14“Poros masarakit nga mga panompa ang nagagoa sa andang baba.”
15“Kag maistan lang nga dipirinsya mapamatay nga lagi.
16Miski diin sanda magayan nagapangrangga kag nagadara kalisud.
17Kon parti sa mayad nga pagkaraiban ara sanda gid may naulaman.”
18“Kag ara sanda gid kaadluk sa Dios.”
19Karon, naulaman ta nga kon ano anang ginakoon ang Kasogoan, ginakoon kanatun nga mga Judio nga ginsakup sa Kasogoan. Gani indi kita makakoon nga bukun kita sirilotan. Ang tanan nga tao sa kalibotan mapanabat ra gid sa Dios tungud sa andang mga sala.
20Ay ara gid tao nga ibilang nga matarung ang Dios paagi sa anang pagsonod sa Kasogoan, tungud nga ginalapas na pirmi. Ang Kasogoan gintaw agud ipakita sa tao nga tana makasasala.
21Piro dadi ginpaulam kita run ang Dios kon paiwan kita maging matarung sa anang panulung. Dia nga pagpakamatarung bukun paagi sa pagsonod sa Kasogoan, kag ginapamatodan dia ang Kasogoan mismo pati ang mga propita ang ona.
22Ang tao ginapakamatarung ang Dios kon magtoo kay Jesu-Cristo. Kag ang Dios ara pinilian. Gani ang bisan sino nga magtoo kay Jesu-Cristo pakamaturungun na.
23Ay ang tanan nga tao obos gid nagkasala kag nagkolang sa anang kasadya ang Dios.
Roma 3
Roma 3:14-23