Roma 8:5-27

⁵Aw egbeyà-beyaan se otaw te medaet ibeg te pedowan din, gayed sikandin eg-aneng-aneng tepad te pegtoman din te medaet ibeg din. Meneng aw egbeyà-beyaan te Espiritu Santo se otaw, gayed sikandin eg-aneng-aneng tepad te pegtoman din te ibeg te Espiritu Santo.

⁶Aw meg-aneng-aneng se otaw tepad te pegtoman din te medaet ibeg te pedowan din, detengan sikandin te kemetayun wedad temanan. Meneng aw meg-aneng-aneng se otaw tepad te pegtoman din te ibeg te Espiritu Santo, yan se otaw doen kaling pedowan wedad temanan, aw melinaw se pedowan din.

⁷Se otaw eg-aneng-aneng tepad te pegtoman din te medaet ibeg te pedowan din, yan se egpoon te Timanem, so kenà sikandin egtolò te impunù te Timanem. Eked sikandin peketolò te impunù te Timanem.

⁸Aw egbeyà-beyaan se otaw te medaet ibeg te pedowan din, wedad palos inangen din kelubahan te Timanem.

⁹Meneng kenà kaw den egbeyà-beyaan te medaet ibeg te pedowan niyo, so egbeyà-beyaan kaw den te Espiritu Santo eg-ogpà kidoen te pedowan niyo. Aw doen otaw wedad Espiritu Santo diyà kandin insogò i Cristo, yan se otaw wedà pegpesakop diyà ki Cristo.

¹⁰Meneng aw eg-ogpà si Cristo diyà kenyo, pengkey matay se lawa niyo tandà te salà, meneng binegayan kaw te Timanem te kaling pedowan, so inaneng-aneng din den te metòlid kaw.

¹¹Timanem se mig-antay ki Cristo lekat te nematay. Yan aw eg-ogpaan kaw te Espiritu Santo, entayen heman te Timanem se lawa niyo lekat te nematay pineokit te Espiritu Santo eg-ogpà kidoen kenyo.

¹²Na, menge kedowa ko, so eg-ogpaan kidon te Espiritu Santo, keilangan meg-inang kidon te ibeg te Timanem. Keilangan eked kidon taking te medaet ibeg te pedowan tadon,

¹³so aw egbeyà-beyaan kaw te medaet ibeg te pedowan niyo, detengan kaw te kemetayun wedad temanan. Meneng aw pineokit te tabang te Espiritu Santo lomengà kaw te peg-inang niyo te salà, doen kaling pedowan niyo wedad temanan,

¹⁴so se kedita te otaw egbeyà-beyaan te Espiritu Santo, yan se menge batà te Timanem.

¹⁵Pegpemegay te Timanem te Espiritu Santo diyà kenyo, wedà kaw din inangi menge allang din, meneng ininang kaw din menge batà din. Yan se doun te wedad den kelemitanan niyo, so mepakay den aw Amà se itawal tadon te Timanem, so amay tadon den sikandin,

¹⁶so Espiritu Santo se egpetaga-taga kenitadon te menge batà kidon den te Timanem.

¹⁷So batà kidon din, doen aldaw domateng aw kominawà kidon te kedita te kèpiyaan impetagad din kenitadon. Pengkey eden se ibegay din ki Cristo, yan heman se ibegay din kenitadon. Aw pemilangen kidon tandà te pegtaking tadon ki Cristo, ipelangkaw kidon heman doton te langit doma i Cristo.

¹⁸Pengkey egpemilangen kidon dini lanto te tanà, meneng aneng-aneng ko aw kinewaen tadon se kèpiyaan impetagad te Timanem kenitadon, kelibelan tadon se kelimahan sìyan,

¹⁹so egpeliman se kedita te ininang te Timanem te aldaw domateng aw ipekità din se kedita te menge batà din.

²⁰Gebii, migkedaet se kedita ininang te Timanem dini lanto te tanà aw wedad den ontong so impelumun, kenà lekat te ibeg niyan meneng lekat te ibeg te Timanem. Meneng doen pa aldaw pelimanan tadon

²¹aw inangen te Timanem kaling se kedita te ininang din amon wedad palos matay aw megkedaet. Yan meinang mèpiya se kedita, iling te kèpiyaan domateng kenitadon menge batà te Timanem.

²²Te eked pa iyan ketoman, netegahan tadon te ontò egkelimahan se kedita te ininang te Timanem dini lanto te tanà lamig seini, iling te bayi agpet tebawan.

²³Kenà olò doma ininang te Timanem se egkelimahan, meneng sikitadon heman se egkelimahan dalem te pegpeliman tadon te aldaw te ipekità te Timanem se kedita te menge batà din, aw metoman meinang kaling se lawa tadon. Imbegay den se Espiritu Santo kenitadon, aw sikandin se tagnà te kedita te ibowang te Timanem kenitadon,

²⁴so lekat te pegpelowà din kenitadon lekat te salà, gayed kidon egpeliman kenyan. Aw dimateng den se pinelimanan tadon, eked kidon ikagi te doen pa pelimanan tadon, so wedad otaw megpeliman te dimateng den.

²⁵Meneng so wedà pa dateng se egpelimanan tadon, keilangan medalem se pedowan tadon dalem te pegpeliman tadon kenyan.

²⁶Egtebangan kidon heman te Espiritu Santo amon eked kidon lengà se egpeliman. So aw eked kidon ketaga-taga aw eden se mèpiya pemoyoen tadon te pegtawal-tawal tadon diyà te Timanem, ikeliwat te Espiritu Santo se ontò medalem ibeg te pedowan tadon eked tadon keikagi.

²⁷Netaga-taga se Timanem Amay aw eden se awop te pedowan tadon, aw netegahan din heman aw eden se aneng-aneng te Espiritu Santo, so egpemoyoen te Espiritu Santo diyà te Timanem se tabang din kenitadon menge sakop din lekat te kandin ibeg.