Roma 8:1-32

¹Arinai ede isi Iesu Keriso boeana eai nige edi abahebaaeadi, isi buluma dobilana nige se laulauwatai, na Earua mo se laulauwatai.

²Paana mauri Earuana laugagaeona Keriso Iesu boeana eai, baaea eo mate laugagaeona eai i iairihaiguo.

³Na saha wa laugagaeo nige abina i ata i abi paana, buluma eai, i beruberu, Eaubada ia Natuna baaea hesabana i hetamariyama, ana ao hinage doha buluma baaeana, na ia buluma eai baaea i awabaaeaei.

⁴Laugagaeo laulau‐duduraina abo se hemamohoiei ita boeada eai wa ita nige buluma ta lauwatai, na Earua mo ta lauwatai.

⁵Isi buluma se lauwatai, buluma ginauridi mo se nuatuidi; na isi Earua se lauwatai, Earua ginauridi se nuatuidi.

⁶Paana nuada eai buluma ginauridi ta nuanuatuidi ta mate; na Earua enana ta nuanuatuidi abo ta mauri eo ta loni.

⁷Paana buluma nuatuna ta nuatu‐daoiei Eaubada abo ta hewaiunuei ede, Eaubada ena laugagaeo nige ta awaabiei, nige abina ta ata.

⁸Isi buluma nuanuatuina eai se laulau, Eaubada henualolona abina nige se ata.

⁹Na omi nige buluma boeana eai, na Earua boeana eai, ena Eaubada Earuana i miamia boeamiu eai. Ena tau esau Keriso Earuana nige i abi ia nige Keriso enana.

¹⁰Eo ena Keriso i miamia nuaboeamiu eai taumiu ena se mate baaea debana eai, taiede earuamiu se mauri laulau‐dudurai debana eai.

¹¹Na taba Iesu mate eai tauhetorouioina Earuana i miamia nuaboeamiu eai, ia Keriso mate eai i hetorouioi wa taumiu posaposadi abo i hemauridi, Earuana i miamia boeamiu eai wa debana eai.

¹²Egu tataoyao e, ita buluma nige ta mose‐hagai, buluma gadosisina ata ta lauwatai.

¹³Ena buluma gadosisina au lauwatai, abo au mate; na ena Earua debana eai taumiu laulaudi au unuidi, abo au mauri.

¹⁴Paana isi gamagamagaridi Eaubada Earuana i woeawoeaidi, isi Eaubada nanatunayao ede.

¹⁵Paana omi earuamiu taba nige au abiuioidi doha se paiuioimiu, eo doha matausi arinai au guriuio; na omi gigiori earuana au abi, au hemala‐natu. Arinai ena ta eaba lailai ta ene “Aba! Tamada e!”

¹⁶ia Earuana ma earuada ede se oiribaribaei, ita Eaubada nanatunayao;

¹⁷na taba ita ia nanatunayao ita hinage ena gogo tauabina, eo Keriso maeda tau‐abiesegaina, ena taba ena amamna ta hearoesegai eo maeda ena hedebasae ta hearo hinage.

¹⁸Amamna wa huia ta ta abidi se gagiri ariri, hedebaesae abotai abo se hemasarahayama boeada eai, meta mo ea nuatui ede i lai ariariri.

¹⁹Ginauri eo abi gamagamagari se hetubudi wa, Eaubada nanatunayao edi hedebasae se bagibagiwatai, ma‐nualelehidi.

²⁰Paana ede abi gamagamagari se hetubudi se guridobi, se laulau gaibu mo, isi nige edi nuatu eai na tauheguridi mo ena nuatu eai se laulau; edi sunusunuma paana

²¹ede abi gamagamagari posaposadi adi auau eai abo se hemauridi, eo abo se lulagema Eaubada nanatunayao edi iairihai lolo‐dumadumana eai.

²²Ita ta nuatui abi gamagamagari se ohihai se lepalepagogo, eo se amamna ariri i laoma e huia ta.

²³Nige isibom mo, na ita hinage Earua ena uaua ealahouna tauabina, ita hinage ta lepalepa nuaboeada eai, gigiorina ta bagibagiei, ia ede tauda wa abo se hemauridi.

²⁴Paana ita sunuma debana eai ta mauri; na sunuma ne se itaitai, meta nige sunuma mamohoina; tau ginauri matana eai ie ita saha abo i sunumaei?

²⁵Na ena ginauri nige ta ita, ta sunumaei, iaede abo ta bagiwatai, ma‐nuapaipaida.

²⁶Doha hinage eda beruberu eai Earua i sagusaguida, saha eo saha bena ta lau‐uuraedi, duduraina nige abina ta ata, na Earua iabom enada i aiboda gadogadora, taba nige ta ribaei, nige arinana.

²⁷Nuataueooidi Earua ena nuatu aniona i itayao, paana ede ia hetabu tataodi enadi i aiaiboda, Eaubada ena nuatu mo i lauwatai.

²⁸Ta nuatuiyao ginauri gamagamagari se lauloloesegaidi isi Eaubada taugadosisiena aridi eai, isi ia ena nuatu eai se eogahaidi.

²⁹Na isi i ita‐nonohaidio hinage i henuatu‐auridio ia Natuna ana ao abo hinage se abiwatai, ena tataoyao gamagamagari aridi eai ia bena abo i hemala natu‐ealahouna.

³⁰Isi i henuatuauridio wa, hinage i eogahaidi; isi i eogahaidi wa, hinage i heduduraidi; eo isi i heduduraidi wa, hinage i hedebasaedi.

³¹Teina ribadi ta aridi eai abo ta ene edoha? Taba Eaubada i torotaunida, eai abo i guduguduida?

³²Ia, Natuna nige i nuahi na ita gamagarida debada eai i moselaei, ia maena hinage abo ginauri gamagamagari i ledima‐esegaidima, e nige’e?