Rom kimbi 7:8-19

⁸Köna keu qahö ahöbawak, siŋgisöndoknöŋ mönö keu omaŋi aka köhömuŋi akawak. Mewö akawakmö, jöjöpaŋ keu mötpiga sel jöhöm niŋgiiga mi walöŋmamaŋgö könaŋi ahuiga siŋgisöndok aki asuhuyök. Jöjöpaŋ keunöŋ mönö kuŋgum niŋgiiga urunan wahöriga sihim kömbönaŋni bölöŋi könaŋi könaŋi asuhum tiŋgitketka bölöŋaŋgöra laŋ köpösöŋgömakzal.

⁹Mutuk Köna keu qahö möta tönpin malalmö, jöjöpaŋ keu mötpiga miaŋön aŋgön köl niŋgiyöhaŋgöra siŋgisöndokö sihimnan guliiga urunan wahöri mi ahal. Siŋgisöndok akiga mem kömum niŋgiiga köhömuŋi ahal.

¹⁰Anutunöŋ jöjöpaŋ keu mi wuataŋgöba mal köhöimamgöra aka al niŋgiyökmö, keu mi wuataŋgömamgö esapköbiga mem kömum niŋgiiga köhömuŋi ahal. Köhömuŋi ahali, miaŋön mönö aukŋe asuhui miwikŋaial.

¹¹Jöjöpaŋ keu möt kutubiga sel jöhöm niŋgiiga mi walöŋmamaŋgö könaŋi ahui jöjöpaŋ keunöŋ kuŋgum niŋgiiga siŋgisöndoknöŋ tilipköm niŋgiiga mi ahal. Siŋgisöndok aka keunambuk ahal. Mewö miaŋön Anutugö jöjöpaŋ keu miaŋön siŋgisöndok bohon köliga aki mem kömum niŋgiiga köhömuŋi ahal.

¹²Mewö ahalmö, töndup Köna keu miaŋön mönö kömbukŋi aka sarakŋi akza. Miaŋgö jöjöpaŋ keuŋan mönö diŋdiŋi aka ölöpŋi akza.

¹³Mewö aiga jöjöpaŋ keu ölöpŋi miaŋön mem kömum niŋgiiga köhömuŋi ahal me qahö? Mi yapmakek! Keu ölöpŋan qahöpmö, Köna keunöŋ mönö nani siŋgisöndoknaŋgö könaŋi indeli möt kutuyal. Siŋgisöndokö gamuŋi aukŋe asuhui kanjamŋambuk mötmamgöra aka jöjöpaŋ keu miaŋön siŋgisöndokö selŋi jöhöiga urunan wahöri walöŋda siŋgisöndok ahal. Nani siŋgisöndokni miaŋön mönö mem kömum niŋgiiga köhömuŋi ahal. Mewö.

¹⁴Uŋa Töröŋan Köna keu neŋgiiga diŋdiŋi akzawi, mi mötzinmö, nöŋön siŋgisöndok azia aka sihim kömbönaŋni bölöŋambuk akzal. Eta kölbiga siŋgisöndoknöŋ galöm köl niŋgiiga tem köla welenŋi qeba siŋgisöndok ahakzal.

¹⁵Miaŋgöra yuai ölöpŋi akŋamgö mörakzali, mi qahö ahakzal. Mimö, yuai bölöŋi akŋamgö tököba sisitŋi memakzali, mönö mia ahakzal. Miaŋgöra yuai ahakzali, nöŋön miaŋgö könaŋi ölöp qahö möt kutumakzal.

¹⁶Miaŋgöra yuai bölöŋi akŋamgö ölan aka mia ahakzal ewö, Köna keunöŋ mönö töndup ölöpŋi akza. Köna keugöra mönö urumohot akzal.

¹⁷Mewö aiga nöŋön nanak mi qahö toroqeba ahakzalmö, siŋgisöndok urune ahözawaŋön mönö kuŋgum niŋgiiga mi ahakzal.

¹⁸Ahakmeme ölöpŋi akŋamgö sihimŋi ölŋa mörakzalmö, mi akŋamgö ösumnan qahö asuhum niŋgimakza. Miaŋgöra nöŋgö urune yuai ölöpŋi kun qahö ahözapmö, urusilenan mönö siŋgisöndok akŋamgö kuŋgum niŋgimakza, mewö mötzal.

¹⁹Miaŋgöra yuai ölöpŋi akŋamgö sihimŋi mörakzali, mia qahö ahakzalmö, yuai bölöŋi qahö akŋamgö mörakzali, mönö mia ahakzal.