Rom kimbi 3:4-18

⁴Mi qahöpmahöp! Nini körek pakpak muneŋ ambazip akzinmö, Anutunöŋ öl töhönŋi akza. Anutugö könaŋi mi Buŋa Kimbinöŋ kewö ohoget ahöza, “Keu jakeŋe ala qesim gihigetka keugahö likepŋi jim asariba miaŋgöreŋ diŋdiŋi aka luhut al eŋgiba kinman. Göhö könaŋamgi mewö miwikŋaiba naŋgöba jime.”

⁵Neŋön ahakmeme goŋgoŋi wuataŋgöinga Anutunöŋ qindiŋaim neŋgiiga ahakmemeŋi diŋdiŋan mewö aukŋe asuhuza ewö, neŋön keu miaŋgöra mönö denöwö jibinak? Ni keu mi gölme ambazip mötmötkö dop kewö jizal: Anutunöŋ likepŋi meleŋniga irimsesewölŋan qaknine öŋgözawi, yaŋgö mötmötŋan mewö goŋgiza me qahö?

⁶Qahö, mi yapmakek! Anutunöŋ goŋgoŋi akawak ewö, yaŋön gölmeŋi gölmeŋi neŋgö keunini mönö denöwö kewöta törörök jim teköbawak?

⁷Nöŋön muneŋ azia akiga Anutunöŋ keuŋi ölŋan qindiŋaim niŋgiiga yaŋgö qetbuŋaŋan mewö aukŋe asuhum tiŋgitza. Mewö aiga nöŋön siŋgisöndok ahali, Anutunöŋ miaŋgö keuŋi mönö denöwögöra jim teköza? Nömosöri nani imbi-imbi malbi dop kölbawak me qahö? Keuŋan mönö qahö löwöriba etma.

⁸Mönö kewö jiinga dop kölbawak, “Nini ölöp bölöŋi toroqeba ahinga Anutunöŋ mi qindiŋaiiga ölöpŋaŋgö ölŋan asuhuiga keuŋan qetbuŋaŋambuk akŋa.” Tosatŋan neŋgöra keu sirongen mewö jiba toroqeba kewö jimakze, “Polnöŋ keu mewö jiba miaŋgö dop laŋ ahakza.” Mewö aka jigeraŋgö keuŋi mi Anutunöŋ kewöta dopŋine jim teköm eŋgima, mötzal. Mewö.

⁹Keu mewö eraum möta mi denöwö jim teköbinak? Juda neŋön kantri tosatŋi eŋgoŋgita Anutugö jeŋe diŋdiŋi akzin me qahö? Saumbaŋ! Miaŋgö keuŋi lök qeljiŋe kewö jim köhöinin: Juda me kantri tosatŋi akinak, nini körekmakörek siŋgisöndok ahinga köpeim neŋgiiga maljin. Miaŋgöra silenini memba öŋgöbingö osimakzin.

¹⁰Miaŋgö keuŋi mi Buŋa Kimbinöŋ kewö ohoget ahöza, “Kunŋan kun solanŋi diŋdiŋi qahö kötökŋi akza.

¹¹Kungö uruŋe mötmöt qahö ahum kutui laŋ malje. Kunŋan kun Anutu miwikŋaimamgö qahö kapaŋ kölakza.

¹²Qahöpmö, körekŋan mönö köna oŋgita jaŋjuŋ aka malje. Körekmakörekŋan mönö böliba Anutugö jeŋe aŋgöjörakŋinambuk akze. Ölöpŋi ahakzawi, mohot-töwa kun mi qahöpmahöp miwikŋaizal.

¹³Nesilamŋinan isimkakalek ahakze. Jöl ginaginaŋinan qaksirigö löm ewö aŋaŋiba kiniga kömupkö qösösökŋi ewö miaŋön ambazip laŋ ayuhum eŋgimakze. Keu bölöŋi mi qatögö jitŋi möröm warabe ewö numbuŋine kokolak qeba ahöiga jitŋinan ambazip laŋ eŋgöhömakze.

¹⁴Sait keu kömbukŋambuknöŋ mönö numbuŋini kokolak qeiga ambazip laŋ qesuahöm eŋgimakze.

¹⁵Ambazip laŋ eŋguba sepŋini mokomegöra könaŋinan kik-kek ösumok anda kamakze.

¹⁶Könaŋini goŋgii maljeaŋgö aiwesökŋini kewö akza: Denike lilikömakzei, miaŋgöreŋ mönö köndeŋ-möndeŋ aketka ambazip uruŋinan böliba kömbuhi-makza.

¹⁷Luainöŋ malmalgö könaŋi mi qahö möt kutum yaköze.

¹⁸Anutu göda qebingö keuŋi mi uruŋine qahö ahöza. Jitŋi oŋgitpinbuköra keŋgötŋini qahö möta önewat laŋ malje.” Anutugöreŋ keu mewö ahöza.