Roma 7:2-10

²Au haꞌi conto neme sao touk ma sao inak heti-heun mai. Mete ma inak esa sao tungga heti-heuk, na dua sala sao losa mate. Tehuu mete ma sao toun maten so, na, ina falu ndia ta nanambaꞌak no heti-heuk ndia so bali. Ndia bole sao seluk.

³Tehuu mete ma ana sao no hataholi feꞌek, naa te sao toun bei kasodak, na, tungga heti-heuk na ana hohongge ndia so. Tehuu, mete ma saon maten so, na heti-heu sasaok ta laꞌe ndia so bali. Ana nakamboꞌik ndia so. Boe ma, mete ma ana sao hataholi feꞌek, na, tungga heti-heuk, ana ta hohongge ndia.

⁴Leondiak boe, no ei kamahele kala! Karistus maten so. Ndia sama leo ei boe, mate noꞌu mia Ndia, ma laꞌo ela ei soda laam. Boe ma hoholo-lalanek heti-heun ta laꞌe neu ei so bali. Hatematak ia, ei makamboꞌik mima Heti-heuk ndia, ma nanambaꞌak mia Karistus, fo mana masoda falik neme Ndia mamaten mai so. Dedeꞌak ia, sama leo ina falu mana sao seluk. Dedeꞌan ta so. De, hatematak ia, basa hata fo ei taok ndia, soaneu Manetualain.

⁵Te makahulun, ita kada tao tungga ita aon hihii-nanaun. Huu ita talelak heti-heuk, de ndia tao nala ita tahiik soba laꞌolena heti-heu kala sila, fo tao dedeꞌa ta ndoos. Naa! Ita salan ndia, tao nala Manetualain heok nasadea ita.

⁶Makahulun, ita musi tao tungga heti-heuk. Tehuu hatematak ia heti-heuk ndia ta laꞌe ita bali, te ita mboꞌi heni ita soda laan so. Tungga dala laak hihiin, na, Musa heti-heun fo nana sulak nai Manetualain Susula Malalaon nanambaꞌak no ita. Tehuu tungga dala beuk hihiin, na, ita takamboꞌik teme Heti-heuk ndia mai so. Te Manetualain Dula Dale Malalaon heti ita! Huu ndia de, hatematak ia, ita kada tao ues soaneu Manetualain.

⁷De, ita sangga tae hata? Fama ita duduꞌa tae, “Heti-heuk fo Manetualain fee neu Musa ndia, sala!” Ta! Te kada Manetualain Heti-heun bisa tulun au fo bisa bubuluk basa dedeꞌa ndoos, do ta ndoos. Natutuduk leo hoholo-lalanek esa nae, “Boso mahiik haꞌi mala hataholi hatan”. Tehuu neme bee mai au bubuluk ahiik mata leondiak sala, mete ma au ta bubuluk ndia hoholo-lalanen? Ta bisa!

⁸Tehuu heti-heuk ndia boe fo leꞌa-nole manggalauk manai au daleng, losa au ahiik soba laꞌolenan, fo ndia au ahiik haꞌi ala hataholi feꞌek enan mata-matak. Mete ma ta hambu heti-heuk fo kaꞌi, na salak manai hataholi dalen ta naena koasa fo heti hataholi.

⁹Nai au soda makahulung, au ta bubuluk Manetualain Hoholo-lalanen. Doo-doo, bei fo au bubuluk Ndia Hololo-lalanen, ma faik au ameda ae, au laꞌo lena Hoholo-lalanek ndia, ma tao salak. Faik au tao salak leondiak, na, au hambu huhuku mates.

¹⁰Boe ma au daleng nakalulutuk, te au bubuluk ae, au mesa nggau ta bisa malole ua Manetualain, huu kada tao tungga Ndia Hoholo-lalanen. Au andaa hambu Manetualain nasan, fo ndia huku mate, huu au laꞌolena Ndia Hoholo-lalanen. Naa te, Hoholo-lalanek ndia nana taok, fo suek tao nala hataholi bisa lasoda ndoos. Tehuu soaneu au, Hoholo-lalanek ndia tao nakalulutu au, de tao nala Manetualain nasadea au.