Roma 15:6-19

⁶Yan megsebad kaw heman domuyun te Timanem Amay te Pengolo tadon si Jesu Cristo.

⁷Yan, pegpeidoway kaw iling te pegkeido i Cristo te kedita niyo amon iduyun se Timanem.

⁸Ipeaneng-aneng ko den kenyo te insogò te Timanem si Cristo diyà kenami menge Judiyo amon ipetaga-taga din te ontò keseligan se kagi te Timanem, so tinoman i Cristo se impakang te Timanem diyà te menge kemonaan day gebii.

⁹Impetaga-taga heman i Cristo te menge otaw kenà Judiyo te neidowan dan te Timanem amon domuyun dan heman kandin, so doen kagi te Timanem insolat, kagi din, “E Timanem, pengkey doton te menge otaw kenà Judiyo, megpesiontong a diyà kamno doma dan. Iduyun day sikona pineokit te pegdelangan day.”

¹⁰Doen heman doma kagi te Timanem insolat, “Sikiyo menge otaw kenà Judiyo, doen den keluba niyo doma te menge Judiyo tapay pinemallì te Timanem.”

¹¹Doen heman doma kagi te Timanem insolat, “Kedita niyo menge otaw kenà Judiyo, duyun kaw te Pengolo tadon. Keilangan domuyun se kedita te otaw kandin.”

¹²Doen heman insolat i Isaias gebii, “Lekat te menge bowad-bowad i Isai, doen sebad otaw domateng amon lomowan diyà te menge otaw kenà Judiyo, aw sikandin se seligan dan.”

¹³Timanem se eglekatan te kedita te egpelimanan tadon. Ibeg ko, begayan kaw din te ontò keluba aw kelinaw te pedowan niyo tandà te pegsalig niyo ki Cristo, amon melobos se pegpeliman niyo pineokit te tabang te Espiritu Santo kenyo.

¹⁴Menge kedowa ko, netegahan ko den te gayed mèpiya se eg-inangen niyo, aw tinoledaan kaw te kebenalan tepad te Timanem, aw mekebatog kaw heman megpetoledaay.

¹⁵Meneng wedà a pegketalaw te pegsolat ko kenyo amon eked niyo kelibeli se kagi ko. Tandà te tabang te Timanem kanak,

¹⁶ininang a din sogounun i Jesu Cristo, aw insogò a din doton te menge otaw kenà Judiyo, so pineokit kanak dimateng den kandan se Mèpiya Indan lekat te Timanem. Yan kininawà den dan te Timanem, so ininang dan egpenimanem pineokit te Espiritu Santo.

¹⁷Tandà te tabang i Jesu Cristo kanak, wedad ingkeyàyà ko tepad te pegtolò ko te Timanem.

¹⁸Olò a meg-indan kenyo tepad te ininang i Cristo pineokit kanak. Doen den menge otaw kenà Judiyo egtolò te Timanem pineokit te pegtoladà ko aw peg-inang ko,

¹⁹aw pineokit te menge kepelahan egkeinang, aw pineokit te tolos te Espiritu Santo. Yan migtoladà a te Mèpiya Indan tepad ki Cristo doton te kedita te ogpeanan lekat te Jerusalem taman te Ilirico.