Romanos 10:11-20

¹¹Echaꞌ vaꞌl nital u Yolbꞌal Tioxh ech tzaꞌ: —Abꞌil vaꞌl kꞌujlel ikꞌuꞌl tiꞌ, yitꞌ saꞌkojchꞌixvixsali.— Chia.

¹²Tan yeꞌk tel qꞌu Israeel tuchꞌ qꞌu puera aanima vatz u Tioxh. Tan aꞌ u kuBꞌaal sukukajayil utz, sibꞌla bꞌaꞌnil nitaqꞌ kuꞌl tiꞌ qꞌu aanima qꞌuꞌl niqꞌilan nisikꞌlen.

¹³Ech sachitpu kajay qꞌu aanima qꞌuꞌl saqꞌilan sasikꞌlen vibꞌii u kuBꞌaal.

¹⁴Loqꞌ ¿kaniꞌch iqꞌilat isikꞌlet vibꞌii u Jesuus, untzꞌoj yeꞌsaj inimataꞌ? ¿Kaniꞌch inimataꞌ, untzꞌoj yeꞌ nitabꞌi abꞌil u Jesuus? Utz ¿kaniꞌch tabꞌitaꞌ, untzꞌoj yeꞌxhabꞌil nialon te?

¹⁵Utz ¿abꞌil seꞌnalon u bꞌaꞌnla chusbꞌal te, oj yeꞌxhabꞌil sachajaxi seꞌntaleꞌ? Echaꞌ vaꞌl nital u Yolbꞌal Tioxh: —¡Tiira txꞌanel nitopon qꞌu paxsan tetz u bꞌaꞌnla chusbꞌal, qꞌu iqꞌon tetz u bꞌaꞌnil!— Chia.

¹⁶Loqꞌ yitꞌ kajay koj qꞌu Israeel niniman u bꞌaꞌnla chusbꞌal. Echaꞌ nital u Isaias ech tzaꞌ: —UnBꞌaals Amlika, ¿abꞌil bꞌoj niniman u yol niqal saiꞌ?— Chia.

¹⁷Tan tiꞌ u tabꞌil u yolbꞌal Tioxh, nichee u kꞌujlebꞌal kꞌuꞌl tiꞌ u Tioxh. Ech, aꞌ vixeꞌal viyolbꞌal u Tioxh.

¹⁸Loqꞌ yitꞌ tiꞌ koj aas yeꞌ nitabꞌi u yolbꞌal Tioxh qꞌu Israeel. Nimotxtabꞌi. Tan nital u Yolbꞌal Tioxh: —Vetpax bꞌen u yolbꞌal Tioxh tu kajay u vatz amlika txꞌavaꞌ. Abꞌili tijuꞌtebꞌal u vatz txꞌavaꞌ.— Chia.

¹⁹Utz yitꞌ tiꞌ koj majte aas yeꞌxhat nimotxbꞌenku te. Pek tibꞌaxa, abꞌitaj vaꞌl tal u Moisees ech tzaꞌ: —Savoksa ixaꞌv sekꞌuꞌl tiꞌ vaꞌt u tenam yitꞌ untenamich koj. Utz sunlakpixsa eviꞌ tiꞌ maꞌl u tenam vaꞌl yeꞌk itxumbꞌal.— Chia.

²⁰Utz abꞌitaj viyol u Isaias majte tan, yeꞌk ixoꞌval nital ech tzaꞌ: —Aal aꞌ chabꞌanin qꞌu aanima qꞌuꞌl yeꞌ nichchokonin. Utz vetvaqꞌ tzii aas aꞌ saootzajin qꞌu aanima qꞌuꞌl aal yeꞌxhkam nichꞌoti abꞌil in.— Chia.