Text copied!
CopyCompare
Kâte Bible - Roma - Roma 3

Roma 3:2-27

Help us?
Click on verse(s) to share them!
2Iŋuc aricne. Judaŋic jaŋe wiac bocjaha tahac‐jopakicne. Jaŋe hâcne Anutuzi biŋedâŋ fuŋne fuŋne jazame irec rune embiŋ.
3Eme weniŋuc? Judaŋic gâcne jaŋe dâŋte woŋec juku pârâckembiŋte ʒiŋuc muzo me? “Dodocke‐jeŋiczi Anutu mume sasanaŋ‐ticne bawahaocmu.”
4I aric kereŋne! Anutu e buc mume sasanaŋ â ŋic ine mumu dodocne, iŋuc muzo. Miti qâreŋ moc ʒiŋuc hâcne fokac: “Go mumutiŋgezi dâŋfâri eocmu, â mumutaragezi ɋaɋacne eocmu.”
5Eme hehesic‐nâŋeczi Anutu tiŋne‐ticnere fuŋne bajaŋgeŋkekacte weniŋuc muzo? Ʒiŋuc muzo me? “Fuŋne iŋuc fokacte Anutuzi irec okacne nâreme mi sâckeocmu.” (Dâŋ i ŋic mamanare sâcko mukopac.)
6I aric kereŋne! Anutu e hehesic‐nâŋecte okacne nâreme sâckeocmu. Mâc muzac wemocko mâreŋŋic ʒeŋgoma dâŋnâŋec sâcne mutarazac.
7Eme ŋifec ine burecdâŋ‐nanezi Anuture dâŋfâri dopeckeme ʒâŋe biŋe‐ticne irec erâ fekacko wemocte sifu no wâc sâqocne bapa munarehuc okacne nareekac?
8Erâ wemocte ʒiŋuc mi mueŋgopeneŋ: “Sâqocne bapene ŋerisierâ fârine biaŋne fuaoc me.” Nâŋe iŋuc mueŋgopeneŋ munârehuc micko âkec enâreeŋgopieŋ hâcne. Dâŋ iŋucne muhuc hata i âteeŋgopieŋ jaŋe okacne fua‐jareme sâckeocmu.
9Eme weniŋuc? Judaŋiczi ŋic gâcne jowarurâ sâc moc juŋgopeneŋ me? I aricne jâmbâŋ. Biac mumbeneŋ, Judaŋic â Grikŋic nânâc mâmâc sâqocnere kiŋaŋ qaeŋgopeneŋ.
10Dâŋqâreŋ moc ʒiŋuc hâcne fokac: “Ŋic moczi tiŋne moc mi jukac, aric ɋaɋacne;
11moczi mamanahec moc mi jukac, moczi Anutu wira basac mi ecneekac.
12Jaŋe qâsoriekicne sasawa, ʒeŋgoma repirembiŋ; moczi moc wiac biaŋne mi eekac, arictac jâmbâŋ.
13Marac‐jeŋic i hâmoc qâŋɋâŋ bâbâfua, nameŋ‐jeŋic forisieme eatuc dâŋ wefuekac, qotâ marasiŋ kisoŋnerâ jueŋgopieŋ.
14Bipic‐jeŋic sâwec â aaric dâŋte gegerockeekac.
15Ʒikare kike afec jueŋgopieŋ.
16Ima samaki bahuc tuhu bâfuaeŋgopieŋ.
17Wamare hata ine kâuc baeŋgopieŋ.
18Â ʒâŋe mai‐jeŋicko Anuture hâhâwic mi fokac.”
19Nâŋâc ʒiŋuc manaeŋgopeneŋ: Sâcmutâc dâŋ i dâŋ rune nâŋe nâzâkicne. I ŋic sasawa fuŋne‐nâŋec rituhuc micnâŋec ɋâtâocte ekicne. Eme ŋic mâmâc sasawa kiŋnâŋec Anuturao fua‐fârekac.
20Sâcmutâc dâŋte erâ kiŋ nânâwoc ro i Anutarao moc mi fokac. Sâcmutâc dâŋzi sindaŋ‐nâŋec bataniŋkeekac hâcne.
21Eme irec sâcmutâc dâŋ fohame Anutuzi tiŋne‐ticne fua taniŋkeocte hatane moc bâfuawec fokac, hata i sâcmutâc dâŋqâhâcko â porofete jaŋerao wâc biŋedâŋ‐ticne mu qâreŋ ekicne.
22Jesu Kristo manasiŋkehuc kiŋfâsâc erâ juju, hata i hâcne mamanasiŋhec sasawa jaŋere biŋe ekac. Fuŋne‐nâŋec bârâwiŋ mi fokac,
23Nâŋâc mâmâc sasawa sâqorembeŋte Anuture eri tatamacko fifisinere sâc mi eŋgopeneŋ.
24Ehame Kristo Jesu e kiwiric‐nâŋec rowecte Anutuzi aki anonoc‐ticnere erâ kiŋfâsâc bacnâpoekac.
25Eki mume Jesu e socticnezi sâqocne‐nâŋecte erâ taha bawec, eme e manasiŋkeniŋmuzi taha i biŋeckeniŋmu. Sâqocne ewarehuc jukicne irec kiŋ i Anutuzi buuruc‐ticnere râeme fowarehuc juwecte Jesu hâmocko râewecko tiŋnere fuŋne bataniŋkewec.
26E tiŋnere rune juekac, â Jesu manasiŋkeniŋmu jaŋe kiŋfâsâc bacjopaekac, irec fuŋne dameŋ ʒiŋuczia taniŋkeocte iŋuc hâcne ewec.
27Eme mumuteŋ‐nâŋec moc fokac me? Aricne, mumuteŋ‐nâŋec hetâtiekicne. Wemozi hetâtiewec? Eehâmo giere hatazi me? Aricne, mamanasiŋte hatazi.

Read Roma 3Roma 3
Compare Roma 3:2-27Roma 3:2-27