Roma 7:10-19

¹⁰pede hota alier la matmiati-molmuolu plalahwa. Pede na'nama agat niohora de Uplerlawna Nala deulu-tatra pa nodi mormiori-dardiari mere rwaldioinia de deulu-tatar de hota nodi a lia matmiati-molmuolu plalahwa.

¹¹La'a agama deullu-tatarni pede do'a-hala nlernan talan pa nod a lia putra-palka yoma awuarora de la'a agama deullu-tatarni yala'ani pede aliernana yamori-yalewna, mere plollolli de hota do'a-hala nod a lia matmiati-molmuolu plalahwa.

¹²Pede ina-nara ama-hyali, agama deullu-tatarni de ha yatyat atia' hade, mere ha nwatiawua Uplerlawna me hya' ed maka deulu-tatar de nakota, de ha rwatiawua Uplerlawna pede naplola me kalwieda.

¹³Mere yanpa mimpiarora deulu-tatra samomuou de hota ed mak kodi a lia matmiati-molmuol plalahwa de. Mere agatga edon emkade! Yoma hya' mak kodi a pua alier la do'a-hala ralamni, de a ralma-rior wamueh'u mak kwaror reria do'a-hala. Yoma la'pa utlin nana deulu-tatra agama mak kalwiedwed de, yeher to' pa a ih'ru-ralmu ed mak kod rer a lia do'a-hala ralamni mak kodi matmiati-molmuolu. La' hade emkade totpena tamkek memna a hihi'u-yapya'pu de do'a-hala toto'a hade, me totpena do'a-hala de yatyatni-halalli nayamkek memna onnila ta'en niana aliernohora deulu-tatra.

¹⁴Itat niohora de agama Yahudi deullu-tatarni de ha nwatiawua Uplerlawna Nhiw Lululli, mere a' di de rimormior miaka kakleh ruri-lai id memna a' pua ta'en niana aghi' hya' mak kaplola. Hota emeknekama rtekua riy id pa nhi'a hopopna-lili'iru ata-wa'ara, emkade walia de do'a-hala nodi plolli mai a'u.

¹⁵Amueh'a nek de uplin niohora hya' nariei pede aghi' emkarena. Yoma hya' ed mak kaplola maka a ralma-rio'ru niwra nhi'a, de edonna ghi' nana, mere do'a-hala maka a ralmu edonna nal nana demade aghi' nana.

¹⁶Ne la'pa aliernohora a ralma-rior wamueh'u mere narieiniande a ralmu nmawla, de hade ed mak ktutga de a'g e wuayow nohora agama Yahudi deullu-tatarni.

¹⁷La' hade de a'g edonna liernohora hya' maka a ralmu ha nala pa aghi' nana de, mere onnila do'a-hala mak kden la a ih'ru-ralmu ed maka kawewal nan a'u.

¹⁸Agat niohora la' a ino'nu di de kalwiedwedni oke' mana hadamonan meman la a ih'ru ralmu la'a a yehwa rimormio'ru di. Yoma plollolli de a'g e wuaror nan walia nhioli-lieta kalwiedwedni mere hota a'g edonna ghi' nan walia.

¹⁹De a'g edonna ghi' kalwiedwedni maka agiwra ghi'a. Mere a ralma-rio'ru nawnial dioin pa aghi' targho'a hya' mak kyata-khala, mak a ralmu edonna na'oin nana.