ROMANOS 11:3-36

³Tátā Yaā Dios, ni cajehni i tāca tée cánacani jnūhun ní, te ni cajenu i tācá altar ní. Te máñúhún na sāña ní quendōo, te vijna suni cácuni i cahni i sāña, áchí de.

⁴Te Yaā Dios ni nastíó cuɨ́ñɨ́ yā: Iyó nahín úxā mil ñayuu cácandíje ruhū jeē tu ní cájecuɨñɨ̄ yɨtɨ́ i nuū ídolo naní Baal, achí yá.

⁵Te suni súcuan vijna, chi íyó jecu na ñayuu jeē ní nacāji ya sɨquɨ̄ jeē váha ni yā jiín i.

⁶Te núu ni nacāji ya i sɨquɨ̄ jeē váha ni yā jiín i, te nasūu sɨ́quɨ̄ jeē ni sáha i jniñu váha cúu. Chi núu sɨquɨ̄ jeē ni sáha i jniñu váha cúu, yūcuán na te nasūu sɨ́quɨ̄ jeē váha ni yā cúu.

⁷¿Te ndese cúu núu súcuan? Cúu jeē ñáyuu Israel tu ní cúndeyɨ́ i quendōo ndaā i nájnūhun ni canducú i. Te sava i jeē ní nacāji ya, chi máá i ni ndahva yā cuēchi i. Te sava ga i ni ndunīhni ni i,

⁸nájnūhun cáhán tutu iī: Ni sáha Yaā Dios jeē tu jécūhun cuɨtɨ ni i sɨquɨ̄ yā, ni tu jíní i jiín tɨ́nūú i, ni tu jíni nahín i jnūhun ya, te súcuan cúu nde vijna. Achí tutu.

⁹Te suni ni cahān David: Vico jeē casáha i, na cóo nájnūhun ɨɨn trampa chí ɨɨn xeyū, návāha nihīn i castigo xeēn sɨquɨ̄ jeē castɨ́vɨ i cásáha i cuēchi.

¹⁰Te ánuá i na ndúnee, nájnūhun jeē tuá cúu coto i, te na jécostɨ́hɨ́ jnūndóho sɨquɨ̄ i nɨ́ɨ́ cáni. Achí tutu.

¹¹Núu súcuan te cájnūhun rí: ¿A tuá cúu cuɨtɨ ndɨ̄vɨ ñayuu Israel nuū Yaā Dios jeē súcuan ni castɨ́vɨ i? Tú cuɨtɨ. Chi sa suhva jeē ní cacunīhni ni i, te sa ñayuu tāca gá nación ni canihīn tahú máá i jnūhun jeē jnáma ya i. Te yūcuan sáha tucu jeē ñáyuu Israel condɨhvɨ̄ ni i jeē suni candíje máá i.

¹²Chi jeē ní castɨ́vɨ i, te sa ñayuu nɨɨ́ cáhnu ñayɨ̄vɨ ní canihīn maá i jnūhun ya. Te jeē ní cajica yátá i, suu ni sáha jeē ní canihīn ñayuu tācá nación jnūhun ya. Núu súcuan te quɨvɨ̄ jeē ndɨ́vɨcoo tucu ndɨhɨ ñayuu Israel ndaha ya, te ñayuu ñayɨ̄vɨ víhyá gā quendōo ndetū i sáha ún.

¹³Te vijna te cáhán rī jiín róhó ñáyuu tācá nación jeē tu ní jíní jnūhun ya. Chi ni tají Yaā Dios ruhū jeē scáca ri jnūhun nuū rohó ñáyuu tācá nación. Te ndúcú rí jeē na cuájnúhún ró jijnáhan ró jniñu sáha ri jeē nácani ri jnūhun ya.

¹⁴Chi cúní rī jeē jiín yúcuan te nacani ni sava jnáhan ri ñayuu Israel jeē suni candíje máá i, te jnama ya i.

¹⁵Chi jeē ni stóo ya ñayuu Israel, jeē yúcuan cúu jeē sa ñayuu ñayɨ̄vɨ ní sáha ya jeē ndɨ́vɨcoo i nuū jnúhun manī yā jiín i. Núu súcuan te quɨvɨ̄ naquihin tucu ya ñayuu Israel, quɨvɨ̄ ún suni vāha ndasɨ́ sáha ya jiín ñáyuu nɨɨ́ cáhnu ñayɨ̄vɨ́. Chi coo nájnūhun jeē natecu i jeē cúu i nájnūhun ndɨ̄yɨ.

¹⁶Te ñayuu Israel cásocō i nuū Yaā Dios pan jeē quénda xīhna gā nuū ñujen, te súcuan stéén i jeē ndɨhɨ un cúu cuenta yā. Te ɨɨn yujnu, núu yɨ́hɨ jeē cuenta yā cúu, te suu cúu nde yoho jíín ndé ndɨhɨ ndaha. Te suni súcuan ñayuu Israel, yɨ́hɨ cuenta i nuū yā, sɨquɨ̄ jeē jií i xīhna ñúhún, ni quɨ̄vɨcoo de ndaha ya.

¹⁷Chi ñayuu Israel cácuu i nájnūhun ndayújnu olivo váha, te sava ndaha un ní quendē. Te róhó ñáyuu tācá nación jeē tu jíní jnūhun ya, cácuu ró nájnūhun ndayújnu olivo yucú, te ni nachuhun ya rohó núū ni quéndē ñayuu cácuu ndayújnu váha ún. Te nájnūhun ɨnuú‑ni cástáa ró ndúxi jíín cajin jeē véji nde yoho yújnu ún.

¹⁸Núu súcuan te ma sáha téyɨ́ ró maá ró nuū ñáyuu Israel jeē cácuu nájnūhun ndayújnu jeē ni quéndē. Ma cutéyɨ́ ró, chi nucūhun ni rō jeē násūú jéē yoho stáa cajin nuū maá ró, chi sa máá ró stáa cajin jeē véji nde yoho.

¹⁹Te sanaa te cahān rō: Tú chi sava ndaha ni quendē návāha nachuhun ya ruhū nuū ni quéndē ún, achi rō.

²⁰Ndaā, te ni quendē i sɨquɨ̄ jeē tu ní cácandíje i Cristo. Te róhó chi máni sɨquɨ̄ jeē cácandíje ró, jeē yúcuan cúu jeē ni quɨ́vɨcoo ró lugar i. Te ma sándúxí ró maá ró núu súcuan, chi sa suhva conso īyo ró núū Yaā Dios.

²¹Chi tu ní íne cáhnu ni yā nuū maá ndaha jeē chíjniñu, te suni súcuan ma cóne cáhnu ni yā nuū rō jijnáhan ró te núu stɨ́vɨ ró.

²²Núu súcuan te sáha vāha ro cuenta ndese vāha ni Yaā Dios jiín ndese xeēn ni yā. Chi ni nduxeēn ni yā jiín ñáyuu hebreo jeē ní castɨ́vɨ ún, te sa cúndáhú ni yā rohó. Te cánuú cuɨñɨ nīhin ro jíín jnúhun jeē váha ni yā jiín ró. Chi núu tuú, te suni quende yā rohó.

²³Te máá i, núu candíje tucu i, te nucōndee tucu i, chi máá Yaā Dios cuu nachuhun tucu ya i.

²⁴Núu súcuan te róhó ñáyuu tācá nación jeē tu ní jíní jnūhun ya, ni quendē rō xinī yújnu olivo yucú, te ni nachuhun ya rohó xínī yujnu olivo váha, vēsú nasūú ndaha máá yujnu un cácuu ró. Te nagā ni cuu ñayuu hebreo jeē ma náchuhun ya i nuū ni quéndē i, chi cácuu i máá ndayújnu váha ún.

²⁵Hermano, cúní rī jeē na jécūhun ni rō jijnáhan ró ndese íyó jnúhun yáha jéē ní yɨsāhí, návāha ma cutéyɨ́ ró cani ni rō jeē ndichí xínī maá ró: Chi sava ñayuu Israel ni ndunīhni ni i, te súcuan coo máá‑ni nde quɨvɨ̄ jínu candíje ñayuu tācá nación jeē tu jíní jnūhun ya.

²⁶Te sáá te jnama ya ndɨhɨ ñayuu nación Israel, chi cáhán tutu iī: Ichi ñuu rī Sión quiji Yaā jnáma ñayuu, te sáha ya jeē tuá coo cuēchi nuū tāca yúcūn Jacob.

²⁷Te yāha cúu contrato jeē sándaā rī jiín i, quɨvɨ̄ jeē quénde ri cuēchi i jíjnáhan i, áchí Yaā Dios. Achí tutu.

²⁸Chi ñayuu hebreo un ní nduu i nájnūhun enemigo Yaā Dios sɨquɨ̄ jeē tu ní cácandíje i jnūhun jnáma ya i. Te jeē yúcuan te cuu cuitē núu jnūhun un núū tāca róhó. Te vēsú súcuan te sɨquɨ̄ jeē ní nacāji ya tāca jíí i jenahán, te cúndáhú gá ni yā i jeē ma stóo ya i nɨ́ɨ́ cáni.

²⁹Chi tu nácani yátá ni yā jeē cána ya ñayuu jiín jéē jéhe ya tahū i.

³⁰Te róhó jíjnáhan ró, suni ni cahīyo nīhni ni rō nuū Yaā Dios nde saá. Te vijna jeē ní cacunīhni ni maá ñáyuu hebreo, te cúndáhú ni yā rohó.

³¹Te suni súcuan máá i, chi vēsú cácunīhni ni i vijna, te cundáhú tucu ni yā i, nájnūhun cúndáhú ni yā maá ró jijnáhan ró.

³²Chi Yaā Dios ni sáha ya jeē ní quendōo ndɨvii ñayuu chīji jnúhun cúnīhni ni i, návāha suni cuu cundáhú ni yā ndɨvii i.

³³Núu súcuan te náhán náā ni yō jeē yóhyo cuehē jnūhun ndíchí íyó jíín Yaā Dios, te ndɨhɨ cuɨtɨ jiní yā. Te ni ma cúu cuɨtɨ castūhun yó ndese tée ni yā sáha ya tācá‑ni, te ma cánda cuɨtɨ yō jecūhun ni yō ndese cúu tāca jéē sáha máá yá.

³⁴Chi cáhán tutu iī: ¿Ndé ɨɨn ni jecūhun ni ndese jéni ni maá Jítoho yō? ¿Chí ndé ɨɨn ni steén nuū yā?

³⁵¿Ndé ɨɨn ni jēhe xīhna gā nuū maá yá, návāha nachunaa yā nuū i?

³⁶Chi nde nuū maá yá vēji tāca jéē iyó, te máá yá ni sáha ndɨhɨ, te jeē cúu máá yá cúu. Te na cáhán yō jeē yóhyo luu cújéhnu Yaā Dios nɨɨ́ cáni. Amén.