Roma 11:4-34

⁴Ia arinana Eaubada i heuio, i ene edoha? I ene, “Tatao tausani haligigi‐labui ea abidi isi sora nige Baala nuanuana eai se turibono.” (1. Kings 19.18.)

⁵Hinage doha teina huia ta ainauia hinerina debana eai tupona gagirina mo se mia.

⁶Ena ainauia debana eai se hineridi, abo nige laulau debana eai, ata ainauia nige ainauia mamohoina.

⁷Abo edoha? Isaraela ginauri wa i eooi nige i lobai; tauhinehineridi se lobaiyao, na wau isi headi wa matadi se hegibudi.

⁸Doha se uriyao si ene, “Eaubada mataenoeno earuana i mosei aridi eai, matadi taba nige se ita, eo beadi taba nige se ataiei i laoma e huia ta.” (Is. 29.10; Deu. 29.4.)

⁹Na Davida hinage i ene, “Adi aiai abo i hemala sa’i eo i hemala puru beubeu, eo edi aba‐alabesibesi, eo edi abahemahemaisadi;

¹⁰matadi abo se hegaugaudi isi taba nige se ita, eo huia gamagamagari dageladi abo u heporoudi.” (Psa. 69.22-23.)

¹¹Ea oimuri, ea ene, isi se alabesibesi, abo se guri esegai? nige ariariri! Na isi edi guri eai Murimuri‐tataodi abo abihemauri se hearo; Isaraela abo se heaiaromagigiriedi.

¹²Teina edi guri ta tanoubu edi abalolo, eo edi heberuberu wa Murimuri‐tataodi edi aba‐lolo hinage: sora isi se hetorouioidi abo se heloloaririedi.

¹³Omi Murimuri‐tataomiu ea ribalaowa arimiu eai, paana eau Etene edi aposotolo, egu paisoa ta ea hesae:

¹⁴bena egu eanua tataodi egu abiabi eo iilagu eai abo ea headidiridi, isi headi abo se mauri.

¹⁵Taba isi wa se tauotaotaedi, debadi eai tanoubu abo se laubiriei, ena se abiuioidi abo i hemala mate eai abahemauridi, e nige’e?

¹⁶Ena elahouna se hetabuei, maudoina hinage se hetabuesegai; ena oeagi lamna se hetabuei, abo laganayao hinage.

¹⁷Ena laganayao headi se tagasi, eo oa, doha olive nuura, lagam se torehepatulaei boeadi eai, eo olive mamohoi wa lamna eo adidirina u abiesegai,

¹⁸tabu hari laga aridi eai u ribapasipasiuioim. Na u ribapasipasiuioim wa, lamna oa nige u hetoro, lamna oa ede i hetorom.

¹⁹Oa abo u ene, “Laganayao se hetagasidi bena se torehepatulaegu.”

²⁰Doha ede, isi nige se nuatuwatai arinai ede se tagasi; oa, sunuma debana eai, u helaudamaidi. Tabu u ribatausaem, na u matausi mo.

²¹Ena Eaubada laganayao mamohoi nige i nuahidi, u komakomanim, ata hinage oa nige i nuahim.

²²Hage Eaubada ena abilolo eo ena abi‐ouyalayala u itadi; isi tauguri wa ena abi‐ouyalayala i beudobima potadi eai; na oa, ena abilolo i laowa arim eai ena u miahai ena abilolo boeana eai: ena nige’e, oa abo se tomgabaem.

²³Isi hinage ena edi awayagara eai nige se miatahitahi abo se tore‐hepatudima, paana Guiau torehepatuuioidi abina ie ata.

²⁴Ena oa, olive nuura eai i ini gaibu, se talahaim, eo nige em aba’ini mamohoi na se torehepatum olive lolona arinai, isi laganayao mamohoi wa, isibom edi olive boeana eai abo se torehepatuuioidi, e nige’e?

²⁵Egu tataoyao e, riba esau nabada wa nige se heribamonihinihimiu tabu nuamiu se ponoponoei, ata omibom ami sanapu nige se lolo; ia ede ea ene Isaraela matadi se hegaugaudi i lau e Murimuri‐tataodi gamagamagari se lageohima.

²⁶Arinai Isaraela se ohihai abo se hemauridi. Doha uriuri tabuna eai si ene, “Siona boeona eai Tauabihemauri abo i tubuma, Eaubada matausina nige se matausi, meta abo i duiei Iakobo arinai;”

²⁷“na egu ribahesunuma aridi eai ede ina: isi edi baaea abo ea laehesuaradi.”

²⁸Evanelia arinai Iudea tataodi se hemala Eaubada ena waiunuyao omi debamiu eai; na Eaubada ena riba hinehineri eai, isi i gadosisiaririedi tamadiyao debadi eai.

²⁹Paana Eaubada ena ainauia eo ena eogayogahai, taba nige nuana i bui.

³⁰Doha hinage omi nabada wa Eaubada au awaawayagaraei, na huia ta isi edi awayagara debana eai nuatoatoa au lobai;

³¹isi hinage huia ta se awayagara, nuatoatoa enamiu wa debana eai, bena isi hinage nuatoatoa abo se lobai.

³²Paana isi gamagaridi i awa‐tauawaawayagaraedi bena gamagaridi hinage abo i nuatoatoaheohidi.

³³Eaubada ena sonoga eo ena nuatu sibasiba haedi edi abaohi! Ena nuatu dudurai taba nige esau i eooiheohi, ena laulau taba nige esau i italobai!

³⁴“Guiau nuana, eai ie ita? Eo eai hinage ia i ribasagui?” (Is. 40.13-14.)