Roma 16:3-13

³Nge felan’ Got ngak Priska nge Aquila, ni yow e ur unew ngog ngu’ug pigpiggad ngak Kristus Jesus,

⁴nra pagew fan e pogofan rorow ni bochag. Kar magaergow — ni gathi kemus ni gag e gu be pining e magaer ngorow, ya ku errogon urngin e galesiya rok e pi’in gathi yad piyu Israel.

⁵Ngki felan’ Got ngak fare galesiya nma mu’ulung nga taferow. Nge felan’ Got ngak Epenetus, ni fager rog nrib t’uf rog, ni ir e som’on ni mich Kristus u wan’ u lan e nug nu Asia.

⁶Nge felan’ Got ngak Maria, nib gel e maruwel nike tay ni fan ngomed.

⁷Nge felan’ Got ngak Andronikus nge Junias, ni yigo’o gamad piyu Israel ni ur moyew rog u kalbus; ni yigo’o manangrow e pi apostel, mra mangew girdi’en Kristus ni yow mm’on rog.

⁸Nge felan’ Got ngak Ampliatus, ni ir reb e fager rog nrib t’uf rog ko ta’ab girdi’ ni kug ted Somol.

⁹Nge felan’ Got ngak Urbanus, ni ir reb e girdi’en e maruwel rodad ko maruwel rok Kristus, nge ngak Stakis, nreb e fager rog nib t’uf rog.

¹⁰Nge felan’ Got ngak Apelles, ni gelngin e yul’yul’ rok ngak Kristus e go’ kan nang. Nge felan’ Got ngak girdi’en e tabinaw ku Aristobulus.

¹¹Nge felan’ Got ngak Herodion, ni ku be’ u Israel, nge pi walagdad ni girdi’en Kristus ni yad girdi’en e tabinaw ku Narcissus.

¹²Nge felan’ Got ngak Tryfena nge Tryfosa, ni yow be muruwliy e maruwel rok Somol, nge ngak e fager rog nrib t’uf rog i Persis, ni bo’or e maruwel nike ngongliy ni fan ngak Somol.

¹³Nge felan’ Got ngak Rufus, ni ir e rib fel’ e maruwel rok u fithik’ e maruwel rok Somol, nge ngak e chitiningin, ni gubin ngiyal’ ma i ayuwegneg ni gowa be’ ni fak.