Roma 8:5-38

⁵Juju raŋɋare hata âteeŋgopieŋ jaŋe maŋ mamanasu‐jeŋic juju raŋɋare wiacte foekac, â Mârore hata âteeŋgopieŋ jaŋe maŋ mamanasu‐jeŋic Mârore wiacte foekac.

⁶Maŋraŋɋare wiacte manasuhuc sisipiric bâfuazo, â Mârore wiacte manasuhuc juju â wama bâfuazo.

⁷Maŋraŋɋare wiacte mamanasu izi Anutu kisâ ecneekac. Ehuc sâcmutâc dâŋticne mi dapecneekac, i wemo‐ticnezi sâcne ezac!

⁸Maŋraŋɋahec jueŋgopieŋ jaŋere Anutuzi takickeekac.

⁹Anuture Mârozi maŋŋeŋicko fic hae ewecko ine maŋraŋɋaopec mâcne, Mâroraopec utuckerâ jueŋgopieŋ. Moc e Kristore Mâro tâmiric juocmuzi ere ŋicbiŋe mi juocmu.

¹⁰Kristozi maŋŋeŋicko jukacko sahac‐ŋeŋiczi sâqocnere erâ hâmoc ruckekac, â maŋ qâqâtâc‐ŋeŋiczi ine kiŋfâsâc bacŋopakicnere juju ruckekac.

¹¹Eme Jesu hâmockonec bâɋârewec Anutu hâcne, ere Mârozi maŋŋeŋicko ŋeŋe juju ekacko, Kristo Jesu hâmockonec bâɋâreweczi maŋŋeŋicko Mâro‐ticne jukac ere erâ sahac‐ŋeŋic hâmocne i iŋuc jaha bâɋâreocmu.

¹²Âgo bureŋ, irec hâcne maŋraŋɋazi wemo nâre tahac eekacte nâŋâc tofa bazucnehuc ere wiacko qohotanaŋmu?

¹³Ŋoŋe maŋraŋɋare wiacko qohotaniŋmuo sipirickeniŋmu. Â Mârore tâpirio sahacte dâŋ qaniŋmuo ine juju sâcne juraʒihuc juniŋmu.

¹⁴Anuture Mârozi de âsic ejareha jueŋgopieŋ jaŋe hâcne Anuture naru motecfâc.

¹⁵Anutu e Mâro ŋarewec i kiŋaŋ qaqafâcne juhuc harierâ hâhâwic bacneniŋte mâcne, naru motecfâcne erâ juniŋte ŋarewec. Irec hâcne “Mamac biaŋ‐nâŋec” muhuc wasickeeŋgopeneŋ.

¹⁶Nâŋâc Anuture naru motecfâc jueŋgopeneŋ, dâŋ i Mârozi maŋnâŋecko musokame manaeŋgopeneŋ.

¹⁷Naru motecfâcne juŋgopeneŋzi Anuture huhure wâc rauckenaŋmu, Kristohec mâmâc wirec rauckenaŋmu. Ʒira mâreŋko ehec ʒârâ hâriŋ faio junaŋmuo ehec eri tatamac biaŋko mâmâc jaha junaŋmu.

¹⁸Sambâŋko Anutuzi eri aŋac bâfua‐nâreocmu, i mâreŋko ʒâic busâqoc fokac ira sâc hepe mamakâc eocmu.

¹⁹Anuture naru motecfâc eri aŋac‐nâŋec fua tâcneocte, wiac bâfuac‐jopakicne jaŋe irec woŋec juhuc maŋ hâhâŋ ejareekac.

²⁰Wiac omane jaŋe wâc bie gufec hâmo qanʒaraŋte maŋnao râec‐jopakicne, erâ jaŋacne maŋte mâcne, ŋiczi sahacko râec ejarewec. Erâ jaŋe iŋuc hati fohuc juniŋte mi mujarekicne.

²¹Wiac omane jaŋe wâc hâmo qanʒaraŋte niŋgiŋ hetararâ firiehuc Anuture naru motecfâc nâŋâcne eri aŋacko ʒuhuckeniŋmu hâcne.

²²Nâŋâc manaŋgopeneŋ, dameŋ i hâcne maickeocte wiac omane jaŋe harac huacbuc ehuc gozi kicjopame ʒâic manaeŋgopieŋ.

²³Erâ wiac omane jaŋe sawa iŋuc mi eeŋgopieŋ, sambâŋkonec qaqasune Mâro hâcne nârekicne nâŋâc iŋuc jaha, naru motecfâc‐ticne juŋgopeneŋ irec fuŋne Anutuzi, sahac‐nâŋec bâfiriehuc, bataniŋkeocte woŋec juhuc maŋzi harac huacbuc eeŋgopeneŋ.

²⁴Nâŋâc bâpiaŋ‐nâpokicne irec fârine tapamaŋko fokâc. Fârine tâtâc fuame muzac harac huacbuc mi enʒapeŋ. Wiac i basahuc ine harac huacbuc ezo.

²⁵Fârine tâtâc mi fuame honeeŋgopeneŋte maŋzi worickehuc woŋec jueŋgopeneŋ hâcne.

²⁶Mâro e wâc gegec dodoc‐nâŋecte erâ bafic‐nâpoekac. Nâŋâc iŋuc me iŋuc numupene sâckeocmu, i mi mana‐hâmoeŋgopeneŋte Mârozi âkehoc‐nâporâ saŋuc ŋiczi mi mamanane i qaekac.

²⁷Ehame Anutu e maŋ hohonezi Mârore dâŋ manaekac. Mâro e mitiŋic jaŋere okacne Anutu dâŋsâc‐ticnao numuekac.

²⁸Nâŋâc manaŋgopeneŋ, Anutu maŋzi jauŋkeniŋmu jaŋe wiac izi me izi fua‐jarehuc bâbâpiaŋ‐jeŋic dopecke‐fâreocmu, ine eki hefârec‐jopaocte maname fowecte hefârec‐jopawec jaŋe hâcne.

²⁹Ŋic qanaŋ honec‐jopame sâckewec jaŋe Ŋokâ‐ticnere hawari eniŋte mucjopawec. Eme ɋafâc‐ticne bocjaha ehapene e jahac ine mârâc hahac‐nâŋec erâ juocmu.

³⁰Anutu e ŋic qanaŋ hone wosâec‐jopawec sâc hefârec‐jopawec. Hefârec‐jopawec sâc kiŋfâsâc bacjopawec. Kiŋfâsâc bacjopawec sâc eric‐jopawec.

³¹Dâŋ irec fuŋne weniŋuc fokac? Anutuzi âgo enârehame mozi râsi enâreocmu?

³²E Ŋokâ‐ticne mi sakarehuc nâŋâcnere erâ qaisockeweczi ere erâ wiac sasawa mi sesi qeqeric jaha tahac‐nâpoocmu me?

³³Anutu bâwosâecfâc‐ticne jaŋe mozi dâŋko râec‐jopaocmu? Anutu e jahac kiŋfâsâc bacjopakac.

³⁴Me mozi tuŋjopaocmu? Kristo Jesu e jahac hâmowec, erâ hâmowec sawa mâcne, e hâmockonec wâc faharerâ Anuture mefâreo feweczi nâŋâcne riŋ rohuc juekac.

³⁵Kristore uruc jauŋkonec wemozi moc batarac‐nâpoocmu? Ʒâic busâqoczi me hume serereŋzi me fific guguriŋzi me roroczi me qarâ suriŋnezi me ʒârâ ʒâpâzi me ʒika kâpâcwâruzi?

³⁶Dâŋqâreŋ kecʒiŋuc fokac irec sâcko wiac enâreeŋgopieŋ: “Gore erâ ʒoaŋne ʒoaŋne qa imac enâreeŋgopieŋ, lama qa hezuc eejarene jaŋere sâcko râec‐nâpoŋgopieŋ.”

³⁷Erâ wiac iŋucnezi mi bâdoc‐nâpoocmu, aricne, Jesure uruc jauŋko âtesiŋnehuc sasanaŋ fekicne bâfuarâ domaeŋgopeneŋ.

³⁸Irec no ʒiŋuc manapaŋkekopac: Hâmoczi me jujuzi, aŋelozi me ŋicbomboŋzi, wiac ʒiŋucne fofonezi me ʒâhec fufuanezi, me wiac tâpirineheczi,