Rom kimbi 1:6-14

⁶Anutunöŋ ambazip Jisös Kraistkö buŋaya aka malmegöra eŋgoholöhi, Rom iŋini mewöyök yeŋgö sutŋine malje.

⁷Uruŋini meleŋda Rom sitinöŋ maljei, nöŋön körek eŋgöra kimbi ki ohozal. Anutunöŋ iŋini nanŋi ambazip sarakŋi malmegöra eŋgohola jöpaköm eŋgimakza. Anutu Iwinini aka Kembu Jisös Kraist yetkön mönö kalem möriam eŋgiyohotka luainöŋ malme. Mewö köulukömakzal.

⁸Gölmeŋi gölmeŋi pakpak yeŋön Rom eŋgö mötnaripŋinaŋgö kösohotŋi jigetka mörakzal. Miaŋgöra keuni könahiba Jisös Kraistnöŋ nam köl niŋgiiga körek eŋgöra aka Anutuni saiwap jimakzal.

⁹Nöŋön mötmöt sihimni pakpak Anutugö nupnöŋ ala welenŋi qeba Nahönŋaŋgö Ölöwak Buŋaŋi jim asarimakzal. Miaŋgöreŋ sundan iŋini mötmörim eŋgimakzali, mi Anutunöŋ naŋgöba jimakza.

¹⁰Nalö dop kewö jiba köulukömakzal, “O Anutu, nöŋön Rom yeŋgöreŋ anmamgö möta nalö köröpŋi lök mambötzal. Miaŋgöra mönö sihimgahö dop jinöŋga köna asuhuiga nalö kewöŋe ölöp anmam.” Mewö.

¹¹Eŋgeka mötnaripŋinan köhöimapköra möta ölöp nup memegö mötmöt kalem kun eŋgimam. Miaŋgöra nalö mutukŋa eŋgöreŋ kaba eŋgekŋamgö awöweŋgöba maljal.

¹²Kewö akingö awöweŋgömakzal: Nöŋön eŋgekiga mutulaŋgöba ni aka iŋini denöwö möt narimakzini, mi eraum möta urunöŋ naŋgöba körö-ölöwak qem aŋgubin.

¹³O urumeleŋ alaurupni, iŋini mönö kewö mötmöriba malme: Nöŋön kian kantri tosatŋi yeŋgö sutŋine liliköba uruŋini kuŋgum eŋgibiga meleŋgeri, miaŋgö dop eŋgö sutŋine mewöyök ölŋi asuhui ekŋamgö mötzal. Miaŋgöra nalö gwötpuk lök eŋgöreŋ kusuk kamamgö areŋi ala malalmö, yuai tosatŋan mönö nalöŋi nalöŋi jöhöm niŋgiiga osial.

¹⁴Anutugö jeŋe tosa kewö ahöm niŋgiza: Ambazip kambu könaŋi könaŋi bauköm eŋgimamaŋgö keuŋan mönö nöŋgö qakne ahöza. Mötmöt ambazip aka gukmaulem ambazip mieŋgö welenqeqeŋini öröröŋ akzal. Mindimindiri keu Grik mötzei aka qandam mala nanŋini keuŋine irohowaroho jimakzei, mi körek bauköm eŋgimamgö mötzal.