Roma 16:20-26

²⁰Eaubada loni tauleawana, nige eawalana Satani abo i ututawatawai aemiu ubudi eai. Eda Guiau Iesu Keriso ena ainauia arimiu eai i ota. Amen.

²¹Timoteo, helegu‐taupaisoa, eo Lukiso, eo Iasona, eo Sosipatela, egu eanua tataodi, se aitoiemiu.

²²Eau hinage, Teritio, teina leta tauurina ede, Guiau boeana eai ea lautoiemiu.

²³Gaio, egu aba‐aitaumana eo ekalesia gamagamagari edi aba‐aitaumana, i lautoiemiu, eo Eraseto, eanua ta edi tobo tauitawataina, eo Kwareto hinage, eda tau esau, se lautoiemiu.

²⁴Eda Guiau Iesu Keriso ena ainauia omi gamagarimiu arimiu eai i ota. Amen.

²⁵Ia arinai, henuapaipaimiu abina i ata, doha egu evanelia eai ea ribaei, eo Iesu Keriso ena lauguguia ribana eai hinage, doha hinage laulau‐eamuyamui se hemasarahamao, ia ede se toreyamui tanoubu ena abatubu eai wa, i laoma e huia ta.

²⁶Huia mo ta se hemasarahayama eo peroveta edi uriuri eai, Eaubada mauri nige nosina ena laugagaeo eai, eanua gamagamagari abo se heatadi, sunuma awaabina eai abo ie tubu.