Rom kimbi 6:15-23

¹⁵Miaŋgöra denöwö jibinak? Nini Köna keu bapŋe qahöpmö, kalem möriam uruŋe mala siŋgisöndok ahinga dop kölja me qahö? Mi yapmakek!

¹⁶To yahöt akzahot. Nanŋini yetköreŋök kungö böröŋe al aŋguba jitŋi tem köla welenŋi qemakzei, miaŋgöra mönö keu ki möt yaköme: Iŋini kun jitŋi tem kölakzei, mönö yaŋgö welenqeqeurupŋi akze. Siŋgisöndok Toŋaŋgö welenqeqeurupŋi akze ewö, yaŋön mönö eŋguaŋgiriga kömum köhöime. Anutugö jitŋi tem köla welenŋi qemakze ewö, yaŋön mönö keuŋini jim teköiga solanŋi aka mal öŋgöme.

¹⁷Iŋini mutuk siŋgisöndok Toŋaŋgö welenqeqeurupŋi aka malget. Mewö malgetka Buŋa keu mindiŋgöm eŋgimakŋapköra kusum eŋgigetka mötket. Mi möta miaŋgö dop uruŋini meleŋda nalö kewöŋe Buŋa keu törörök tem köla Anutugö könaŋi wuataŋgömakze. Mewö möta eŋgöra “Anutu saiwap!” jiba maljin.

¹⁸Mi wuataŋgöba siŋgisöndokö kösönöhök lolohoba Anutugö welenŋi qeba ahakmeme solanŋi aka memba malje.

¹⁹Urusileŋinan lölöwöröŋi akzawaŋgöra aka keu miaŋgö könaŋi mi mönö gölme ambazip neŋgö keu jijigö dop nöŋön kewö jimam: Iŋini mutuk sile kitipŋini pakpak tököba iwilele Toŋaŋgö (Satangö) böröŋe ala welenŋi qeba malget. Mewö malgetka ahakmeme aŋgöjörakŋambuk asuhuiga uruŋinan tölöhoi malget. Mewö malgetmö, nalö kewöŋe sile kitipŋini pakpak mi mönö tököba Anutugö böröŋe alme. Mewö ala welenŋi qegetka ahakmeme solanŋi asuhuiga sarakŋi ahakŋe.

²⁰Iŋini siŋgisöndok Toŋaŋgö welenqeqeurupŋi malgeri, nalö miaŋgöreŋ ahakmeme solanŋi mi qahö wuataŋgögetmö, nanŋini imbi-imbi laŋ malget.

²¹Nalö kewöŋe ahakmeme miaŋgöra gamuŋini mötzemö, nalö miaŋgöreŋ mewö aka mala ölŋi mönö denöwö miwikŋaiget? Ahakmeme gamuŋambuk miaŋgö ölŋi mi kömup köhöikŋi.

²²Nalö kewöŋe Anutunöŋ siŋgisöndokö kösönöhök pösat eŋgiiga lolohoba Anutugö welenqeqeurupŋi aketka ölŋi asuhuiga sarakŋi ahakze. Mewö aka malmal köhöikŋi mala teteköŋe oyaeŋkoyaeŋ aka mal öŋgöme.

²³Siŋgisöndok ahinga Toŋan töwa neŋgiiga kömup köhöikŋi miwikŋaibinmö, Anutugö kalemŋi mi oyaeŋkoyaeŋ malmal. Kraist Jisös Kembuninambuk qekötahöba kinbin ewö, mönö köhöiba teteköŋi qahö mal öŋgöbin. Mewö.