Roma 12:1-19

¹Kaka-pail in namnau me! Undeng Ama Lamtua tulu Un dalen in namnau ka bel kit son, tiata auk nodan le mi sao mi aap-inan nas tetema bel Una, banansila el hmukit kuli, man pake taung in todan-lahing. Na man tao Ama Lamtua dalen kolo. Dil dididi le daek muid Un in koma ka, nol mi musti nuil niu, ta na man tulu mi in namnau ka, nol mi in todan Ama Lamtua ka. Eta mi tao ela lam, na toma.

²Muid atuil apan-kloma halas ni in hanet mi le tao elola, tamlom nuil elol muid oen in koma-koma ka deken. Nol suma toe muid oen in nangan na, tam oen in nuli ka, tamlom oen hadat ta ela tuun deken. Mo banan dui ka, nang le Ama Lamtua tao mi in nangan na daid balu, le mi ngat totoang nas muid lalan balu ka. Nini ela lam, mi taan nal Ama Lamtua in kom taung mia ka. Ta Ama Lamtua in koma ka banan isi, leko, nol tao Un dalen kolo.

³Undeng Ama Lamtua nutus auk son, nol tulu Un dalen banan na bel auk son, tiata auk tek mi elia: sukat mi apan nas nini lalan in toma! Nikit-nikit apan nas dui deng in toma ka deken. Sukat nini in muik peke lo ka deken. Atuli li mesa-mesam musti nukleka, le nangan taan karunya man Ama Lamtua belen son, undeng un in parsai se Kristus sa.

⁴Kat kleta deng atuli li aap-inan. Aap-ina mesam lam bating opa mamo. Op mesa lam nonool un osa bakisa-bakisan.

⁵Ela kon, nol kit in butu-kil nol Kristus sias. Kit hut mamo, mo kit butu-kil apa banansila el aap-ina mesa. Nol atuli li mesa-mesam osa bakisa-bakisan, banansila el aap-inan man bating op mamo ka. Mes parlu mesa. Tuladang el, iman man in daid nutus son deng aap-inan nia ka, muik nahin pait lo son, ta lo?

⁶Mo mi musti tana, noan, Ama Lamtua bel kit totoang kuasa, le lako-daek osa bili-ngala, undeng Un kom le tulu Un dalen banan na bel kita. Tuladang nga el, eta Ama Lamtua bel ku kuasa le tek Un in hida ka lam, ku musti tek puting in hida na totoang. Mo tek dui deng in hida na deken.

⁷Eta Ama Lamtua bel ku karunya in lii-lau atuil didang ngam, ku musti lii-lau oen nol babanan. Eta Un bel ku karunya le tui atuil deng Una lam, ku musti tui oen nol babanan.

⁸Eta Un bel ku karunya le tao atuli li halin makoe lam, ku musti tao oen le makoe baktetebes. Eta Un bel ku kuasa le hulung atuil nini ku hmuki las sam, bel ku hmuki-nalan nas le hulung one. Eta Un bel ku karunya le daid tulu taung atuli las, le halin oen lako-daek Un osa la banan dui pait tam, ku musti tade nol makoe le daid tulu baktetebes. Eta Un bel ku dael in namnau le hulung atuil in susa ngas sam, ku musti tulung oen nini dalen in kolo.

⁹Eta mi tulu mi in namnau ka bel atuli lam, tulu in namnau man baktetebes sa; boel sila-klup tuun deken. Bali kudi deng totoang man in daat tas, le kil dididi se totoang man in banan nas.

¹⁰Mi atuil in sarani ngas musti namnau apa mes nol mesa. Dil dididi le tulu in todan apa mes nol mesa.

¹¹Eta mi dake lam, daek nol in makoe boel tailuang tuun deken. Se oras mi in dake ka, daek nol dael kolo. Nol daek taung kit Lamtuan na.

¹²Mi musti dalen kolo, undeng mi taan asa man Ama Lamtua in le daek bel mia ka son. Eta haup in susa kam, tahang mumuun. Kohe-kanas duman-lelo; boel teen deken.

¹³Nini mi hmuki-nalan nas le hulung atuil sarani man parlu in hulung ngas. Eta muik atuli maa deng maan didang ngam, simus le beles in kaa-ninu, nol nang le oen daad tahang se mi uma. Nini ela lam, mi tulu in namnau bel one.

¹⁴Eta muik atuli in tao sus mi tutungus sam, nodan le Ama Lamtua Allah beles hangun. Boel bahang oen deken! Na man toma!

¹⁵Eta muik atuli dalen kolo kam, dalen kolo leo-leo nolan. Nol eta muik atuli in lilu undeng un dalen ili lam, lilu leo-leo nolan.

¹⁶Nuil namnau apa nol dalen mesa. Boel koaok deken. Molam tao mi apan nas deng dadale, le nakbua nol atuil in biaas tuun nas kon. Boel nikit-nikit apan le nangan noan, suma ku sii man taan dui deken.

¹⁷Etan atuli tao ku dadaat tam, ku boel balas nol daat deken. Mo ku nuting naan lalan in banan dui, man totoang atuli li simun.

¹⁸Eta bole lam, nuting lalan le nuil mole-daem nol totoang atuli lia.

¹⁹Kaka-pail in namnau me! Boel balas in daat ta nini daat deken. Nang le Ama Lamtua man ator esa. Ta Un koon-mali, eta atuli daek dadaat, banansila el in dul ne Buk Niu ka noan, “Kit Lamtuan na esa tek noan, Auk man muik hak le balas in daat tas. Ta Auk man bel hukung atuli li in daat tas.”