Roma 1:3-28

³Qâreŋkepie Ŋokâ‐ticnerao iticnewec. E sahachec fufua i Dawidi ɋâricfâc‐ticne jaŋeraonec fuawec,

⁴erâ e maŋɋaɋac bâbâfua Mârohec jujuzi Anuture Ŋokâ jukac, irec fuŋne hâmokonec faharewecko fua taniŋke‐jâmbâŋkewec.

⁵Jesu Kristo e Wofuŋ‐nâŋeczi aki anonoc enarehuc aposolo gie tahacnuwec. Ehuc mâreŋ sâc ŋic miti jazepe mana rereŋ epie Jesure ʒâŋe biŋe raocte munarewec.

⁶Eme ŋoŋe jaŋere âgofâc jaha, Jesu Kristore ŋicfâc eniŋte hefârec‐ŋopakicne, irec gie i ŋoŋerao iŋuc jaha bapere munarewec.

⁷Roma haeonec Anuture jorofâc, tiriŋic mucŋopakicne, ŋoŋere hâcne papia ʒi qâreŋkekopac. Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.

⁸Miti babaju‐ŋeŋicte mâreŋ sâc manapie biaŋkekacte qanaŋ ŋoŋere erâ daŋge mupe Jesu Kristorao qâra Anutu‐nanerao fotâcnekac.

⁹No Ŋokâ‐ticnere Biŋebiaŋ muhuc maŋnanezi Anutu kiŋaŋ qacnepe fuŋne‐nane manakacte ere maio dâŋ ʒi mupe mananiŋ:

¹⁰No numucneekopac sâc ŋoŋere mâmâc hati manasuekopac, ehuc Anutu maname sâckeme hata bâfua‐nareme ŋoŋerao fâpemurâ âzâcneekopac.

¹¹No ŋoŋe honec‐ŋopapere enareekac. Ehuc fârâ maŋte bâmec moc baŋarepe qiŋ herâ juniŋte muekopac.

¹²Me kecʒiŋuc mupe: No ŋoŋerao fâpe mamanasiŋte fârine nowac gowatuŋ ehuc keketeŋ enʒepeneŋ.

¹³Erâ âgofâc‐nane, fuŋne‐nane kâuc banʒipiŋte ʒiŋuc ŋazape: No ŋicguru gâcne jaŋerao eeckopac iŋuc jaha ŋoŋerao fârâ miti giere fârine piticne bâfuapemurâ hati muekopac. Erâ fâzo mupe sâc wiac gâcnezi niŋgiŋnume juekopac.

¹⁴Noni ŋic kosa, Grikŋic â kâte sanaŋ, mamanahec â mutucne mâmâc mitizi tofa bazu‐jarepemurâ munarekicne.

¹⁵Irec Romaŋic ŋoŋe iŋuc jaha Biŋebiaŋ ŋazapemurâ maŋnanezi afeckeekopac.

¹⁶No Biŋebiaŋte manape mimi gaŋgaŋnehec mi eekac, i Anuture tâpirihec, irec mana sakac eniŋmu sâc bâpiaŋ‐jopaocmu, Judaŋic hâcne, erâ Grikŋic mâmâc.

¹⁷Biŋebiaŋko hâcne Anuture tiŋne fua taniŋkeekac, i hâcne eki mamanasiŋhec jaŋe tahac‐jopaekac, ehame mamanasiŋko utuckeniŋmu. Dâŋqâreŋ ʒiŋuc hâcne fokac: “Biaŋkekicnezi mamanasiŋte erâ juju hotâckeocmu.”

¹⁸Ŋiczi ine Anutu qamaserâ sindaŋ ehuc kike hata‐ticne hesifuckeeŋgopieŋte kimbeŋ‐ticnezi sambâŋkonec fua taniŋkeekac.

¹⁹Anuture fuŋne gâcne ŋiczi mamanane i manaeŋgopieŋ, Anutu jahac bataniŋke‐jarewec.

²⁰Anutu e ŋiczi mi hohonene, â mâreŋ bâfuahuc ine wiac fuŋne fuŋne râewec izi tâpiri sanaŋ‐ticne â qâreŋ‐ticne bataniŋkeme sâcne hone mana tarac eeŋgopieŋ. Irec ŋic gâcne jaŋe wemocko kâuc bahuc sahac ŋeŋezic dâŋ muniŋmu.

²¹Jaŋe ine Anutu jukac i mana‐bipiehuc mi jukac‐tinac eha araŋ mi bacnembiŋ â mucne bacne mi ecnembiŋ, aricne. Jaŋe mumusifuc fuŋne fuŋne bâfuahuc maŋmutuc epie dapâczi foŋjopawec.

²²Ehuc nâŋe mamanahec juŋgopeneŋ muhuc sâke bâbâc eku maŋmutuc embiŋ.

²³Iŋuc ejareme jaŋe Anutu juju hati e araŋ mi bacnehuc ŋic â wipe â qowi â homa, wiac sisiroweme hâcne irec ɋâŋ qâqâtâc barâ araŋ bacnembiŋ.

²⁴Iŋuc epie Anutuzi hone suŋgiŋ ejareme maŋzi sasec kosa hurerâ mamakâc ehuc maŋ sahac‐jeŋic bâsâqorembiŋ.

²⁵Jaŋe Anutu jâmbomac rune râpeckerâ burec maickembiŋ. Ehuc ru bâbâfua‐jeŋic qikiŋnerâ wiac bâfuakicne araŋ bacnehuc kiŋaŋ qacnembiŋ. Wiac bâfua‐fârewec e mumuteŋheczi mumuteŋhec juraʒihuc jume sâckeocmu. Jâmbomac.

²⁶Ŋic jaŋe e hâcne râpeckembiŋte suŋgiŋ‐jopame sasec sâqocne jâmbâŋ bâfuambiŋ. Ehuc ŋokac jaŋe Anutuzi hata muwec i qâsorierâ mi jujuo rambiŋ.

²⁷Â ŋic jaŋe iŋuc jaha ŋowe ŋonâŋ juju qikiŋnerâ maŋjeŋicko sasecte ʒocsâko ʒame jaŋe jaŋackoaŋ mamakâc fuŋmoc bâfuambiŋ. Erâ bâbâsifuc‐jeŋicte okacne maŋ sahac sisipiric rombiŋ.

²⁸Jaŋe Anuture fuŋne mana‐bipiehuc enʒaŋauc ecnepie suŋgiŋ‐jopame maŋjeŋic bâzickeme wiac mi eene i hâcne embiŋ.