Roma 11:2-20

²Anutuzi qanaŋ manac‐jopawec ŋic i mi behec‐jopawec. Me ŋoŋe Eliare binaŋ miti papiao i wose manac mi eeŋgopieŋ me?

³E Israe ŋic jaŋere dâŋ muhuc Anutu ʒiŋuc âzâcnewec: “Wofuŋ, jaŋe porofetefâcge jopa‐fârehuc alatage henʒaŋnembiŋ, eme ʒi buc juhape no wâc nuniŋte muŋgopieŋ.”

⁴Iŋuc mume Anutuzi dâŋ weniŋuc bâtikiecnewec? “No ŋic 7000 sakarec‐jopape Baali nemu mi dapecnembiŋ.”

⁵Eme dameŋ ʒi iŋuc jaha Anutuzi aki anonoc‐ticnere erâ ŋic tiwâne rowosâec‐jopawec juŋgopieŋ.

⁶I aki anonoc‐ticnere iŋuc ejarewecko juju bapa‐jeŋicte mi ejarewec. Iŋuc mi eme muzac, ine aki anonoc fârine mi ezac.

⁷Eme weniŋuc? Israe ŋic jaŋe wiac fârine bâfuazo mumbiŋ i mi bâfuambiŋ; rowosâec‐jopakicne jaŋe sawa bâfuambiŋ, gâcne sâko ine maŋsanaŋ embiŋ.

⁸Irec ʒiŋuc hâcne qâreŋkekicne fokac: “Anutu e maŋjeŋic bâsifuckewec, ʒâŋe‐jeŋic bâhâpowec â hazec‐jeŋic qâzic qawec. Iŋuc ejareha jumbiŋzi jueŋgopieŋ.”

⁹Â Dawidizi mu qâreŋ ewec: “Jaŋe nânâ nahapie râsi fisipie fâfâc‐jopazejec, Mâreŋko jopaha okacne fisi‐jarezejec.

¹⁰Go ʒâŋe‐jeŋic bâhâpotec tiŋtuŋ qanʒepieŋ, â râpe‐jeŋic bahasicketec miŋgeŋ miŋgeŋ junʒepieŋ sanaŋ.”

¹¹Eme wiokopac: Israe ŋic jaŋe fâfâc‐jopawec i waha qâhâmoc‐jopaocte iŋuc fuawec me? Iŋuc aricne, jaŋe bâbâpiaŋ râpeckepie qâpuc jaŋere biŋe ewec, ine qâpuc jaŋe manapie Israe ŋic jaŋe honec‐joparâ iiŋguuŋ ejareniŋte iŋuc fuawec.

¹²Eme miti qiqikiŋ‐jeŋiczi mâreŋ sâc ŋic jaŋerao miti mâriri bâfuawecko, â dodocke‐jeŋiczi ŋic qâpuc jaŋerao miti ʒâkâŋ bâfuawecko, opoŋ, juku furu jaha maŋjeŋic bârisiepie fârine mo iŋucne fuazokac!

¹³Qâpuckonec opâ ruac ŋoŋe dâŋ ʒi ŋazape mananiŋ: No qâpuc ŋoŋere aposolo juekopaczi gie‐nane baericko baʒihuc baekopac,

¹⁴i soctofafâc‐nane âkeriŋ‐jopape gâcnezi bâjâpecnuhuc biaŋkeniŋte.

¹⁵Anutuzi Israe ŋic behec‐jopame mâreŋ sâc miti fuawec, izi juku rocjopame mi hâmockonec ɋâɋârezi fuazokac me?

¹⁶Nânâ hata qaqasune jambuŋkepene nânâ mâmâc sâcke‐fâreekac, â jâc gâtânezi furu fome tieŋne iŋuc jaha furu foocmu.

¹⁷Eme Anutuzi tieŋne gâcne hetâcne behec ehuc irec dodoma tacko oliwa kâteo fuakicne irec tieŋne go râe ʒuhuc egarewec. Eme oliwa gâtânere ŋiŋic wokemaŋzi gume hesiwiŋ egarehame,

¹⁸go tieŋne raŋɋane mi mana pitiwac‐jopahuc maŋfefe mi ezemec. Iŋuc ezicte ʒiŋuc manac: Go gâtâ gume hesiwiŋ mi ecnekomec, gâtâzi go egareekac.

¹⁹Mupe go ŋifecne ʒiŋuc mecne mucmu: “Anutuzi no hâcne râe ʒuhuc enareocte tieŋne raŋɋane hetâcne behec ejarewec.”

²⁰I mukic mac. Jaŋe miti qiqikiŋ‐jeŋicte hetâcne behec ejarekicne â go ine mamanasiŋgere dodomatac‐jeŋicko domakomec. Irec go sahacge mi bafehuc rumerâ juzemec.