Rom kimbi 16:9-20

⁹Neŋaknini Urbanus Kraistpuk kinjawi aka wölböt alani Stakis yetköra mönö nöŋgöreŋ yaizökzökni jigetka mötmahot.

¹⁰Apeles Anutunöŋ esapesap waŋgiiga dop köli Kraistpuk qekötahöba kinjawi, yaŋgöra mönö nöŋgö yaizökzökni jigetka mötma. Aristobulusbuk miri mohot maljei, yeŋgöra mönö nöŋgöreŋ yaizökzökni jigetka mötme.

¹¹Tinitosolomni Herodion yaŋgöra mönö nöŋgöreŋ yaizökzökni jigetka mötma. Narsisusbuk Kembu qekötahöba miri mohot maljei, yeŋgöra mönö nöŋgöreŋ yaizökzökni jigetka mötme.

¹²Trifina aka Trifosa ambi yahöt mietkön nup ketaŋi memba Kembubuk kinjahori, yetköra mönö nöŋgöreŋ yaizökzökni jigetka mötmahot. Wölböt ambi alani Persis yaŋön Kembugöra nup keta bölökŋi memba maljawi, yaŋgöra mönö nöŋgöreŋ yaizökzökni jigetka mötma.

¹³Rufus yaŋön Kembugö nupŋi ölöp kötökŋi memakzawi aka yaŋgö namŋi nalö dop ni tok nahönŋi ewö köyan köl niŋgiba malöhi, yetköra mönö nöŋgöreŋ yaizökzökni jigetka mötmahot.

¹⁴Asinkritus, Flegon, Hermes, Patrobas, Hermas aka urumeleŋ alaurup tosatŋi yembuk maljei, yeŋgöra mönö nöŋgö yaizökzökni jigetka mötme.

¹⁵Filologus, Julia, Nereus nenŋambuk aka Olimpas aka ambazip sarakŋi tosatŋi pakpak yembuk maljei, yeŋgöra mönö nöŋgöreŋ yaizökzökni jigetka mötme.

¹⁶Urumeleŋ alaurup sutŋine mönö aŋgum aŋguba nemböŋini suhuba jölöŋini jiba malme. Kraistkö urumeleŋ könagesö pakpak yeŋön mönö yaizökzökŋini algetka eŋgöreŋ kaza. Mewö.

¹⁷O urumeleŋ alaurupni, nöŋön uruŋini kewö kuŋguba jizal: Ambazip tosatŋan uru mendeŋmendeŋ asuhumapkö nam kölakzei, yeŋgöra mönö je galöm mem aŋguba malme. Urumohotkö silik ölöpŋi kusum eŋgigetka mötzemö, keu mi qetala kösawöraŋ keu tosatŋi miaŋön uruŋini kuŋgugetka bölii qaköba erakze. Ambazip mewöŋi mi mönö eŋgömosöta tikep malme.

¹⁸Ambazip mewöŋan mönö nanini Kembunini Kraistkö nupŋi qahö memakzemö, nanŋini sihimŋinaŋgö dop asuhumapköra tuaköpek jiba nanŋini welen qem aŋgumakze. Kelök keu ölöpŋi ölöpŋi nahömŋambuk jiba ambazip geŋmoŋini qahö yeŋgö uruŋini kuŋguba tilipköm eŋgimakze.

¹⁹Iŋini Ölöwak Buŋa tem köla wuataŋgömakzei, keu mi körek neŋgö kezapnine geiga mötzin. Miaŋgöra nöŋön eŋgöra aka önöŋi qahö söŋgaimakzal. Mewö akzalmö, iŋini kewö aka malmegöra mötzal: Mönö bölöŋi akingö mötkutukutuŋini mosötketka etma. Ölöpŋi akingö mötkutukutuŋini mi mönö pöndaŋ köl guliba mem qarime.

²⁰Luai Toŋi Anutu yaŋön mönö Satan ösumok töjöjahöi eŋgö bapŋine eri köiraŋ köla söŋgaiba malme. Kembunini Jisösgö kalem möriamŋan mönö embuk ahöma.