8Na i mangu di gamu, salu Krayst dini du tmabeng i dad to Dyu, du fye gfiten di dale too glut dnohò Dwata dad tafakangan di dad gutambulla,
9du fye balù gamu dad ise Dyu fakay dmayen Dwata gablà di kakdon gamu, du di Tnalù Dwata nun gman Krayst, manan, “Dmayen agu ge Dwata, gagin i dad to ise Dyu, na mlingag agu dmayen ge.”
10Lêmanan man, “Gamu dad to ise Dyu, too gamu flehew, gagin di dad Dyu, i muna dad to mgalék Dwata.”
11Léan man, “I kdeeyu dad ise Dyu, dnayenyu Dwata i Amu, i kdeeyu dad to, mlingag gamu du dmayen kenen.”
12Gman fa Isaya, manan, “Nun duh kadang nun satu bel Dyési magot i dad to ise Dyu, na kenen mgimò gumdà i kdee kafye fatanla.”