌo̱o̱tsꞌom ndoꞌ mati jeeⁿ ñecwii ñꞌoom jom. Cantyja na ñecwii ñꞌoom jom, joꞌ na seiquiaanaꞌ naⁿꞌñeeⁿ. Sa̱a̱ ñequiondyuꞌ ꞌu yatsꞌaⁿñê. Queⁿndyuꞌ na nntsaꞌ yuu na lꞌue tsꞌoom ee xeⁿ tjaa joꞌ mati ꞌu nntseiquioonaꞌ.

²³Mati nnꞌaⁿ judíos na tiñeꞌcalaꞌyuꞌ ñꞌeⁿ Jesucristo, xeⁿ nncueꞌntyjo̱ na nlaꞌyuꞌna ñꞌeⁿñê, nnda̱a̱ nntsꞌaa Tyꞌo̱o̱tsꞌom na nntseicañjoomꞌnnaaⁿꞌaⁿ joona, ee waa na jneiⁿ na nnda̱a̱ nntseicañjoomꞌnnaaⁿꞌaⁿ joona.

²⁴Ee ꞌu na nchii tsꞌaⁿ judío cwiluiindyuꞌ, xeⁿ na matseijomnaꞌ ꞌu chaꞌna tsꞌoom olivo jnda̱a̱, sa̱a̱ jnda̱ ñjoomꞌndyuꞌ tsꞌoom olivo xiomꞌ, meiiⁿ na tiquiluii na ljoꞌ, majndeiiticheⁿ cantyja ꞌnaaⁿ nnꞌaⁿ judíos, tijndeiꞌnaꞌ na nñjoomꞌndyenndaꞌna manquiiti tsꞌoom olivo xiomꞌ na laꞌxmaⁿna.

²⁵ꞌO nnꞌaⁿya na cwilaꞌyuꞌyoꞌ, lꞌue tsꞌo̱o̱ⁿya na caliuꞌyoꞌ ñꞌoomwaa na wantyꞌiuuꞌ waanaꞌ, cha tintsꞌaanaꞌ ndooꞌ nquiuꞌyoꞌ na jeeⁿ jndo̱ꞌ nꞌomꞌyoꞌ. Ntꞌom nnꞌaⁿ judíos cwilaꞌquieꞌ nꞌomna cantyja ꞌnaaⁿꞌ Jesucristo hasta xjeⁿ na nntseicanda̱a̱ꞌñenaꞌ lojoo nnꞌaⁿ na cwilaꞌyuꞌ ñꞌeⁿ jom na nchii cwiluiindyena tsjaaⁿ nnꞌaⁿ judíos.

²⁶Quia na jnda̱ tuii nmeiⁿꞌ, chaꞌtsondye nnꞌaⁿ judíos nluiꞌnꞌmaaⁿndyena chaꞌxjeⁿ na matso ñꞌoomꞌ Tyꞌo̱o̱tsꞌom na seiljeii Isaías: Naquiiꞌ tsjoom Sión nnaⁿ tsaⁿ na nntseicandyaañe nnꞌaⁿ ndoꞌ nnꞌaⁿ na jndyowicantyjooꞌ tsjaaⁿ ꞌnaaⁿꞌ Jacob nnquindyo̱ natia na laꞌxmaⁿna.

²⁷Quia na nntseicanduuꞌa jnaaⁿna quia joꞌ nntseicanda̱a̱ꞌñenaꞌ ñꞌoom na tꞌmaⁿtya̱a̱ⁿya ñꞌeⁿndyena.

²⁸Ncꞌe ñꞌoom naya na macwjiꞌnꞌmaaⁿñe Tyꞌo̱o̱tsꞌom nnꞌaⁿ, joꞌ na mꞌaⁿntiaaꞌndye nnꞌaⁿ judíos ñꞌeⁿñê, ndoꞌ na luaaꞌ sꞌaanaꞌ, tjuꞌnaaⁿñenaꞌ na cwitsaaquieeꞌndyoꞌ ꞌo. Sa̱a̱ ndicwaⁿ mꞌaaⁿ na wiꞌ tsꞌoom joona na tjeiiꞌñê weloona na nluiindye cwentaaⁿꞌaⁿ.

²⁹Ee quia na jnda̱ tquiaa Tyꞌo̱o̱tsꞌom cwii nnom na macandaaꞌ tsꞌaⁿ ndoꞌ na maqueeⁿꞌñê juu na nntseixmaⁿ cwentaaⁿꞌaⁿ taxocatseichueeⁿꞌeⁿ joꞌ.

³⁰Ee chaꞌxjeⁿ na ñetꞌomꞌyoꞌ na ñejlaꞌquieꞌ nꞌomꞌyoꞌ nnom Tyꞌo̱o̱tsꞌom, jeꞌ mañꞌoom na wiꞌ tsꞌoom ꞌo, sa̱a̱ jeꞌ jeꞌ nnꞌaⁿ judíos cwilaꞌquieꞌ nꞌomna nnoom.

³¹Maluaaꞌ matseijomnaꞌ cantyja ꞌnaaⁿna. Jeꞌ cwilaꞌquieꞌ nꞌomna cha nda̱nquia nncꞌoom Tyꞌo̱o̱tsꞌom na wiꞌ tsꞌoom joona, chaꞌxjeⁿ jeꞌ mꞌaaⁿ na wiꞌ tsꞌoom ꞌo.

³²Ee sꞌaa Tyꞌo̱o̱tsꞌom na chaꞌtsondyo̱ laꞌxmaaⁿya na tyoolaꞌcanda̱a̱ꞌndyo̱ jo nnoom, cha na chaꞌtsondyo̱ nncꞌoom na wiꞌ tsꞌoom.

³³Joo na maqueⁿnaꞌ Tyꞌo̱o̱tsꞌom na tyañe, jeeⁿ jnda laxmaⁿnaꞌ, jeeⁿ jndo̱ꞌ tsꞌoom, chaꞌtso matseiꞌno̱o̱ⁿꞌo̱ⁿ. Tjaa ꞌñeeⁿ nntseinchuꞌtcuuñe chiuu matseijndaaꞌñê, tjaa ꞌñeeⁿ nnda̱a̱ nntseiꞌno̱ⁿꞌ ljoꞌ na machꞌeeⁿ.

³⁴Chaꞌna teiljeii ñꞌoom na tso Isaías: “¿ꞌÑeeⁿ cwii jaa nmeiiⁿñe nnda̱a̱ nntseino̱ⁿꞌ chiuu mꞌaaⁿꞌ tsꞌom nqueⁿ na matsa̱ꞌntjoom? ¿Aa mꞌaaⁿ ꞌñeeⁿ juu na jeeⁿcheⁿ jndo̱ꞌ tsꞌom cha na nnda̱a̱ nntseijndo̱ꞌ tsꞌoom?