Roma 3:2-27

²Meneng medita se ontong dan. Monà te kedita, insalig te Timanem kandan se kagi din.

³Benal doen menge Judiyo kenà egsalig kenyan, meneng ikà niyo eg-aneng-aneng te eked keseligi se Timanem.

⁴Pengkey egkebolalaw se kedita te otaw, meneng kenà egkebolalaw se Timanem, so gayed sikandin egtoman te pakang din. Doen kagi te Timanem insolat, “Timanem, aw mikagi ka, ketegahan day te kebenalan se ikegiyen nikaw. Aw doen otaw megdimanda tepad kamno, sikona se menalo.”

⁵Meneng doen besi menge otaw eg-aneng-aneng te mepakay aw meg-inang kidon te medaet, so pineokit kenyan, ontò metaga-taga se doma otaw te metòlid se Timanem, aw yan eked kepakay aw ipelumun te Timanem se otaw eg-inang te medaet. Doen besi menge otaw eg-aneng-aneng iling kenyan.

⁶Meneng eked kidon ikagi te medaet se Timanem aw ipelumun kidon din, so simpana kenà metòlid se inangen te Timanem, eked kepakay aw sikandin se meg-okom te kedita te otaw dini lanto te tanà.

⁷Doen besi heman menge otaw eg-aneng-aneng te mepakay aw megkebolalaw kidon, so pineokit kenyan, ontò metaga-taga se doma otaw te egkeseligan se Timanem aw iduyun dan sikandin, aw yan eked kepakay aw ipelumun te Timanem se otaw egkebolalaw.

⁸Simpana benal iyan, mepakay peden aw meg-inang kidon te medaet amon iduyun se Timanem. Meneng kenà iyan benal. Doen otaw egbaet-baet kanak so eden dan aw yan se ipegtoladà ko. Meneng mèpiya aw ipelumun te Timanem se otaw egtoladà iling kenyan.

⁹Nayan, kenà benal te labi pa mèpiya se kedita te Judiyo diyà te menge doma otaw kenà Judiyo, so tapay a minikagi diyà kenyo te nekeinang se kedita te otaw te salà, pengkey Judiyo aw otaw kenà Judiyo.

¹⁰Doen kagi te Timanem insolat, “Wedad palos otaw ontò metòlid, pengkey sebad.

¹¹Wedad palos otaw netaga-taga tepad te Timanem. Wedad heman otaw meibeg metaga-taga te Timanem.

¹²Timinàyog se kedita te otaw te Timanem. Tomalag dan nelegeb te salà. Wedad palos otaw mig-inang te metòlid, pengkey sebad.

¹³Iling te lebeng neowang se bahà dan so medaet se kagi dan. Pineokit te kagi dan, eg-akal dan te doma otaw. Iling te lalas te memokan se medaet kagi eglowà lekat te bahà dan.

¹⁴Gayed dan egpenollon aw egkeopal.

¹⁵Meagka se pedowan dan memonò.

¹⁶Pengkey kenan dan okit, egbaet aw egpemegay dan te kelimahan.

¹⁷Wedà dan ketaga-taga aw eden se peokit amon doen kelinaw te pedowan dan.

¹⁸Wedà dan heman ketaga-taga te keilangan melemitan dan meg-inang te kenà ibeg te Timanem.”

¹⁹Na, netegahan tadon te yan se kagi te Timanem tepad te kedita tadon menge Judiyo, so kemonaan tadon se kineliwatan i Moises te menge punù. Yan eked kidon pekeikagi te wedad salà tadon, so okomen te Timanem se kedita te otaw te keneyonan.

²⁰Yan se doun te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so pineokit te pegketaga-taga tadon te menge punù ingkeliwat i Moises, netegahan tadon te salà se eg-inangen tadon.

²¹Meneng impetaga-taga den te Timanem kenitadon te doen den peokit ininang din amon eneng-enengen din te metòlid kidon. Kenà iyan pineokit te pegtolò tadon te punù ingkeliwat i Moises. Mebasa se peokit sìyan kidoen te kagi te Timanem insolat i Moises aw menge doma telekeliwat te kagi din.

²²Eneng-enengen te Timanem te metòlid kidon pineokit te pegpemenal tadon ki Jesu Cristo. Yan se inangen din diyà te kedita te otaw memenal, pengkey Judiyo aw otaw kenà Judiyo, so onawa se kedita te otaw.

²³Nekesalà se kedita te otaw. Wedad palos otaw mekeapet te ketòlid te Timanem.

²⁴Meneng pineokit te tabang te Timanem, inaneng-aneng din den te metòlid kidon. Yan se imbowang din kenitadon pineokit te pegpelowà i Jesu Cristo kenitadon lekat te salà.

²⁵Si Jesus se insogò te Timanem amon matay sikandin somelilin kenitadon. Pineokit te dipanog din, pegwedaden te Timanem se salà te otaw memenal kandin. Yan se ininang te Timanem amon ipetaga-taga din kenitadon te metòlid se eg-inangen din. Tandà te kelayat te pedowan din, wedà din tagmon pelumuni se otaw nekesalà kedengan.

²⁶Meneng songkani wedad salà eked din pelumuni amon ipetaga-taga din kenitadon te metòlid sikandin, aw eneng-enengen din te metòlid se teg sebad-sebad otaw egpemenal ki Jesus.

²⁷Yan se doun te eked kidon pegpelangkaw-langkaw. Eked kidon ikagi te inaneng-aneng te Timanem te metòlid kidon pineokit te pegtolò tadon te menge punù ingkeliwat i Moises, so pineokit te pegpemenal tadon ki Jesus se peg-aneng-aneng te Timanem te metòlid kidon.