Romanos 11:14-34

¹⁴Pøs nabe nai misag judíosmeran pusrkwai ashib kønrrai mumay køben kiagasrønanrrab isua inchar, truilø møiløgøben kaigyugurri wesrailø kønrrai.

¹⁵Inchen judíosmeran Tius kaashen, yu pirau tru katøgan misaamera nø Tiusba tabig kørrømisra pønrramima kuibe, trube, judíosmeran Tius yandø utøbene, ¡ke kwailø latailø kuig, katøle øsiiraig latailø kønrrun!

¹⁶Pøs tru harina masaigugurrima piti lurra, truigwanmerrig pirri mara, Tiusweindø kønrrai tranene, tru masaibe kerriguba Tiusweindø kørrømisran. Inchen katø tru srølwanma Tiusweindø tarømarig kuig købene, srarmeragucha nuindø tarømariiløtøwein køn.

¹⁷Pøs tru israelitasmera lawa wesruimeeløbe tab olivo tusryu srarmera latailø kua kegølsrailø latailø køben, trune ñibe, judío kømíig, kan kau umbu olivo, nøtø peña kal-lab tusryu srar-unø lataigwan, tru tab olivo tusryu kal-lanrrai kemesra pasren, ñibe tru ellmarig tab olivo srølyu tab piwan møimbe tøgatø utab pasran.

¹⁸Inchendø tru olivo tusryu trendø truyu srarmerane ñibe purab tabig kurmab ka isaba inchimøta. Inchen ñi treeg ka isaba inchib pasrøwabe, trube, srølwan øsig kømigwan ñi tranøb pasrømøtø, øsig kømigwane srølguen ñun tranøb pasrain kui isuagu.

¹⁹Pøs ñibe inchippa trendaisruandøbe trenchinrrun: “Tru olivoyu mø srarmerane kegølsrailø kuig køn cha, truyu nan kemendøsrka kal-lannrrab.”

²⁰Pøs treebe treegwein køn. Judíosmerabe chigucha chi kørenrrab inchimuben, treekkurri kegølsrailø købwei indig køn. Inchen ñibe isubigwan Cristoinug pasra tøgagúikkurri truyu pasran. Pøs inchawei purø nuig kømmørø inchib pasrømøtø, ñibe køriibala isuatø pasrau.

²¹Kaguende Tiusbe tru srarmeran trendø truyuelanguen ka pønrrøbashmøtø, para petiibe, ñungucha ka pasrøbashmøtø, treetøwei para kutchun.

²²Pøs isua ash, Tius nø yeeg tammayig kuigwanba, nø chi chippe, kandø wamabig kuigwanba, tru kørra pønrrabelaimbe nøbe kandø kandø wamabig købendø, trune ñune tammay indan. Inchendøgucha tru nø tammay indigu ñi truyu pasrabig pasrøbene kønrrun. Treeg kømuisruandøbe, ñigucha kegølsraig kønrrabguen.

²³Inchen judíosmera nøm køremø, treetø melønrrab inchimøtø, nøm kørebene, katøle tru olivoyutøwei nuranrrai kemesra pønsrailø kønrrun. Kaguende Tiusbe maramburab marøbig køn, katøle kemesra pønsramig.

²⁴Pøs ñi, judío kømíig, tru ñi kau umbu ka trendø nøtø peña kal-lab olivo lataigwan para, mana treeg mariimíigwan tru ellmari tab olivo tusryu nuranrrai truigwanma kemesra pasriibe, kan mas tru ellmari tab olivo tusryu srarmera kegølsrailø købelane katøle tru tusryutøwei nørrøranrrai kemesrailø kømønrraitarru, tru judíosmeran.

²⁵Nai nunelø, israelitasmera kømeelø, Tiuswei tru mu asiimíig pasrabigwan tab chigúi møra kønrrai inchar, ñim ñimuinetø purø nørreelø misrøb pønrrømønrrai. Israelitasmerabe ke mayambagucha kømø, kan tøbøtø nømui manrrømeran mur marøb pønrraigu kegørra pønrrappe, tru judíos kømø misaamera kaigyugurri webamrrabelø mayeeløba kaigyugurri webambamnegatiitø køn.

²⁶Inchen øyeeg nebubene, israelitasmerabe mayamba kaigyugurri wesrailø kønrrun, Tiuswei wamwan pørigu maig taimbala: “Tru Kaigyugurri Wesrawa Pønsrønrrabiibe Jerusalén Sion Tunsrøngurri arrua, Jacobweinukkurri amrrub misaamerane nømui kaigwan kerranrrun cha.

²⁷Inchen tru kaig marigwan na kerrabene, tru nømba na acuerdo marig, truig kønrrun” cha.

²⁸Pøs judíosmerabe Cristoi tabig srø wamwan kaasikkurri, truburappe Tiusbe tsalø indiiløwein købig køn, tru ñim judíos kømeelaimburab tabguen kønrrai. Inchendø nømun Tius lawa wesruikkurri, truburappe tru nømui merrabsrø Tiuswan mørøbelø kølli misaameragurri nømbe Tius undaarailø køn.

²⁹Pøs Tiusbe nø keta traniilane katø kerranrrab kømøwei, katø nø wamigwane wamømuig kui lataig martrabgucha kømøwein køn.

³⁰Inchen ñim judíos kømeeløgucha treetøwei merrabwansrømbe Tiuswan larrø mørmeelø købig kuig, møimbe Tiuswei lastima asigwan nebua tøgagøn, judíosmera mørmeelø kuikkurri.

³¹Inchen tru ñim judíos kømeelan Tius lastima asigwan ñimun tranikkurri nøm judíosmeragucha møi yambe nømbe larrø mørmeelø misrin køn, nømgucha Tiuswei lastima asigwan nebua utamig kønrrai.

³²Pøs Tiusbe maya misaameran larrø mørmeelø misra melamigu mumaygucha wegønønrraingaig pønsrailø pønrran, tru maya misaameran nø lastima asha tøgagønrrab.

³³¡Tiuswei kusremburab kusrebig kuiba, kusrebig kua nebumburab nebua asiiløbabe purø nørriig muguen nebua isumgailø køn! ¡Nø maramig tøgagúilane ni mandøguen ‘øyeeg køn’ tamgailø, nø mandø martrab isuiløbe maig kermab nebua isumgailø, treelø køn!

³⁴Tiuswei wamwan pørigube trenchibig køn: “¿Señor isua tøgagúilane mu nebua asitarru cha? ¿Kabe Señorwane ‘ñi øyamay marambala’ chinrrabig mu købig kuig kø chindah cha?