Roma 15:8-12

⁸Hên haton lagi, ay nangako hi Apo Namalyari kanlan ninuno naên Israelita, ya mamiutoh yan Mámiligtas, ya Mesias. Ha pamanupad ni Apo Jesu-Cristo bayro ha impangako ni Apo Namalyari, ya mamiutoh yan Mámiligtas, ay namwangan naên ya pêtêg awud hên ampanupad hi Apo Namalyari hên pangako na.

⁹Gawan êt bayro ha pamanupad ni Apo Jesu-Cristo, ay naipahlêk ni Apo Namalyari ya ingalo na kanlan alwan Israelita. Haka gawan bayro ha ingalo na, ay ampagpuri hilay na kana. Habaytoy nakatupad ha impahulat ni Apo Namalyari kan Arin David hên hato, ya wani Arin David, “Puriên kata hên kalamo ko hilay alwan Israelita, haka magkanta kon pamagpuri kamo!”

¹⁰Inungkat hila êt di ha impahulat ni Apo Namalyari, ya wanan hulat, “Maghigla kaw, ya alwan Israelita hên kalamo yo hilay pinili ni Apo Namalyari!”

¹¹Nakahulat êt, ya wana, “Hikaw ya alwan Israelita, puriên yoy Panginoon! Hikaw ya atsi ha kaganawan bansa, ay magpuri kaw ngan kana!”

¹²Êmbayri êt ya impahulat ni Apo Namalyari kan Propeta Isaias, ya tungkol kan Apo Jesu-Cristo, ya wanan hulat, “Lano, ay lumatêng ya mihay kaapo-apoan ni apo Jesse. Hiyay iutoh ni Apo Namalyari hên mamaala kanlan alwan Israelita. Haka taganán muwang la, ya tuparên nay impangako na.”