Roma 15:11-33

¹¹Erâ moc ʒiŋuc: “Qâpuc ŋoŋe ʒeŋgoma Wofuŋ mucne bacnenʒepieŋ, â ŋicne ŋicne jaŋe e muac baafec ecnenʒepieŋ.”

¹²Erâ Jesajazi dâŋ moc ʒiŋuc mu qâreŋ ewec: “Jâctuc Isai gitecne fuarâ eki qâpuc Wofuŋ ejareocmu; eme qâpuczi ere mamanac juniŋmu.”

¹³Ʒeŋaŋ rune Anutu e mamanasiŋ‐ŋeŋicte bubiaŋ â wama bâfua‐ŋareme Tiri Mârore tâpirio ŋesiŋnepie sambâŋ ʒeŋaŋ‐ŋeŋicte manariŋ qâriŋ ŋoŋerao fua ŋeiŋ ezejec.

¹⁴Âgofâc‐nane, ŋoŋe uruc jauŋ‐ŋeŋic fokac â mitire fuŋne i wâc sâcne mana‐hâmoŋgopieŋ, irec ŋaŋaczia faŋ qaqac ezo murâ mi bititieniŋmu, i no fuŋne‐ŋeŋic iŋuc hâcne mana sanaŋkekopac.

¹⁵Erâ sifu no Anutuzi miti gie tahacnuwecte dâŋ gâcne i mai qanʒaŋ jaha qâreŋke‐ŋarehuc mitire manasu‐ŋarekopac.

¹⁶Jesu Kristo e qâpuc ŋoŋere miti kiŋaŋŋic râecnuwecte no Anutu Biŋebiaŋ‐ticnere taha bapa gie bape Tiri Mârozi maŋfuru bacŋopame Wofuŋte taha biaŋ enʒepieŋ.

¹⁷No Anuture gie baekopac i Jesu Kristore erâ manape fefene eekac.

¹⁸Gie i nahackoaŋ wemo‐nanezi bazapo, aricne, Jesu Kristozi neŋgoc ŋenareha qâpuc jaŋe miti mana rereŋ eniŋte miczi â mezi gie bapo.

¹⁹No tâpiri â mâsihec juhuc Tiri Mâroraonec hâbi rorâ Jerusalem haeonec fuŋkerâ Kristore Biŋebiaŋ mâreŋ râreckehuc muiŋne rakupe Ilirikoŋ mâreŋko mickewec.

²⁰Ehuc gâcne jaŋere hâsinao bazipore Kristore ʒâŋe biŋe mi ra fisiwecko furunao ʒocne qapemurâ herâ wâwânʒâŋneekopac.

²¹Dâŋqâreŋ ʒiŋuc hâcne fokac irec sâcko eekopac: “Dâŋ binaŋ‐ticne mi ejarekicne jaŋe e honeniŋmu, â biŋe‐ticne mi manambiŋ jaŋe mamanahec eniŋmu.”

²²No fuŋne iŋucte hâcne ŋoŋerao fâpemurâ dameŋ sâc quŋkeekopac.

²³Juwarepo i ŋoŋerao fâpemurâ maŋzi sawa manahuc jupo, ʒi ine mâreŋ gâcnao gie‐nane tarakacte

²⁴Sipen mâreŋko razo ehuc ŋoŋerao fisipemurâ manasukopac. Fisipe ŋoŋehec sahac hâroŋ qaqac erâ ŋoŋeraonec moc moczi qâtecnupie mâmâc Sipen mâreŋko ranʒepeneŋ.

²⁵Dameŋ ʒiŋuczia ine mitiŋic kiŋaŋ qajarehuc Jerusalem haeo razo ekopac.

²⁶Makedonia â Akaia kikefuŋ jaŋe Jerusalem haeonec mitiŋic hapetac dopec‐jopaniŋte afeckerâ mupaŋkembiŋ.

²⁷Jaŋe buafec‐jeŋicte iŋuc epie sâckewec. Qâpuckonec miti mamana jaŋe Jerusalem haeonec mitiŋic jaŋeraonec miti boreŋ rombiŋte tofa jaŋerao fokac. Eme tofa i hâcne bazu‐jareniŋte sahackopec wiac jarepie sâckeocmu.

²⁸Eme mumupaŋ‐jeŋicte fârine fuawec i no nahac bararâ jarepe tarame ŋoŋerao fotâcnehuc Sipen mâreŋko rapemu.

²⁹Erâ no manakopac, ŋoŋerao metariŋ mi fâpemu, Kristoraonec jambuŋ kadahe bafâpemu.

³⁰Âgofâc‐nane, no Wofuŋ‐nâŋec Jesu Kristo ere erâ â Mârore jauŋte erâ hazec qâuŋ ŋazakopac, ŋoŋe nore erâ Anutu numucnehuc juju gie‐nanere baficnunʒepieŋ.

³¹Baficnupie Anutuzi Judaia mâreŋko ŋic jaŋere meonec bataracnuzejec, â Jerusalem haeonec mitiŋic bubiaŋ wiac jarepe aŋac‐jopazejec.

³²Izi ʒâhec Anutuzi manahame bubiaŋko fârâ ŋoŋerao jumanahuc âke mâteŋnuzejec.

³³Anutu wama rune eki ine ŋoŋehec jufârezejec. Jâmbomac.