3E Israe ŋic jaŋere dâŋ muhuc Anutu ʒiŋuc âzâcnewec: “Wofuŋ, jaŋe porofetefâcge jopa‐fârehuc alatage henʒaŋnembiŋ, eme ʒi buc juhape no wâc nuniŋte muŋgopieŋ.”
4Iŋuc mume Anutuzi dâŋ weniŋuc bâtikiecnewec? “No ŋic 7000 sakarec‐jopape Baali nemu mi dapecnembiŋ.”
5Eme dameŋ ʒi iŋuc jaha Anutuzi aki anonoc‐ticnere erâ ŋic tiwâne rowosâec‐jopawec juŋgopieŋ.
6I aki anonoc‐ticnere iŋuc ejarewecko juju bapa‐jeŋicte mi ejarewec. Iŋuc mi eme muzac, ine aki anonoc fârine mi ezac.
7Eme weniŋuc? Israe ŋic jaŋe wiac fârine bâfuazo mumbiŋ i mi bâfuambiŋ; rowosâec‐jopakicne jaŋe sawa bâfuambiŋ, gâcne sâko ine maŋsanaŋ embiŋ.
8Irec ʒiŋuc hâcne qâreŋkekicne fokac: “Anutu e maŋjeŋic bâsifuckewec, ʒâŋe‐jeŋic bâhâpowec â hazec‐jeŋic qâzic qawec. Iŋuc ejareha jumbiŋzi jueŋgopieŋ.”
9Â Dawidizi mu qâreŋ ewec: “Jaŋe nânâ nahapie râsi fisipie fâfâc‐jopazejec, Mâreŋko jopaha okacne fisi‐jarezejec.
10Go ʒâŋe‐jeŋic bâhâpotec tiŋtuŋ qanʒepieŋ, â râpe‐jeŋic bahasicketec miŋgeŋ miŋgeŋ junʒepieŋ sanaŋ.”
11Eme wiokopac: Israe ŋic jaŋe fâfâc‐jopawec i waha qâhâmoc‐jopaocte iŋuc fuawec me? Iŋuc aricne, jaŋe bâbâpiaŋ râpeckepie qâpuc jaŋere biŋe ewec, ine qâpuc jaŋe manapie Israe ŋic jaŋe honec‐joparâ iiŋguuŋ ejareniŋte iŋuc fuawec.
12Eme miti qiqikiŋ‐jeŋiczi mâreŋ sâc ŋic jaŋerao miti mâriri bâfuawecko, â dodocke‐jeŋiczi ŋic qâpuc jaŋerao miti ʒâkâŋ bâfuawecko, opoŋ, juku furu jaha maŋjeŋic bârisiepie fârine mo iŋucne fuazokac!
13Qâpuckonec opâ ruac ŋoŋe dâŋ ʒi ŋazape mananiŋ: No qâpuc ŋoŋere aposolo juekopaczi gie‐nane baericko baʒihuc baekopac,
14i soctofafâc‐nane âkeriŋ‐jopape gâcnezi bâjâpecnuhuc biaŋkeniŋte.
15Anutuzi Israe ŋic behec‐jopame mâreŋ sâc miti fuawec, izi juku rocjopame mi hâmockonec ɋâɋârezi fuazokac me?
16Nânâ hata qaqasune jambuŋkepene nânâ mâmâc sâcke‐fâreekac, â jâc gâtânezi furu fome tieŋne iŋuc jaha furu foocmu.
17Eme Anutuzi tieŋne gâcne hetâcne behec ehuc irec dodoma tacko oliwa kâteo fuakicne irec tieŋne go râe ʒuhuc egarewec. Eme oliwa gâtânere ŋiŋic wokemaŋzi gume hesiwiŋ egarehame,
18go tieŋne raŋɋane mi mana pitiwac‐jopahuc maŋfefe mi ezemec. Iŋuc ezicte ʒiŋuc manac: Go gâtâ gume hesiwiŋ mi ecnekomec, gâtâzi go egareekac.
19Mupe go ŋifecne ʒiŋuc mecne mucmu: “Anutuzi no hâcne râe ʒuhuc enareocte tieŋne raŋɋane hetâcne behec ejarewec.”
20I mukic mac. Jaŋe miti qiqikiŋ‐jeŋicte hetâcne behec ejarekicne â go ine mamanasiŋgere dodomatac‐jeŋicko domakomec. Irec go sahacge mi bafehuc rumerâ juzemec.
21Anutu e oliwa e jahacne tieŋne mi akickewecko go iŋuc jaha mi akicguocmu.
22Irec go buuruc‐ticnere mecne â fâro‐ticnere mecne mi nikecguzejec. Fâro‐ticnere fârine i miti râpeckembiŋ jaŋerao fuawec, â buuruc‐ticnere fârine i gorao fuawec. Eme go erao qohotahuc jutec fârine i sâcne fogareocmu. Iŋuc mi etec ine go wâc hetâcne behec egareocmu.
23Erâ wâc tieŋne raŋɋane jaŋe maŋsanaŋ‐jeŋic beheniŋmuo Anutuzi mocwâc râe ʒuhuc ejarezo murâ sâcne ejareocmu.
24Eme kâteonec oliwa rocgurâ hae oliwa jâcnao râe ʒuhuc egareweczi hae oliwa e jahacne tieŋfâc mocwâc ʒuhuc‐jopazo murâ mi quŋkeocmu, i onʒoŋ jaha ʒuhuc‐jopaocmu.
25Âgofâc‐nane, ŋoŋe, kâuc bahuc ŋaŋacne mamanao roweckerâ mana sifuckenʒipiŋte dâŋ soŋne ʒi mufua‐ŋarepe. Israe ŋic tucne jaŋe maŋsanaŋ erâ juhapie qâpuc sâko jaŋe mitire maŋko raʒiniŋmu.
26Raʒihapie ʒâhec Israe ŋicguru qâqâhâc biaŋke‐fâreniŋmu. Ʒiŋuc hâcne qâreŋkekicne fokac: “Zioŋ haeonec Bâbâpiaŋ moc fuarâ Jakoborao jawa âsu gârec ofaŋneme raocmu.
27Iŋuc eme no sâqocne‐jeŋic ʒurerâ jaŋehec mocwâc ʒâʒâfic epemu.”
28Israe ŋic jaŋe qâpuc ŋoŋere erâ Biŋebiaŋte râsi juŋgopieŋ â rowosâec‐jopakicnere ine mimiŋnefâc‐jeŋic jaŋere erâ Anuture jorocfâc juŋgopieŋ.
29Anutu e âgo ʒâʒâfic dâŋsaric‐ticne â hehefâre dâŋticne mi dockeocmu.
30Qâpuc ŋoŋe mârâc jaha maŋsanaŋ erâ jumbiŋ, eme ʒâhec Israe ŋic jaŋe maŋsanaŋ ehapie Anutuzi buuruc‐ticnao râec‐ŋopawec.
31Iŋuc jaha jaŋe maŋsanaŋ juhapie Anutuzi buuruc‐ticnao râec‐ŋopawec, i jaŋe wâc buuruc ejareocte iŋuc ewec.
32Anutu e ŋic sasawa bâturec‐jopahuc qaqatarao basanaŋ‐jopawec, i mâmâc sasawa buuruc‐ticnao râec‐jopaocte iŋuc ewec.
33Opoŋ, Anutu e mitire mâriri â maŋɋârâŋ â mamana saric‐ticne irec ʒâkâŋne mo iŋucne fokac! Mumutara‐ticnere fuŋne i ŋiczi mi mamanane â gie bapa‐ticnere hata i ŋiczi mi hohonene.
34“Wofuŋte maŋko dâŋ fokac i mo ŋiczi manawec, me dâŋ muhame mozi bafickerâ muwec?”
35“Me mo ŋiczi e qanaŋ wiac moc qikiŋnecnewecko tofane bazucneocmu?”
36Wiac sasawa eraonec wareekac â erao siŋkerâ foekac â erao rafâreekac. Mumuteŋzi mumuteŋ i erao ʒuhuckeme ʒuhuc foraʒihuc juzejec sanaŋ. Jâmbomac.
Roma 11
Roma 11:3-36